ಲಾಕ್​​ಡೌನ್ ಎಫೆಕ್ಟ್: 80 ಎಕರೆ ಜಮೀನಿನಲ್ಲಿ ಅನಾನಸ್​​​​​​​ ಬೆಳೆದ ರೈತ ಕಂಗಾಲು

ಕೊರೊನಾದಿಂದ ದೇಶದ ಆರ್ಥಿಕತೆ ಸಾಕಷ್ಟು ನಷ್ಟ ಅನುಭವಿಸುತ್ತಿದ್ದು, ಯಾವುದೇ ಮಾರುಕಟ್ಟೆ ವ್ಯವಸ್ಥೆಯಿಲ್ಲದೇ ಬೆಳೆಗಾರರು, ಕೃಷಿಕರು ನಷ್ಟ ಅನುಭವಿಸುತ್ತಿದ್ದಾರೆ. ಬೆಳ್ತಂಗಡಿಯಲ್ಲಿ ಸುಮಾರು 80 ಎಕರೆ ಪ್ರದೇಶದಲ್ಲಿ ಬೆಳೆದಿರುವ ಅನಾನಸ್​​ ಮಾರುಕಟ್ಟೆ ಇಲ್ಲದೇ ರೈತ ಕಂಗಾಲಾಗಿದ್ದಾನೆ.

ಬೆಳ್ತಂಗಡಿ: ಲಾಕ್​ಡೌನ್​​ನಿಂದ ಎಲ್ಲಾ ವಲಯಗಳು ನಷ್ಟದಲ್ಲಿದ್ದು, ಜಿಲ್ಲೆಯಲ್ಲಿ ಸುಮಾರು 80 ಎಕರೆ ಪ್ರದೇಶದಲ್ಲಿ ಬೆಳೆದ ಅನಾನಸ್​ಗೆ ಮಾರುಕಟ್ಟೆ ಇಲ್ಲದೆ ರೈತನೊಬ್ಬ ಕಂಗಾಲಾಗಿದ್ದಾನೆ.

ಕೇರಳ ಮೂಲದ ಶೈಜು ಎಂಬುವವರು ಕಕ್ಕಿಂಜೆ ಅಸುಪಾಸಿನಲ್ಲಿ ಕೆಲವು ಜನರಿಂದ ಜಾಗಗಳನ್ನು ಗುತ್ತಿಗೆ ಆಧಾರದಲ್ಲಿ ಪಡೆದ ಸುಮಾರು 80 ಎಕರೆ ಪ್ರದೇಶದಲ್ಲಿ ವ್ಯವಸ್ಥಿತ ರೀತಿಯಲ್ಲಿ ಅನಾನಸ್​​​ ಬೆಳೆ ಬೆಳೆದಿದ್ದಾರೆ. ಬೆಳೆ ಚೆನ್ನಾಗಿ ಬಂದು ಕಟಾವಿಗೆ ಬಂದಿದೆ. ಆದರೆ ಲಾಕ್​​ಡೌನ್​​ನಿಂದ ಮಾರುಕಟ್ಟೆಯಲ್ಲಿ ಬೇಡಿಕೆ ಇಲ್ಲದಾಗಿದೆ. ಪ್ರತಿ ಬಾರಿ ಇವರು ಬೆಳೆದ ಅನಾನಸ್​​ಗಳನ್ನು ದೆಹಲಿ, ಪೂನಾ, ಮುಂಬೈ, ಜೈಪುರ, ಅಲಹಾಬಾದ್ ಹಾಗೂ ಇನ್ನಿತರ ಕಡೆಗಳಿಗೆ ಸಾಗಿಸಿ ಲಾಭ ಪಡೆಯುತ್ತಿದ್ದರು. ಪ್ರತಿ ಬಾರಿ ಕೆಜಿಗೆ 40ರಿಂದ 50 ರೂ.ವರೆಗೆ ಮಾರಾಟವಾಗುತ್ತಿದ್ದ ಹಣ್ಣುಗಳನ್ನು ಈ ಬಾರಿ ಕೇಳುವವರಿಲ್ಲದಂತಾಗಿದೆ.

ಲಾಕ್​​ಡೌನ್​​ನಿಂದ ಸಾಗಣೆ ವ್ಯವಸ್ಥೆ ಸಂಪೂರ್ಣ ಸ್ಥಗಿತಗೊಂಡಿದೆ. ದೊಡ್ಡ ಮೊತ್ತದ ಬ್ಯಾಂಕ್ ಸಾಲ ಮಾಡಿ ಈ ಬೆಳೆ ಬೆಳೆದಿರುವ ರೈತ ಈಗ ಕಣ್ಣೀರಿಡುವ ಸ್ಥಿತಿ ಎದುರಾಗಿದೆ.