ಮಂಗಳೂರು: ಇಂದಿನ ಕಾಲಘಟ್ಟದಲ್ಲಿ ಪ್ಲಾಸ್ಟಿಕ್ ಪೆಡಂಭೂತವಾಗಿ ಪರಿಸರವನ್ನು ಕಾಡುತ್ತಿದೆ. ತ್ಯಾಜ್ಯವಾದ ಪ್ಲಾಸ್ಟಿಕ್ನ ಸಮರ್ಥ ನಿರ್ವಹಣೆಯೇ ಬಹುದೊಡ್ಡ ಸವಾಲಾಗಿದೆ. ಈ ನಿಟ್ಟಿನಲ್ಲಿ ಬೆಂಗಳೂರು ಮೂಲದ 'ಪ್ಲಾಸ್ಟಿಕ್ ಫಾರ್ ಚೇಂಜ್ ಇಂಡಿಯಾ ಫೌಂಡೇಷನ್' ಎಂಬ ಸಂಸ್ಥೆ ಮರುಬಳಕೆಯಾಗಲೂ ಯೋಗ್ಯವಲ್ಲದ ಪ್ಲಾಸ್ಟಿಕ್ನಿಂದಲೇ ತ್ಯಾಜ್ಯ ಸಂಗ್ರಹಕಾರರಿಗೆಂದೇ ಸುಂದರವಾದ ಮನೆ ನಿರ್ಮಾಣ ಮಾಡಿದೆ.
ತ್ಯಾಜ್ಯ ಸಂಗ್ರಹಗಾರರೂ ಕೂಡಾ ಸಂಗ್ರಹಣೆ ಮಾಡದ ಪಾನ್ ಪರಾಗ್, ಲೇಸ್ ಮತ್ತಿತರ ಮರುಬಳಕೆಗೆ ಸಾಧ್ಯವೇ ಆಗದ ಎಲ್ಡಿಪಿ(ಲೋ ಡೆನ್ಸಿಟಿ ಪ್ಲಾಸ್ಟಿಕ್) ಹಾಗೂ ಎಂಎಲ್ಪಿ(ಮಲ್ಟಿ ಲೇಯರ್ಡ್ ಪ್ಲಾಸ್ಟಿಕ್) ಪ್ಲಾಸ್ಟಿಕ್ ಬಳಸಿ ಈ ಪ್ಲಾಸ್ಟಿಕ್ ಮನೆಯನ್ನು ನಿರ್ಮಾಣ ಮಾಡಲಾಗಿದೆ. ಮಣ್ಣು, ಸಮುದ್ರಗಳಿಗೆ ಮಾರಕವಾಗಿರುವ ಈ ಪ್ಲಾಸ್ಟಿಕ್ಗಳನ್ನೇ ಸಂಗ್ರಹಿಸಿ ಅದನ್ನು ಕರಗಿಸಿ ಪ್ಯಾನೆಲ್(ಶೀಟ್)ಗಳನ್ನಾಗಿ ಮಾಡಿ ಮನೆಯನ್ನು ನಿರ್ಮಿಸಲಾಗಿದೆ. ಪ್ರತೀ ಪ್ಯಾನಲ್ಗೆ ಸುಮಾರು 25 ಕೆಜಿಯಷ್ಟು ಎಲ್ಡಿಪಿಇ ಹಾಗೂ ಎಂಎಲ್ಪಿ ಪ್ಲಾಸ್ಟಿಕ್ ಬಳಸಲಾಗಿದೆ. ಸುಮಾರು 360 ಚದರ ಅಡಿಯ ಈ ಒಂದು ಮನೆಗೆ ಸುಮಾರು 1500 ಕೆಜಿ ಪ್ಲಾಸ್ಟಿಕ್ ಬಳಸಲಾಗಿದೆ. ಒಂದು ಹಾಲ್, ಸಣ್ಣ ಅಡುಗೆ ಕೋಣೆ, ದೇವರ ಕೋಣೆ ಸೇರಿದಂತೆ ಬಾತ್ ರೂಂ ಇರುವ ಈ ಮನೆಯು ಸುಮಾರು 4.50 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿದೆ.
ಪ್ಲಾಸ್ಟಿಕ್ನಿಂದ ಮನೆ ನಿರ್ಮಾಣ ತಳಪಾಯವನ್ನು ಕಲ್ಲು - ಸಿಮೆಂಟ್ಗಳಿಂದ ನಿರ್ಮಿಸಲಾಗಿದ್ದು, ಪ್ಲಾಸ್ಟಿಕ್ ಪ್ಯಾನಲ್ಗಳು ಬಲವಾಗಲು ಕಬ್ಬಿಣದ ರಾಡ್ಗಳನ್ನು ವೆಲ್ಡ್ ಮಾಡಿ ಫಿಕ್ಸ್ ಮಾಡಲಾಗಿದೆ. ಮೇಲ್ಛಾವಣಿಗೂ ಪ್ಲಾಸ್ಟಿಕ್ ಶೀಟ್ಗಳನ್ನೇ ಬಳಸಲಾಗಿದೆ. ಕೇವಲ ಹತ್ತು ದಿನಗಳಲ್ಲಿ ಈ ಮನೆಯನ್ನು ನಿರ್ಮಿಸಬಹುದಾಗಿದೆ.
ಸುಮಾರು 30 ವರ್ಷಗಳ ಕಾಲ ಬಾಳಿಕೆ ಬರುವ ಈ ಮನೆಯನ್ನು ಈಗಾಗಲೇ ತಪಾಸಣೆ ಮಾಡಿದ್ದು, ಬೆಂಕಿಯಿಂದಾಗಲಿ, ಹವಾಗುಣದಿಂದಾಗಲಿ ಯಾವುದೇ ರೀತಿಯಲ್ಲಿ ಹಾನಿಯಾಗುವುದಿಲ್ಲ ಎಂಬ ವರದಿ ಬಂದಿದೆ. ಕಾಂಕ್ರೀಟ್ ಶೀಟ್ಗಿಂತಲೂ ಗಟ್ಟಿಯಾಗಿರುವ ಈ ಪ್ಲಾಸ್ಟಿಕ್ ಮನೆಗೆ 120 ಕಿ.ಮೀ. ವೇಗದಲ್ಲಿ ಗಾಳಿ ಬೀಸಿದಾಗಲೂ ತಡೆದುಕೊಳ್ಳುವ ಶಕ್ತಿ ಇದೆ. ಪ್ಲಾಸ್ಟಿಕ್ ಪ್ಯಾನಲನ್ನು 8ಎಂಎಂ ನಿಂದ 20 ಎಂಎಂ ವರೆಗೆ ತಯಾರಿಸಲಾಗುತ್ತದೆ. ಮನೆಯ ವಿಸ್ತೀರ್ಣದ ಮೇಲೆ ವಿವಿಧ ಎಂಎಂ ನ ಪ್ಲಾಸ್ಟಿಕ್ ಪ್ಯಾನಲ್ ಬಳಸಲಾಗುತ್ತದೆ.
'ಪ್ಲಾಸ್ಟಿಕ್ ಫಾರ್ ಚೇಂಜ್ ಇಂಡಿಯಾ ಫೌಂಡೇಷನ್' ಎಂಬ ಸಂಸ್ಥೆ ರಾಜ್ಯದಲ್ಲಿಯೇ ಪ್ರಥಮ ಪ್ರಯೋಗವೆಂಬಂತೆ ಮೊದಲ ಬಾರಿಗೆ ಮಂಗಳೂರಿನ ಪಚ್ಚನಾಡಿಯಲ್ಲಿನ ತ್ಯಾಜ್ಯ ಸಂಗ್ರಹಗಾರರಿಗೆಂದು ಪ್ಲಾಸ್ಟಿಕ್ ತ್ಯಾಜ್ಯದಿಂದಲೇ ಈ ಪ್ಲಾಸ್ಟಿಕ್ ಮನೆಯನ್ನು ನಿರ್ಮಿಸಿದೆ. ಇದೀಗ ಪೌರ ಕಾರ್ಮಿಕೆ ಕಮಲಾ ಎಂಬವರಿಗೆ ಪ್ಲಾಸ್ಟಿಕ್ ಮನೆಯನ್ನು ನಿರ್ಮಾಣ ಮಾಡಲಾಗಿದ್ದು, ಮುಂದಿನ ಜನವರಿಯಿಂದ ಆಗಸ್ಟ್ ವರೆಗಿನ ಅವಧಿಯಲ್ಲಿ ಇಲ್ಲಿನ ಸ್ವಂತ ಸೂರಿಲ್ಲದೆ ಜೋಪಡಿಯಲ್ಲಿರುವ ಸುಮಾರು 20ರಷ್ಟು ತ್ಯಾಜ್ಯ ಸಂಗ್ರಾಹಕ ಕುಟುಂಬಗಳಿಗೆ ಮನೆಯನ್ನು ಕಟ್ಟಿಕೊಡುವ ಯೋಜನೆ ಇದೆಯಂತೆ.
ಮಿತ ಶ್ರಮ, ಕಡಿಮೆ ವೆಚ್ಚ ಹಾಗೂ ಅಧಿಕ ಕಾಲ ಬಾಳಿಕೆ ಬರುವ ಪ್ಲಾಸ್ಟಿಕ್ನಿಂದ ನಿರ್ಮಾಣವಾದ ಈ ಮನೆಯನ್ನು ಕಂಡವರು ಬಹಳ ಮಂದಿ ಮೆಚ್ಚಿಕೊಂಡಿದ್ದು, ತಾವೂ ಯಾಕೆ ಈ ರೀತಿಯ ಮನೆ ನಿರ್ಮಾಣ ಮಾಡಬಾರದು ಅಂದು ಕೊಂಡಿದ್ದಾರಂತೆ. ಇತ್ತೀಚೆಗೆ ಇಲ್ಲಿಗೆ ಭೇಟಿ ನೀಡಿರುವ ಪೊಲೀಸರು ಮನೆಯನ್ನು ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿ, ಪೊಲೀಸ್ ಚೌಕಿ ಮಾಡಲು ಸೂಕ್ತವೆಂದು ಹೇಳಿದ್ದಾರಂತೆ.
ಈ ಬಗ್ಗೆ 'ಪ್ಲಾಸ್ಟಿಕ್ ಫಾರ್ ಚೇಂಜ್ ಇಂಡಿಯಾ ಫೌಂಡೇಷನ್' ನಿರ್ದೇಶಕ ಚಂದನ್ ಎಂ.ಸಿ. ಮಾತನಾಡಿ, ತ್ಯಾಜ್ಯ ಸಂಗ್ರಹಗಾರರಿಂದ ಸಂಗ್ರಹವಾದ ಪ್ಲಾಸ್ಟಿಕ್ ತ್ಯಾಜ್ಯವನ್ನು ನಮ್ಮ ನಿರ್ಮಾಣ ಪಾಲುದಾರ ಸಂಸ್ಥೆ ಹೈದರಾಬಾದ್ ನ ಬಂಬೂ ಹೌಸ್ ಮೂಲಕ ಗುಜರಾತ್ ಗೆ ಕಳುಹಿಸಲಾಗುತ್ತದೆ. ಅಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಕರಗಿಸಿ ಪ್ಯಾನಲ್ (ಶೀಟ್ ) ರೀತಿ ಪರಿವರ್ತನೆ ಮಾಡಲಾಗುತ್ತದೆ. ಬಳಿಕ ಆ ಪ್ಯಾನಲ್ಗಳನ್ನು ಇಲ್ಲಿಗೆ ತಂದು ಮನೆ ನಿರ್ಮಾಣ ಮಾಡುತ್ತೇವೆ. ಮರು ಬಳಕೆಯಾದ ಪ್ಲಾಸ್ಟಿಕ್ನಿಂದ ಈ ಪ್ಯಾನೆಲನ್ನು ತಯಾರಿಸಿದರೂ, ರಾಸಾಯನಿಕವನ್ನು ಬಳಸಿರುವುದರಿಂದ ಪ್ಲಾಸ್ಟಿಕ್ ವಾಸನೆ ಬರುವುದಿಲ್ಲ ಎಂದು ಹೇಳಿದರು.‘
ಮನೆಯ ಫಲಾನುಭವಿ ಕಮಲಾ ಅವರು ಮಾತನಾಡಿ, ಸುಮಾರು ಎರಡು ಸಲ ನನ್ನ ಮನೆಯು ಕುಸಿದು ಬಿದ್ದಿತ್ತು. ಬೀದಿ ಪಾಲಾಗಿದ್ದ ನನಗೆ 'ಪ್ಲಾಸ್ಟಿಕ್ ಫಾರ್ ಚೇಂಜ್ ಇಂಡಿಯಾ ಫೌಂಡೇಷನ್'ನವರು ಪ್ಲಾಸ್ಟಿಕ್ನಿಂದಲೇ ಸುಂದರವಾದ ಮನೆಯನ್ನು ಉಚಿತವಾಗಿ ನಿರ್ಮಿಸಿಕೊಟ್ಟಿದ್ದಾರೆ. ಮೊದಲಿಗೆ ಪ್ಲಾಸ್ಟಿಕ್ನಿಂದ ಯಾವ ರೀತಿ ಮನೆ ನಿರ್ಮಿಸಿಕೊಡುತ್ತಾರೆ ಎಂಬ ಅಳುಕಿತ್ತು. ಆದರೆ ಈ ಮನೆ ಕಲ್ಲು, ಸಿಮೆಂಟ್ನಿಂದ ನಿರ್ಮಾಣವಾಗುವ ಮನೆಯಷ್ಟೇ ಗಟ್ಟಿಯಾಗಿದೆ ಎಂದು ಹೇಳಿದರು.
