ಬಿಜೆಪಿಗರು ಜನರ ಸಮಸ್ಯೆಗಿಂತ ಮೋದಿ ವರ್ಚಸ್ಸು ಸರಿಪಡಿಸುವ ಚಿಂತೆಯಲ್ಲಿದ್ದಾರೆ: ರಮಾನಾಥ ರೈ

ಕೋವಿಡ್ ನಿರ್ವಹಣೆಗೆ ಸಂಬಂಧಪಟ್ಟಂತೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಾಜಿ ಸಚಿವ ರಮಾನಾಥ ರೈ, ರಾಜ್ಯ, ಕೇಂದ್ರ ಸರ್ಕಾರಗಳ ವಿರುದ್ಧ ವಾಗ್ದಾಳಿ ನಡೆಸಿದರು.

ಮಂಗಳೂರು: ಬಿಜೆಪಿ ಜನರ ಸಮಸ್ಯೆಗಳಿಗಿಂತ ಕಡಿಮೆಯಾಗುತ್ತಿರುವ ಮೋದಿಯವರ ವರ್ಚಸ್ಸನ್ನು ಸರಿಪಡಿಸುವುದು ಹೇಗೆ ಎಂಬ ಚಿಂತೆಯಲ್ಲಿದೆ ಎಂದು ಮಾಜಿ ಸಚಿವ ರಮಾನಾಥ ರೈ ವ್ಯಂಗ್ಯವಾಡಿದರು.

ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಬಿಜೆಪಿಯವರು ವಿಪತ್ತು ನಿರ್ವಹಣೆ ಮಾಡುವುದಕ್ಕಿಂತ ಮೋದಿ ಎಂಬ ವಿಪತ್ತನ್ನು ಹೇಗೆ ನಿರ್ವಹಣೆ ಮಾಡುವುದು ಅಂತ ತಲೆಕೆಡಿಸಿಕೊಳ್ಳುತ್ತಿದ್ದಾರೆ ಎಂದು ಹೇಳಿದರು.

ಇದನ್ನೂಓದಿ : ಕೊರೊನಾ ನಿರ್ವಹಣೆ: ನಾಳೆ ರಾಜ್ಯದ 17 ಡಿಸಿಗಳ ಜೊತೆ ಪ್ರಧಾನಿ ವಿಡಿಯೋ ಸಂವಾದ

ಹೆಲ್ತ್ ವಾರಿಯರ್ಸ್ ಎಂದು ಬಿಜೆಪಿಗರು ಹೇಳುವ ಆಶಾ ಕಾರ್ಯಕರ್ತೆಯರು, ನರ್ಸ್​ಗಳಿಗೆ ಇನ್ನೂ ವೇತನ ಸಿಕ್ಕಿಲ್ಲ. ಆದರೆ, ಸಂಸದರೊಬ್ಬರು ಇದು ಕಾಂಗ್ರೆಸಿಗರು ಬಿಟ್ಟು ಹೋದ ವ್ಯವಸ್ಥೆಯಿಂದ ಆಗಿರುವುದು ಎಂದು ಹೇಳುತ್ತಾರೆ. ಕಾಂಗ್ರೆಸ್ ಒಳ್ಳೆಯ ರೀತಿಯಿಂದಲೇ ಬಿಟ್ಟು ಹೋಗಿದೆ. ಬಿಜೆಪಿಗರದ್ದು ಮಾತನಾಡುವುದು ಒಂದೇ ಸಾಧನೆ. ಬಡವರಿಗೆ ಬೇಕಾದ ಎಲ್ಲಾ ಕಾರ್ಯಕ್ರಮಗಳನ್ನು ಮಾಡಿರುವುದು ಕಾಂಗ್ರೆಸ್ ಮಾತ್ರ ಎಂದರು.