ಮಂಗಳೂರಿನಲ್ಲಿ ಪೊಲೀಸರ ನಿದ್ದೆಗೆಡಿಸಿದ ವಿವಾದಿತ ಗೋಡೆ ಬರಹಗಳು: ಜನತೆಯಲ್ಲಿ ಆತಂಕ ಸೃಷ್ಟಿ

ಕಳೆದ ಶುಕ್ರವಾರ ನಗರದ ಸರ್ಕ್ಯೂಟ್ ಹೌಸ್​ಗೆ ಹೋಗುವ ರಸ್ತೆ ಬದಿಯ ಅಪಾರ್ಟ್‌ಮೆಂಟ್ ಒಂದರ ಗೋಡೆಯಲ್ಲಿ ಹ್ಯಾಷ್ ಟ್ಯಾಗ್ ಹಾಕಿ ಲಷ್ಕರ್-ಎ-ತೋಯ್ಬಾ ಹಾಗೂ ತಾಲಿಬಾನ್ ಸಂಘಟನೆಗಳ ಪರವಾಗಿ ಬರೆಯಲಾಗಿತ್ತು. ಇದಾಗಿ ಎರಡೇ ದಿನದಲ್ಲಿ ಅಂದರೆ ಭಾನುವಾರ ಬೆಳಗ್ಗೆ ಪಿವಿಎಸ್ ಬಳಿಯಿರುವ ಕೋರ್ಟ್ ರಸ್ತೆಯಲ್ಲಿ ನ್ಯಾಯಾಲಯಕ್ಕೆ ಸೇರಿರುವ ಹಳೆಯ ಕಟ್ಟಡದ ಗೋಡೆಯಲ್ಲಿ ಇಂಗ್ಲಿಷ್ ಭಾಷೆಯಲ್ಲಿ ಬರೆದ ವಿವಾದಿತ ಉರ್ದು ಬರಹ ಕಂಡು ಬಂದಿದೆ. ವಿವಾದಿತ ಬರಹಗಳು ನಗರದ ಜನತೆಯಲ್ಲಿಯೂ ಆತಂಕ ಸೃಷ್ಟಿಸಿವೆ.

ಮಂಗಳೂರು: ನಗರದಲ್ಲಿ ವಿವಾದಿತ ಗೋಡೆ ಬರಹಗಳು ಕಾಣಿಸಿಕೊಳ್ಳುತ್ತಿದ್ದು, ಎರಡು ದಿನಗಳ ಅಂತರದಲ್ಲಿ ಎರಡು ಕಡೆಗಳಲ್ಲಿ ವಿವಾದಾತ್ಮಕ ಗೋಡೆ ಬರಹಗಳು ಕಾಣಿಸಿಕೊಂಡಿದೆ. ಆದರೆ ಈವರೆಗೆ ಕೃತ್ಯ ನಡೆಸಿರುವ ಆರೋಪಿಗಳು ಯಾರು ಎಂಬುದು ಪತ್ತೆಯಾಗಿಲ್ಲ. ವಿವಾದಿತ ಬರಹಗಳು ಮೂಡುತ್ತಿರುವುದು ಪೊಲೀಸರ ನಿದ್ದೆಗೆಡಿಸಿದ್ದು ಮಾತ್ರವಲ್ಲ. ನಗರದ ಜನತೆಯಲ್ಲಿಯೂ ಆತಂಕದ ವಾತಾವರಣ ನಿರ್ಮಾಣವಾಗಿದೆ.

ಕಳೆದ ಶುಕ್ರವಾರ ನಗರದ ಸರ್ಕ್ಯೂಟ್ ಹೌಸ್​ಗೆ ಹೋಗುವ ರಸ್ತೆ ಬದಿಯ ಅಪಾರ್ಟ್‌ಮೆಂಟ್ ಒಂದರ ಗೋಡೆಯಲ್ಲಿ ಹ್ಯಾಷ್ ಟ್ಯಾಗ್ ಹಾಕಿ ಲಷ್ಕರ್-ಎ-ತೋಯ್ಬಾ ಹಾಗೂ ತಾಲಿಬಾನ್ ಸಂಘಟನೆಗಳ ಪರವಾಗಿ ಬರೆಯಲಾಗಿತ್ತು. ತಕ್ಷಣ ಪೊಲೀಸರು ಇದಕ್ಕೆ ಪೇಂಟ್ ಬಳಿದು ಗೋಣಿಯನ್ನು ಮುಚ್ಚಿ ಕೃತ್ಯ ನಡೆಸಿದವರ ಬಗ್ಗೆ ತನಿಖೆ ನಡೆಸುತ್ತಿದ್ದರು. ಇದಾಗಿ ಎರಡೇ ದಿನದಲ್ಲಿ ಅಂದರೆ ಭಾನುವಾರ ಬೆಳಗ್ಗೆ ಪಿವಿಎಸ್ ಬಳಿಯಿರುವ ಕೋರ್ಟ್ ರಸ್ತೆಯಲ್ಲಿ ನ್ಯಾಯಾಲಯಕ್ಕೆ ಸೇರಿರುವ ಹಳೆಯ ಕಟ್ಟಡದ ಗೋಡೆಯಲ್ಲಿ ಇಂಗ್ಲಿಷ್ ಭಾಷೆಯಲ್ಲಿ ಬರೆದ ವಿವಾದಿತ ಉರ್ದು ಬರಹ ಕಂಡು ಬಂದಿದೆ. 'ಪ್ರವಾದಿಗೆ ಕೋಪ ಬಂದಲ್ಲಿ ಒಂದೇ ಶಿಕ್ಷೆ‌. ದೇಹದಿಂದ ತಲೆ ಬೇರ್ಪಡುವುದು' ಎಂದು ಬರೆಯಲಾಗಿದೆ. ಬೆಳಗ್ಗೆ ದಾರಿ ಹೋಕರು ಈ ಬರಹವನ್ನು ನೋಡಿ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಕೂಡಲೇ ಪೊಲೀಸರು ಬಣ್ಣ ಬಳಿದು ಅಳಿಸಿ ಹಾಕಿದ್ದಾರೆ.

ಈ ಎರಡೂ ಕೃತ್ಯದ ಬಗ್ಗೆ ಪೊಲೀಸರು ಐಪಿಎಸ್ 153ಎ (ಸಮುದಾಯಗಳ ನಡುವೆಯ ಸಾಮರಸ್ಯ ಕೆಡಿಸುವುದು) ಹಾಗೂ ಕರ್ನಾಟಕ ಸಾರ್ವಜನಿಕ ಪ್ರದೇಶಗಳ ವಿರೂಪ ಪ್ರತಿಬಂಧಕ ಕಾಯ್ದೆಗಳಡಿಯಲ್ಲಿ ಪ್ರಕರಣ ದಾಖಲಿಸಿ ತನಿಖೆ ನಡೆಸುತ್ತಿದ್ದಾರೆ. ಈ ಘಟನೆ ಪೊಲೀಸರ ನಿದ್ದೆಗೆಡಿಸಿದ್ದು, ಈ ಬಗ್ಗೆ ಮೊದಲ ಪ್ರಕರಣದಲ್ಲಿ ಕೆಲವರನ್ನು ವಶಕ್ಕೆ ಪಡೆದು ತನಿಖೆಯನ್ನು ನಡೆಸಿದ್ದಾರೆ. ಎರಡೂ ಕಡೆಗಳಲ್ಲಿ ಬರೆದವರೂ ಒಂದೇ ತಂಡದವರು ಇರಬಹುದೆಂಬ ಶಂಕೆಯಲ್ಲಿ ಈ ಬಗ್ಗೆಯೂ ಪೊಲೀಸರು ಮಾಹಿತಿ ಕಲೆ ಹಾಕಿ ತನಿಖೆ ನಡೆಸುತ್ತಿದ್ದಾರೆ.

ಮಂಗಳೂರು ನಗರದಲ್ಲಿ ಕಂಡು ಬರುತ್ತಿರುವ ವಿವಾದಿತ ಗೋಡೆ ಬರಹಗಳನ್ನು ಬರೆದವರ ವಿರುದ್ಧ ನಿರ್ದಾಕ್ಷಿಣ್ಯವಾಗಿ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಮಂಗಳೂರು ನಗರ ಪೊಲೀಸ್ ಆಯುಕ್ತ ವಿಕಾಸ್ ಕುಮಾರ್ ತಿಳಿಸಿದ್ದಾರೆ. ಈ ಕೃತ್ಯವನ್ನು ನಡೆಸಿದವರ ಬಗ್ಗೆ ಸಾರ್ವಜನಿಕರು ಮಾಹಿತಿ ಇದ್ದಲ್ಲಿ ಉಪ ಪೊಲೀಸ್ ಆಯುಕ್ತರು (9480802304/9480802305), ನಗರ ನಿಯಂತ್ರಣ ಕೊಠಡಿ (0824-2220800) ಅಥವಾ ಸಮೀಪದ ಠಾಣೆಗೆ ಮಾಹಿತಿ ತಿಳಿಸುವಂತೆ ಹೇಳಿದ್ದಾರೆ. ಈ ಬಗ್ಗೆ ಮಾಹಿತಿ ನೀಡಿದ ಬಗ್ಗೆಯೂ ಗೌಪ್ಯತೆ ಕಾಪಾಡಲಾಗುತ್ತದೆ ಎಂದು ತಿಳಿಸಿದ್ದಾರೆ.

ತನಿಖೆಗೆ ಈಗಾಗಲೇ ವಿಶೇಷ ತಂಡ ರಚನೆ: ಕದ್ರಿ ಸರ್ಕ್ಯೂಟ್ ರಸ್ತೆಯಲ್ಲಿನ ವಿವಾದಿತ ಗೋಡೆ ಬರಹ ಪ್ರಕರಣವನ್ನು ಕೇಂದ್ರ ಉಪವಿಭಾಗದ ಎಸಿಪಿ ನೇತೃತ್ವದ ತಂಡ, ಕದ್ರಿ ಠಾಣೆಯ ಪೊಲೀಸ್ ಇನ್​ಸ್ಪೆಕ್ಟರ್ ನೇತೃತ್ವದ ತಂಡ, ಸಿಸಿಬಿ ಇನ್​ಸ್ಪೆಕ್ಟರ್ ನೇತೃತ್ವದ 3 ಪ್ರತ್ಯೇಕ ಪೊಲೀಸ್ ತಂಡಗಳನ್ನು ತನಿಖೆಗೆ ನಿಯೋಜಿಸಲಾಗಿದೆ. ನ್ಯಾಯಾಲಯದ ಆವರಣದಲ್ಲಿನ ಗೋಡೆ ಬರಹಗಳ ಎರಡನೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂದರ್ ಠಾಣೆಯ ಇನ್​ಸ್ಪೆಕ್ಟರ್ ನೇತೃತ್ವದ ತಂಡ ತನಿಖೆ ನಡೆಸುತ್ತಿದೆ. ನಾಲ್ಕು ಪೊಲೀಸ್ ತಂಡಗಳು ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸಿ ಮಾಹಿತಿಯನ್ನು ಕಲೆ ಹಾಕುತ್ತಿದೆ.

15 ದಿನಗಳಲ್ಲಿ ಬಂಧನಕ್ಕೆ ಶಾಸಕ ಖಾದರ್ ಆಗ್ರಹ:ಉಗ್ರರಿಗೆ ಬೆಂಬಲವಾಗಿ ಬರೆದಿರುವ ಆರೋಪಿಗಳನ್ನು 15 ದಿನಗಳೊಳಗೆ ಬಂಧಿಸದಿದ್ದಲ್ಲಿ ಉಗ್ರ ಹೋರಾಟ ಮಾಡಲಾಗುತ್ತದೆ. ಗೋಡೆ ಬರಹಗಳ ಹಿಂದಿರುವವರು ಯಾರೆಂದು ಬಿಜೆಪಿ ಸರಕಾರ ಹಾಗೂ ಪೊಲೀಸರು ರಾಜ್ಯದ ಜನತೆಯ ಮುಂದೆ ಸ್ಪಷ್ಟ ಪಡಿಸಲಿ. ಇದಕ್ಕೆ ತಾರ್ಕಿಕ ಅಂತ್ಯ ನೀಡಲಿ ಎಂದು ಶಾಸಕ ಖಾದರ್ ಹೇಳಿದ್ದಾರೆ.