ಕೂಲಿಕಾರ ಆದ್ರೂ ದಾನ ಶೂರ... ಹಜ್ ಯಾತ್ರೆಗೆ ಕೂಡಿಟ್ಟ ಹಣವನ್ನು ಬಡವರಿಗಾಗಿ ಮೀಸಲಿಟ್ಟ ಕಾರ್ಮಿಕ

ಲಾಕ್​​ಡೌನ್ ಸಂದರ್ಭ ಅದೆಷ್ಟೋ ಶ್ರೀಮಂತರು, ಉಳ್ಳವರು ಬಡವರ ಕಷ್ಟಕಾರ್ಪಣ್ಯಗಳಿಗೆ ಮರುಗಿ ದಾನ ಧರ್ಮ ಮಾಡುತ್ತಿದ್ದಾರೆ. ಆದ್ರೆ ಇಲ್ಲೊಬ್ಬ ಕೂಲಿ ಕಾರ್ಮಿಕ ಪವಿತ್ರ ಹಜ್ ಯಾತ್ರೆಗಾಗಿ ಹಲವಾರು ವರ್ಷಗಳಿಂದ ಕೂಡಿಟ್ಟ ಹಣವನ್ನು ಹಸಿದ ಹೊಟ್ಟೆಗಳನ್ನು ತುಂಬಿಸುವುದಕ್ಕಾಗಿ ಮೀಸಲಿಟ್ಟು ಎಲ್ಲರ ಗಮನ ಸೆಳೆದಿದ್ದಾರೆ.

ಬಂಟ್ವಾಳ:ಕೂಲಿ ಕಾರ್ಮಿಕನೊಬ್ಬ ಪವಿತ್ರ ಹಜ್ ಯಾತ್ರೆಗಾಗಿ ಹಲವಾರು ವರ್ಷಗಳಿಂದ ಕೂಡಿಟ್ಟ ಹಣವನ್ನು ಹಸಿದ ಹೊಟ್ಟೆ ತುಂಬಿಸುವುದಕ್ಕಾಗಿ ಮೀಸಲಿಟ್ಟು ಮಾನವೀಯತೆ ಮೆರೆದಿದ್ದಾರೆ.

ಕೊರೊನಾ ತಂದ ಈ ಕರಾಳ ದಿನಗಳಲ್ಲಿ ಅದೆಷ್ಟೋ ಮಂದಿ ಸಂಕಷ್ಟಕ್ಕೀಡಾಗಿದ್ದು, ಒಂದಿಷ್ಟು ಮಂದಿ ಅವರ ನೆರವಿಗೆ ಮುಂದಾಗುತ್ತಿದ್ದಾರೆ. ಅದರಲ್ಲಿ ಒಬ್ಬರಾದ ಅಬ್ದುಲ್ ರಹಮಾನ್ ಎಂಬ ಕೂಲಿಕಾರ್ಮಿಕ ಮೂಲತಃ ಬಿ.ಸಿ.ರೋಡ್​ನ ಗೂಡಿನಬಳಿ ನಿವಾಸಿ. ಪತ್ನಿ ಬೀಡಿ ಕಟ್ಟಿ ತಾನು ಕೂಲಿ ಕೆಲಸ ಮಾಡಿ ಜೀವನ ನಡೆಸುತ್ತಿದ್ದರು.

ಪವಿತ್ರ ಮೆಕ್ಕಾ, ಮದೀನ ಯಾತ್ರೆ ಕೈಗೊಳ್ಳುವ ಉದ್ದೇಶದಿಂದ ಹಲವು ವರ್ಷಗಳಿಂದ ಹಣವನ್ನು ಕೂಡಿಡುತ್ತಾ ಬಂದಿದ್ದು, ಇದೀಗ ಬಡವರ ಸಂಕಷ್ಟಕ್ಕೆ ಈ ದಂಪತಿ ಮರುಗಿದ್ದಾರೆ. ಹೀಗಾಗಿ ಹಜ್ ಯಾತ್ರೆಗೆ ಕೂಡಿಟ್ಟ ಹಣದಿಂದ ಅಕ್ಕಿ ಸಹಿತ ಆಹಾರ ಸಾಮಗ್ರಿಗಳನ್ನು ಖರೀದಿಸಿ, ಸಂಕಷ್ಟದಲ್ಲಿರುವವರಿಗೆ ವಿತರಿಸಲು ಮುಂದಾಗಿದ್ದಾರೆ. ಬಡ/ಅಶಕ್ತ ಕುಟುಂಬಕ್ಕೆ ಹಜ್ ಹಣದಿಂದ ದಿನಸಿ ಸಾಮಾಗ್ರಿ ವಿತರಿಸುವ ವಿಚಾರವನ್ನು ಅವರ ಪುತ್ರ ಇಲ್ಯಾಸ್ ಗೂಡಿನಬಳಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡದ್ದು ಇದೀಗ ವೈರಲ್ ಆಗುತ್ತಿದೆ.