ಮಂಗಳೂರು: ಟರ್ನ್ ಮಾಡಲು ಹೋಗಿ ರೈಲ್ವೆ ಹಳಿಗೆ ಬಿದ್ದ ಕಂಟೈನರ್ ಲಾರಿ: ಗೂಡ್ಸ್ ರೈಲುಗಳ ನಿಲುಗಡೆ

ಮಂಗಳೂರಿನ ಬೈಕಂಪಾಡಿ ಇಂಡಸ್ಟ್ರಿಯಲ್ ಏರಿಯಾದ ಬಳಿಯ ರೈಲ್ವೆ ಹಳಿಯ ಮೇಲೆಯೇ ಕಂಟೈನರ್ ಉರುಳಿ ಬಿದ್ದಿದೆ.

ಮಂಗಳೂರು: ಕಂಟೈನರ್ ಲಾರಿಯೊಂದು ಟರ್ನ್ ಮಾಡಲು ಹೋಗಿ ರೈಲ್ವೆ ಹಳಿಯ ಮೇಲೆಯೇ ಬಿದ್ದ ಘಟನೆ ಗುರುವಾರ ರಾತ್ರಿ ನಡೆದಿದೆ. ರಾತ್ರಿ 8.30 ಸುಮಾರಿಗೆ ನಗರದ ಬೈಕಂಪಾಡಿ ಇಂಡಸ್ಟ್ರಿಯಲ್ ಏರಿಯಾ ಬಳಿ ಈ ಘಟನೆ ನಡೆದಿದೆ.

ಬೈಕಂಪಾಡಿ ಇಂಡಸ್ಟ್ರಿಯಲ್ ಏರಿಯಾದ ಜುಮ್ಮಾ ಮಸೀದಿ ಬಳಿಯ ಡೆಲಿವರಿ ಪಾರ್ಸೆಲ್ ಸಂಸ್ಥೆಗೆ ಸರಕುಗಳನ್ನು ಹೊತ್ತು ಕಂಟೈನರ್ ಲಾರಿ ಬಂದಿತ್ತು. ಲಾರಿಯಲ್ಲಿದ್ದ ಪಾರ್ಸೆಲ್​ಗಳನ್ನು ಖಾಲಿ ಮಾಡಲು ಕಂಟೈನರ್ ಲಾರಿಯನ್ನು ಚಾಲಕ ಟರ್ನ್ ಮಾಡುತ್ತಿದ್ದ ವೇಳೆ ಲಾರಿ ಆಯತಪ್ಪಿ ರೈಲ್ವೆ ಹಳಿಯ ಮೇಲೆಯೇ ಬಿದ್ದುಬಿಟ್ಟಿದೆ.

ಗೂಡ್ಸ್ ರೈಲು ಬರುವ ಮೊದಲು ರೈಲು ಹಳಿಯ ಮೇಲೆಯೇ ಕಂಟೈನರ್ ಲಾರಿ ಬಿದ್ದಿದ್ದು, ಈಗಾಗಲೇ ಈ ಹಳಿಯ ಮೂಲಕ ಬರುವ ಗೂಡ್ಸ್ ರೈಲುಗಳನ್ನು ನಿಲುಗಡೆ ಮಾಡಲಾಗಿದೆ‌. ಲಾರಿಯನ್ನು ಕ್ರೇನ್ ಮೂಲಕ ಮೇಲತ್ತುವ ಪ್ರಯತ್ನವನ್ನು ಮಾಡಲಾಗಿದೆ.

ಇದನ್ನೂ ಓದಿ:ಬೆಳಗಾವಿಯಲ್ಲಿ ಇಬ್ಬರು ಯುವಕರ ಡಬಲ್ ಮರ್ಡರ್