'ಮೋದಿ ಸರ್ಕಾರ ಏನೇ ಮಾಡಿದರೂ ವಿರೋಧಿಸುವುದು ಕಾಂಗ್ರೆಸ್​ನ ಚಾಳಿ'

ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರ ಕಳೆದ 100 ದಿನಗಳಲ್ಲಿ ಉತ್ತಮ ನಿರ್ಧಾರಗಳನ್ನು ಕೈಗೆತ್ತಿಕೊಂಡಿದೆ. 21ನೇ ಶತಮಾನ ಮೋದಿಯವರ ನೇತೃತ್ವದಲ್ಲಿ ಭಾರತದ ಶತಮಾನ ಆಗುತ್ತದೆ ಎಂದು ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಭರವಸೆ ನೀಡಿದರು.

ಮಂಗಳೂರು:ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರ ಕಳೆದ 100 ದಿನಗಳಲ್ಲಿ ಉತ್ತಮ ನಿರ್ಧಾರಗಳನ್ನು ಕೈಗೆತ್ತಿಕೊಂಡಿದೆ. 19ನೇ ಶತಮಾನ ಇಂಗ್ಲೆಂಡ್​​ನವರದಾಗಿತ್ತು, 20ನೇ ಶತಮಾನ ಅಮೆರಿಕಾದವರದಾಗಿತ್ತು, 21ನೇ ಶತಮಾನ ಮೋದಿಯವರ ನೇತೃತ್ವದಲ್ಲಿ ಭಾರತದ ಶತಮಾನ ಆಗುತ್ತದೆ ಎಂದು ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಹೇಳಿದರು.

ನಗರದ ಓಶಿಯನ್​ ಪರ್ಲ್​ ಹೋಟೆಲ್​ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಮೋದಿ ಸರ್ಕಾರ 370 ವಿಧಿ, ತ್ರಿವಳಿ ತಲಾಖ್ ರದ್ದು ಸೇರಿ ಏನೇ ಮಾಡಿದರೂ ವಿರೋಧ ಮಾಡುವಂತದ್ದು ರಾಹುಲ್ ಗಾಂಧಿ ಮತ್ತು ಸೋನಿಯಾ ಗಾಂಧಿಯವರಿಗೆ ಚಾಳಿ ಆಗಿದೆ ಎಂದು ವ್ಯಂಗ್ಯವಾಡಿದರು.

ಇನ್ನು ಕಾಶ್ಮೀರದಲ್ಲಿ ಆರು ಪೊಲೀಸ್ ಸ್ಟೇಷನ್ ಬಿಟ್ಟರೆ ಮತ್ಯಾವುದೇ ಪೊಲೀಸ್ ಸ್ಟೇಷನ್​​​ಗಳಲ್ಲಿ ಯಾವುದೇ ರೀತಿಯಾದಂತಹ 144 ಸೆಕ್ಷನ್ ಆಗಲಿ, ಕರ್ಫ್ಯೂ ಆಗಲಿ ಇಲ್ಲ. ಯಾರು ದೇಶದ್ರೋಹದ ಚಟುವಟಿಕೆಗಳಲ್ಲಿ ತೊಡಗಿರುತ್ತಾರೋ ಅವರನ್ನು ಭದ್ರತಾ ಪಡೆ ಹಿಡಿದು ಪಾಠ ಕಲಿಸುತ್ತಿದೆ. ಈ ಹಿಂದೆ 2008, 2009, 2011ರಲ್ಲಿ 365 ದಿನಗಳಲ್ಲಿ 200, 210,190,180 ದಿವಸಗಳ ಕಾಲ ಅಲ್ಲಿ ಕರ್ಫ್ಯೂ ಹಾಕಲಾಗಿತ್ತು. ಇವತ್ತು ಅಂತಹ ಪರಿಸ್ಥಿತಿ ಇಲ್ಲ ಎಂದರು.

ಕಾಶ್ಮೀರ ಪಾಕಿಸ್ತಾನಕ್ಕೆ ಸೇರಬೇಕು, ಸ್ವಾತಂತ್ರ್ಯ ಹೊಂದಬೇಕು ಅಂದವರಿಗೆ ಈ ಮೊದಲು ಭದ್ರತೆ ಕೊಡಲಾಗುತ್ತಿತ್ತು. ಅದನ್ನೆಲ್ಲ ನಾವು ತೆಗೆದು ಹಾಕಿದ್ದೇವೆ. ಅದಕ್ಕೆ ಕಾಶ್ಮೀರದಲ್ಲಿ ಗಲಭೆ ಎಬ್ಬಿಸುವ ಹುನ್ನಾರ ನಡೆಸಲಾಗುತ್ತಿದೆ. ಭಾರತದ ಸಂವಿಧಾನ, ಸಮಗ್ರತೆ, ಏಕತೆಯನ್ನು ಒಪ್ಪುವವರಿಗೆ ನಿಜವಾಗಿಯೂ ತೊಂದರೆಯಾದಲ್ಲಿ ಭಾರತ ಸರ್ಕಾರ ರಕ್ಷಣೆ ನೀಡುತ್ತದೆ ಎಂದು ಜೋಶಿ ಹೇಳಿದರು.

ಈ ಬಾರಿ ಮೋದಿ ಸರ್ಕಾರವು ರೈತರಿಗಾಗಿ 12 ಸಾವಿರ ಕೋಟಿ ರೂ. ಖರ್ಚು ಮಾಡುತ್ತಿದೆ. ಕಳೆದ 40 ವರ್ಷಗಳಿಂದ ಹೊಸ ಯುದ್ಧ ವಿಮಾನಗಳು ಖರೀದಿಯಾಗಿಲ್ಲ. ಮೋದಿ ಸರ್ಕಾರ ಹೊಸ ಹೆಲಿಕಾಪ್ಟರ್, ಬುಲೆಟ್ ಪ್ರೂಫ್ ಜಾಕೆಟ್ ಹಾಗೂ ಯುದ್ಧ ಸಂಬಂಧಿತ ಅನೇಕ ಶಸ್ತ್ರಾಸ್ತ್ರಗಳನ್ನು ಸೈನ್ಯಕ್ಕಾಗಿ ಖರೀದಿ ಮಾಡಿದೆ ಎಂದು ಸಚಿವರು ತಿಳಿಸಿದರು.

ಈ ಸಂದರ್ಭದಲ್ಲಿ ಶಾಸಕ ವೇದವ್ಯಾಸ ಕಾಮತ್, ಬಿಜೆಪಿ ಮುಖಂಡರಾದ ಪ್ರತಾಪ್ ಸಿಂಹ ನಾಯಕ್, ಗೋಪಾಲಕೃಷ್ಣ ಹೆರಳೆ, ರೆಡ್ ಕ್ರಾಸ್​ನ ಶಾಂತಾರಾಮ ಶೆಟ್ಟಿ ಉಪಸ್ಥಿತರಿದ್ದರು.