ಬೆಳ್ತಂಗಡಿ: ಬಾತ್​ ರೂಮ್​ ಒಳಗಿಂದ ಉರಗ ತಜ್ಞನ ಮೇಲೆಯೇ ಜಿಗಿದ ಕಾಳಿಂಗ ಸರ್ಪ!!

ಬೆಳ್ತಂಗಡಿಯ ಅಳದಂಗಡಿ ಕೆದ್ದುವಿ‌ನಲ್ಲಿನ ನಿವಾಸಿಯೋರ್ವರ ಬಾತ್ ​ರೂಮ್​​ನಲ್ಲಿ ಅವಿತುಕೊಂಡಿದ್ದ ಬರೋಬ್ಬರಿ 14 ಅಡಿ ಉದ್ದದ ಕಾಳಿಂಗ ಸರ್ಪವನ್ನು ಹಿಡಿದು ಕಾಡಿಗೆ ಬಿಡಲಾಗಿದೆ.

ಬೆಳ್ತಂಗಡಿ(ದಕ್ಷಿಣ ಕನ್ನಡ):ಸ್ನಾನಗೃಹದ ಒಳಗೆ ಅವಿತಿದ್ದ ಸುಮಾರು 14 ಅಡಿ ಉದ್ದದ ಕಾಳಿಂಗ ಸರ್ಪವನ್ನು ರಕ್ಷಿಸಿ ಕಾಡಿಗೆ ಬಿಟ್ಟಿರುವ ಘಟನೆ ಅಳದಂಗಡಿಯ ಕೆದ್ದುವಿ‌ನಲ್ಲಿ ನಡೆದಿದೆ.

ಅಳದಂಗಡಿ, ಕೆದ್ದು ನಿವಾಸಿ ಗೋಪಾಲಕೃಷ್ಣ ಭಟ್ ಎಂಬುವರ ಜಿಕೆ ಫಾರ್ಮ್ಸ್ ಮನೆಯ ಸ್ನಾನದ ಗೃಹದಲ್ಲಿ‌ ಕಾಳಿಂಗ ಸರ್ಪವೊಂದು ಅಡಗಿಕೊಂಡಿತ್ತು. ಇಂದು ಬೆಳಗ್ಗೆ ಮನೆಯವರು ಸ್ನಾನಗೃಹಕ್ಕೆ ಹೋದ ಸಮಯದಲ್ಲಿ ಶಬ್ದ ಕೇಳಿಸಿದೆ. ಬಳಿಕ ಪರಿಶೀಲನೆ ಮಾಡಿದಾಗ ಕಾಳಿಂಗ ಸರ್ಪ‌ ಇರುವುದು ಖಾತ್ರಿಯಾಗಿತ್ತು. ಕೂಡಲೇ ಲಾಯಿಲದ ಉರಗ ಪ್ರೇಮಿ, ಸ್ನೇಕ್ ಅಶೋಕ್​ಗೆ ಕರೆ ಮಾಡಿ ಮನೆಗೆ ಕರೆಸಿದ್ದರು.

ಅಶೋಕ್ ಸ್ನಾನಗೃಹದ ಬಳಿ ಬಾಗಿಲಿನಲ್ಲಿ ನಿಂತು ಕಾಳಿಂಗ ಸರ್ಪದ ರಕ್ಷಣಾ ಕಾರ್ಯದಲ್ಲಿ ತೊಡಗಿದ್ದರು. ಕಾಳಿಂಗದ ಬಾಲವನ್ನು ಹಿಡಿದು ಹೊರಗೆಳೆಯುವ ವೇಳೆ ಎತ್ತರಕ್ಕೆ ಜಿಗಿದು ದಾಳಿಗೆ ಮುಂದಾಗಿತ್ತು. ಇದರಿಂದ ಎಚ್ಚೆತ್ತ ಉರಗ ತಜ್ಞ ತನ್ನನ್ನು ‌ತಾನು ರಕ್ಷಿಸಿಕೊಂಡು ಕಾರ್ಯಾಚರಣೆ ನಡೆಸಿದರು. ಬಳಿಕ ಕಾಳಿಂಗ ಸರ್ಪವನ್ನು ರಕ್ಷಿಸಿ, ಸುರಕ್ಷಿತವಾಗಿ ಕಾಡಿಗೆ ಬಿಟ್ಟಿದ್ದಾರೆ.