ಶಿರಾದಲ್ಲಿ ಬಿಜೆಪಿ ಪರ ಸುನಾಮಿ ಅಂದವರು ಹುಚ್ಚಾಸ್ಪತ್ರೆಯಿಂದ ಬಂದವರು: ಕೆ.ಎನ್​.ರಾಜಣ್ಣ

ಸುನಾಮಿ ಎದ್ದಿದ್ದರೆ ವಿಜಯೇಂದ್ರ ಅವರು ಶಿರಾ ಪಟ್ಟಣದ ಕರೆಕಲ್ ಹಂಚಿನ‌ ಮನೆಯಲ್ಲಿ ಏಕೆ ವಾಸವಿರಬೇಕು. ಶಿರಾದಲ್ಲಿ ಬಿಜೆಪಿ ಪರ‌ ಯಾವುದೇ ಸುನಾಮಿಯಿಲ್ಲ..

ಚಿತ್ರದುರ್ಗ: ಶಿರಾ ಮತ ಕ್ಷೇತ್ರದಲ್ಲಿ ಬಿಜೆಪಿ ಪರ ಯಾವುದೇ ಸುನಾಮಿ ಎದ್ದಿಲ್ಲ. ಹೀಗೆ ಹೇಳಿದವರು ಹುಚ್ಚಾಸ್ಪತ್ರೆಯಿಂದ ಬಂದವರು ಎಂದು ಬಿ.ವೈ.ವಿಜಯೇಂದ್ರಗೆ ಮಾಜಿ ಶಾಸಕ ಕೆ.ಎನ್​.ರಾಜಣ್ಣ ಟಾಂಗ್‌ ನೀಡಿದ್ದಾರೆ.

ಇಂದು ಮಾಜಿ ಶಾಸಕ ಕೆ ಎನ್​ ರಾಜಣ್ಣ ಚಿತ್ರದುರ್ಗದ ಯಾದವನಂದ ಮಠಕ್ಕೆ ಭೇಟಿ ನೀಡಿದರು. ಬಳಿಕ ಮಾತನಾಡಿದ ಅವರು, ’’ಶಿರಾ ಮತ‌ಕ್ಷೇತ್ರದಲ್ಲಿ ಬಿಜೆಪಿ ಪರ ಸುನಾಮಿ ಎದ್ದಿದೆ. ಅಲ್ಲಿನ ಜನರ ಒಲುವು ಬಿಜೆಪಿ ಪರ ಇದೆ ಎಂಬ ಬಿ.ವೈ.ವಿಜಯೇಂದ್ರ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿ, ಹುಚ್ಚಾಸ್ಪತ್ರೆಯಿಂದ ಬಂದವರು ಈ ರೀತಿ ಮಾತನಾಡುತ್ತಾರೆ.

ಸುನಾಮಿ ಎದ್ದಿದ್ದರೆ ವಿಜಯೇಂದ್ರ ಅವರು ಶಿರಾ ಪಟ್ಟಣದ ಕರೆಕಲ್ ಹಂಚಿನ‌ ಮನೆಯಲ್ಲಿ ಏಕೆ ವಾಸವಿರಬೇಕು. ಶಿರಾದಲ್ಲಿ ಬಿಜೆಪಿ ಪರ‌ ಯಾವುದೇ ಸುನಾಮಿಯಿಲ್ಲ ಎಂದರು. ಈ ಉಪ‌ ಚುನಾವಣೆಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಟಿ.ಬಿ.ಜಯಚಂದ್ರ ಗೆಲುವು ಸಾಧಿಸುತ್ತಾರೆ.

ಕಾಂಗ್ರೆಸ್ ಪಕ್ಷ ಅಭಿವೃದ್ಧಿಯ ಕೆಲಸಗಳನ್ನು ಮಾಡಿದೆ. ಆದರೆ, ಬಿಜೆಪಿ ಸರ್ಕಾರ ಬಂದು ವರ್ಷಗಳೇ ಉರುಳಿವೆ. ಒಂದಾದರೂ ಜನಪರ ಕಾರ್ಯಕ್ರಮಗಳನ್ನು ಮಾಡಿದ್ದಾರಾ ಎಂದು ಎದೆ ಮುಟ್ಟಿಕೊಂಡು ಹೇಳಲಿ‌ ಎಂದು ಇದೇ ವೇಳೆ ಸವಾಲು ಹಾಕಿದರು.