ಲಾಕ್​ಡೌನ್​ ನಡುವೆಯೂ ಟೂರ್​... ಚಿಕ್ಕಮಗಳೂರಿನಲ್ಲಿ ಕಂದಕಕ್ಕೆ ಉರುಳಿದ ಪ್ರವಾಸಿಗರ ಜೀಪ್​​

ಕೊಪ್ಪ ತಾಲೂಕಿನ ಬಸರೀಕಟ್ಟೆಯ ಸಮೀಪವಿರುವ ಕ್ಯಾತನ ಮಕ್ಕಿ ಗ್ರಾಮದ ಬಳಿ ಪ್ರವಾಸಿಗರ ಜೀಪ್ ಆಕಸ್ಮಿಕವಾಗಿ ಉರುಳಿ 300 ಅಡಿ ಕಂದಕಕ್ಕೆ ಬಿದ್ದಿದೆ.

ಚಿಕ್ಕಮಗಳೂರು: ಜಿಲ್ಲೆಯಲ್ಲಿ ಪ್ರವಾಸಿಗರ ಜೀಪ್​ವೊಂದು ಆಕಸ್ಮಿಕವಾಗಿ 300 ಅಡಿ ಆಳದ ಕಂದಕಕ್ಕೆ ಬಿದ್ದಿದ್ದು, ಅದೃಷ್ಟವಶಾತ್​ ಅವಘಡ ಜರುಗಿದ ಸಮಯದಲ್ಲಿ ಜೀಪ್​​ನಲ್ಲಿ ಯಾರೂ ಇರಲಿಲ್ಲ.

ಜಿಲ್ಲೆಯ ಕೊಪ್ಪ ತಾಲೂಕಿನ ಬಸರೀಕಟ್ಟೆಯ ಸಮೀಪವಿರುವ ಕ್ಯಾತನ ಮಕ್ಕಿ ಗ್ರಾಮದ ಬಳಿ ಈ ಘಟನೆ ನಡೆದಿದ್ದು, ಶೃಂಗೇರಿ ಮೂಲದ ಪ್ರವಾಸಿಗರು ಕ್ಯಾತನ ಮಕ್ಕಿಗೆ ಬಂದಿದ್ದರು. ಜೀಪ್ ನಿಲ್ಲಿಸಿ ಪ್ರಕೃತಿ ಸೌಂದರ್ಯವನ್ನು ಸವಿಯಲು ಕೆಳಗೆ ಇಳಿದಾಗ ಜೀಪ್​​ನ ಗೇರ್ ಸ್ಲಿಪ್ ಆಗಿ ಈ ಘಟನೆ ನಡೆದಿದೆ.

ಇನ್ನು ಈ ಜೀಪ್​ನಲ್ಲಿ ಸುಮಾರು ಐದು ಜನರು ಬಂದಿದ್ದರು ಎನ್ನಲಾಗಿದೆ. ಅದೃಷ್ಟವಶಾತ್​​ ಯಾರಿಗೂ ಯಾವುದೇ ಅನಾಹುತ ಆಗದೇ ಎಲ್ಲರ ಪ್ರಾಣ ಉಳಿದಿದೆ. ಕೊರೊನಾ ವೈರಸ್ ಭೀತಿಯಿಂದ ಪ್ರವಾಸಿಗರಿಗೆ ಪ್ರವಾಸಿ ತಾಣಗಳಿಗೆ ಹೋಗಲು ಅವಕಾಶವಿಲ್ಲ ಆದರೂ ಇವರು ಹೇಗೆ ಬಂದರು ಎಂಬ ಪ್ರಶ್ನೆ ಕಾಡುತ್ತಿದೆ.

ಇನ್ನು ಜಯಪುರ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿ ಈ ಕುರಿತು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.