ಪ್ರವಾಸಿಗರಿಲ್ಲದೆ ಮಂಕಾದ ತಾಣಗಳು... ಹೋಂ​ ಸ್ಟೇ, ರೆಸಾರ್ಟ್​​ಗಳೂ ಖಾಲಿ ಖಾಲಿ..!

ಕೊರೊನಾದಿಂದಾಗಿ ಪ್ರವಾಸಿ ತಾಣಗಳು ಇನ್ನೂ ಚೇತರಿಕೆ ಕಂಡಿಲ್ಲ. ಹೊಸ ವರ್ಷಾಚರಣೆಯ ಸಮಯದಲ್ಲೂ ಇಲ್ಲಿನ ಬಹುತೇಕ ಹೋಮ್ ಸ್ಟೇ, ರೆಸಾರ್ಟ್​​​​ಗಳು ಖಾಲಿಯಾಗಿದ್ದು, ಪ್ರವಾಸಿಗರ ಕೊರತೆ ಎದುರಿಸುತ್ತಿವೆ. ಪ್ರಮುಖ ಪ್ರವಾಸಿ ತಾಣಗಳು ಜನರಿಲ್ಲದೆ ಬಿಕೋ ಎನ್ನುತ್ತಿವೆ.

ಚಿಕ್ಕಮಗಳೂರು: ಹೊಸ ವರ್ಷಾಚರಣೆ ಹಿನ್ನೆಲೆಯಲ್ಲಿ ಇಲ್ಲಿನ ಪ್ರಮುಖ ಪ್ರವಾಸಿ ತಾಣಗಳು ತುಂಬಿ ತುಳುಕುತ್ತಿದ್ದವು. ಆದರೆ ಈ ಬಾರಿ ಕೊರೊನಾದಿಂದಾಗಿ ಸಂಭ್ರಮಾಚರಣೆಗೆ ಕೊಕ್ಕೆ ಬಿದ್ದಿದೆ.

ಇಲ್ಲಿನ ಮುಳ್ಳಯ್ಯನಗಿರಿ, ಕಲ್ಲತ್ತಿಗಿರಿ, ಕೆಮ್ಮಣ್ಣುಗುಂಡಿ ತಾಣಗಳು ಪ್ರವಾಸಿಗರ ಹಾಟ್​​ಸ್ಪಾಟ್​ ಎನಿಸಿಕೊಂಡಿವೆ. ಹೊಸ ವರ್ಷದ ಸಮಯದಲ್ಲಿ ಈ ಪ್ರವಾಸಿ ತಾಣಗಳು ಜನರಿಂದ ತುಂಬಿರುತ್ತಿದ್ದವು. ಕಣ್ಣು ಹಾಯಿಸಿದಲ್ಲೆಲ್ಲ ಪ್ರವಾಸಿಗರ ದಂಡು ಪ್ರಕೃತಿಯ ನಡುವೆ ವಿಹರಿಸುತ್ತಿತ್ತು. ಆದರೆ ಈ ಬಾರಿ ಎಲ್ಲಾ ಪ್ರವಾಸಿ ತಾಣಗಳು ಜನರಿಲ್ಲದೆ ಭಣಗುಡುತ್ತಿವೆ.

ಇದಷ್ಟೇ ಅಲ್ಲದೆ ಪ್ರವಾಸಿಗರಿಂದಲೇ ತುಂಬಿರುತ್ತಿದ್ದ ಹೋಮ್​​ ಸ್ಟೇ, ರೆಸಾರ್ಟ್​​, ಲಾಡ್ಜ್​​​​ಗಳು ಈ ಬಾರಿ ಖಾಲಿಯಾಗಿವೆ. ಕೆಲವೇ ಕೆಲವು ಹೋಮ್ ಸ್ಟೇಗಳು ಭರ್ತಿಯಾಗಿದ್ದು, ಇನ್ನುಳಿದವು ಪ್ರವಾಸಿಗರಿಲ್ಲದೆ ಮಂಕಾಗಿವೆ.

ಜಿಲ್ಲೆಯಲ್ಲಿ 400ಕ್ಕೂ ಹೆಚ್ಚು ಹೋಮ್ ಸ್ಟೇಗಳಿದ್ದು, ಹೊಸ ವರ್ಷದಲ್ಲಿ ತಿಂಗಳಿಗೂ ಮೊದಲೇ ಬುಕ್ಕಿಂಗ್ ಆಗಿರುತ್ತಿದ್ದವು. ಆದರೆ ಈ ವರ್ಷ ಮಾತ್ರ ಖಾಲಿ ಹೊಡೆಯುತ್ತಿವೆ.

ಇದನ್ನೂ ಓದಿ:ವಾಣಿಜ್ಯ ನಗರಿಯಲ್ಲಿ‌ ಹೊಸ ವರ್ಷ ಸಂಭ್ರಮಾಚರಣೆಗೆ ಕೋವಿಡ್​ ತಣ್ಣೀರು