'ಸಿದ್ದರಾಮಯ್ಯ ರಾಜೀನಾಮೆಯಿಂದ ಕಾಂಗ್ರೆಸ್​ನಲ್ಲಿ ಹಲವರಿಗೆ ಸಂತೋಷವಾಗಿದೆ'

ವಿಧಾನಸಭೆ ವಿಪಕ್ಷ ಸ್ಥಾನಕ್ಕೆ ಸಿದ್ದರಾಮಯ್ಯ ನೀಡಿರುವ ರಾಜೀನಾಮೆಯಿಂದ ಕಾಂಗ್ರೆಸ್​ನಲ್ಲಿ ಹಲವರಿಗೆ ಸಂತೋಷವಾಗಿದೆ. ಅವರು ರಾಜಕೀಯದಿಂದ ನಿವೃತ್ತಿಯಾಗಲಿ ಅಂತ ನಾವೆಂದೂ ಬಯಸೋದಿಲ್ಲ. ನಮಗೆ ಅವರ ಮಾರ್ಗದರ್ಶನ ಬೇಕು. ಸೋಲಿನ ಬಗ್ಗೆ ಕಾಂಗ್ರೆಸ್​ ಅವಲೋಕನ ಮಾಡಿಕೊಳ್ಳಲು ಇದು ಸೂಕ್ತ ಸಂದರ್ಭ ಎಂದು ಸಚಿವ ಸಿ.ಟಿ ರವಿ ಹೇಳಿದ್ದಾರೆ.

ಚಿಕ್ಕಮಗಳೂರು: ಕಾಂಗ್ರೆಸ್‌ನ ಹಿರಿಯ ಹಿರಿಯ ಮುಖಂಡ ಮಲ್ಲಿಕಾರ್ಜುನ ಖರ್ಗೆ 9ನೇ ತಾರೀಖು(ಉಪಚುನಾವಣೆ ಫಲಿತಾಂಶದ ದಿನ) ಸಿಹಿ ಸುದ್ದಿ ನೀಡುತ್ತೇನೆ ಎಂದು ಹೇಳಿದ್ದರು. ಈಗ ಸಿದ್ದರಾಮಯ್ಯ ಹಾಗೂ ದಿನೇಶ್ ಗುಂಡೂರಾವ್ ರಾಜೀನಾಮೆ ಖರ್ಗೆಯಂತವರಿಗೆ ಸಿಹಿ ಸುದ್ದಿಯೇ ಆಗಿರಬೇಕು ಎಂದು ಸಚಿವ ಸಿ.ಟಿ ರವಿ ಕಾಲೆಳೆದರು.

ಚಿಕ್ಕಮಗಳೂರಿನ ದತ್ತಪೀಠದಲ್ಲಿ ಮಾತನಾಡಿದ ಸಚಿವರು, ಕಾಂಗ್ರೆಸ್​ನ ಹಿರಿಯ ನಾಯಕರುಗಳಿಗೆ ಆಕ್ರೋಶ, ಅಸಮಾಧಾನ, ಅಸಹನೆ ಇತ್ತು. ಈಗ ಅದಕ್ಕೆ ಸ್ಪಂದನೆ ಸಿಕ್ಕಿದೆ. ಇದರಿಂದ ನಮಗೇನೂ ಆಗಬೇಕಾಗಿಲ್ಲ. ಸಿದ್ದರಾಮಯ್ಯ ಸವಾಲಾಗಿ ಸ್ವೀಕರಿಸಿದ ಉಪ ಚುನಾವಣೆಯಲ್ಲಿ 12 ಶಾಸಕರು ಹಾಗು ಒಬ್ಬ ಬಂಡಾಯ ಶಾಸಕರನ್ನು ಜನರು ಬಿಜೆಪಿಗೆ ನೀಡಿದ್ದಾರೆ. ಒಟ್ಟು ಶೇ 50ರಷ್ಟು ಮತ ಪ್ರಮಾಣ ಬಿಜೆಪಿಗೆ ಸಿಕ್ಕಿದೆ. ಸಿದ್ದರಾಮಯ್ಯ ಅವರ ರಾಜೀನಾಮೆಯಿಂದ ಅಥವಾ ಅವರು ಅಧಿಕಾರದಲ್ಲಿ ಮುಂದುವರೆಯೋದ್ರಿಂದ ಬಿಜೆಪಿ ಮೇಲೆ ಯಾವುದೇ ರೀತಿಯ ಪರಿಣಾಮವಿಲ್ಲ ಎಂದರು.

ಖಾತೆ ಹಂಚಿಕೆ ವಿಚಾರವಾಗಿ ಪ್ರತಿಕ್ರಿಯಿಸುತ್ತಾ, ಯಾರಿಗೆ ಯಾವ ಖಾತೆ ನೀಡಬೇಕು ಎಂಬುದು ಮಖ್ಯಮಂತ್ರಿ ಹಾಗೂ ವರಿಷ್ಠರ ವಿವೇಚನೆಗೆ ಬಿಟ್ಟ ವಿಚಾರ. ಸಚಿವರಾಗೋದು ಜನರ ಕಲ್ಯಾಣಕ್ಕಾಗಿ. ಪಕ್ಷದ ಹಿತಾಸಕ್ತಿಯನ್ನು ಎಂದಿಗೂ ಮರೆಯಬಾರದು ಎಂದು ಕಿವಿಮಾತು ಹೇಳಿದ್ರು.

ಚಿಕ್ಕಬಳ್ಳಾಪುರದಲ್ಲಿ ನಾವು ಅಂದುಕೊಂಡಂತೆ ಆಗಿದೆ. ನಮಗೆ ಸ್ವಲ್ಪ ಮತಗಳು ಕಡಿಮೆ ಬಂದಿವೆ. ನಾವು ಯೋಜನಾ ಬದ್ದವಾಗಿ ಕೆಲಸ ಮಾಡಿದ್ದೇವೆ. ಸುಧಾಕರ್ ಅವರ ಹೆಸರು ಕೆಟ್ಟಿರಲಿಲ್ಲ. ನಮ್ಮ ಕೆಲಸದ ಶೈಲಿ ಸುಧಾಕರ್ ಅವರಿಗೆ ಗೊತ್ತಿರಲಿಲ್ಲ. ಅವರಿಗೆ ಇದ್ದಂತಹ ಆತಂಕ ದೂರವಾಗಿದೆ. ಮಂಡ್ಯದಲ್ಲಿ ಖಾತೆ ತೆರೆದಿರೋದು ನಮ್ಮ ಶಕ್ತಿಯನ್ನು ಮತ್ತಷ್ಟು ಹೆಚ್ಚಿಸಿದೆ ಎಂದು ಸಂತಸ ವ್ಯಕ್ತಪಡಿಸಿದ್ರು.