BJP ನಾಯಕರ ನೇತೃತ್ವದಲ್ಲಿ Covid ಮೃತದೇಹಗಳ ಚಿತಾಭಸ್ಮ ವಿಸರ್ಜನೆ

ಲಾಕ್​​ಡೌನ್ ಜಾರಿಯಾಗಿದ್ದ ಹಿನ್ನೆಲೆ ಸ್ಮಶಾನದಲ್ಲೇ ಉಳಿದಿದ್ದ ಕೋವಿಡ್ ಮೃತದೇಹಗಳ ಅಸ್ಥಿಯನ್ನ ಭದ್ರಾ ನದಿಯಲ್ಲಿ ವಿಸರ್ಜಿಸಲಾಗಿದೆ. 45 ಮೃತದೇಹಗಳ ಚಿತಾಭಸ್ಮವನ್ನು ಬಿಜೆಪಿ ಮುಖಂಡರು ವಿಸರ್ಜಿಸಿ ಮಾನವೀಯತೆ ಮೆರೆದಿದ್ದಾರೆ.

ಚಿಕ್ಕಮಗಳೂರು: ಜಿಲ್ಲೆಯಲ್ಲಿ ಕೋವಿಡ್​ ಮೃತದೇಹಗಳ ಅಂತ್ಯಸಂಸ್ಕಾರದ ಬಳಿಕ ಅಸ್ಥಿ ವಿಸರ್ಜನಾ ಕಾರ್ಯ ಅಂತಿಮವಾಗಿರಲಿಲ್ಲ. ಈ ಹಿನ್ನೆಲೆ ಬಿಜೆಪಿ ಮುಖಂಡರ ನೇತೃತ್ವದಲ್ಲಿ ಸಂಪ್ರದಾಯ ಬದ್ಧವಾಗಿ ಅಸ್ಥಿ ವಿಸರ್ಜನೆ ನೆರವೇರಿಸಲಾಗಿದೆ.

ಈ ಹಿಂದೆ ಕೊರೊನಾದಿಂದ ಮೃತಪಟ್ಟವರ ಅಸ್ಥಿ ವಿಸರ್ಜನೆಗೆ ಲಾಕ್​​ಡೌನ್​ ನಿಯಮ ಅಡ್ಡಿಯಾಗಿತ್ತು. ಅಲ್ಲದೇ ಕೆಲ ಅನಾಥ ಶವಗಳ ಅಸ್ಥಿ ಸೇರಿದಂತೆ, ಕುಟುಂಬಸ್ಥರು ಅಲ್ಲಿಯೇ ಬಿಟ್ಟು ಹೋಗಿದ್ದ ಅಸ್ಥಿಗಳನ್ನೂ ಸಹ ಭದ್ರಾ ನದಿಯಲ್ಲಿ ವಿಸರ್ಜಿಸಲಾಗಿದೆ. ಒಟ್ಟ 45 ಮೃತದೇಹಗಳ ಚಿತಾಭಸ್ಮವನ್ನು ಜಿಲ್ಲೆಯ ಎನ್​ಆರ್​ ಪುರ ತಾಲೂಕಿನ ಖಾಂಡ್ಯ ಬಳಿಯ ಭದ್ರಾ ನದಿಯಲ್ಲಿ ವಿಸರ್ಜಿಸಲಾಗಿದೆ.

ಇದಕ್ಕೂ ಮೊದಲು ಖಾಂಡ್ಯ ಸಮೀಪದ ಮಾರ್ಕಂಡೇಶ್ವರ ದೇವಾಲಯ ಸಮೀಪ ಚಿತಾಭಸ್ಮಗಳಿಗೆ ಶಾಸ್ತ್ರೋಕ್ತವಾಗಿ ಅಂತಿಮ ವಿಧಿ ವಿಧಾನ ನೆರವೇರಿಸಲಾಯಿತು. ಈ ವೇಳೆ, ಸಂಸದೆ ಶೋಭಾ ಕರಂದ್ಲಾಜೆ, ಬಿಜೆಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ ರವಿ ಸೇರಿ ಇತರ ಮುಖಂಡರು ಭಾಗಿಯಾಗಿದ್ದರು.