ಚಿಕ್ಕಮಗಳೂರು:ಸಾವಿರಾರು ರೂಪಾಯಿ ಖರ್ಚು ಮಾಡಿ ಟೊಮೇಟೊ ಬೆಳೆದು ಮಾರುಕಟ್ಟೆಗೆ ತಂದರೆ ಅಲ್ಲಿ ಖರೀದಿಸುವ ವ್ಯಾಪಾರಿಗಳೇ ಇಲ್ಲ ಎಂದು ರೈತನೋರ್ವ ಮೂರು ಟನ್ ಟೊಮೇಟೊ ಕೆರೆಯ ಬದಿಗೆ ತಂದು ಸುರಿದಿರುವ ಘಟನೆ ಚಿಕ್ಕಮಗಳೂರು ಜಿಲ್ಲೆಯಲ್ಲಿ ನಡೆದಿದೆ.
ಮೂರು ಟನ್ ಟೊಮೇಟೊ ರಸ್ತೆಗೆ ಸುರಿದ ರೈತ
ಜಿಲ್ಲೆಯ ಕಡೂರು ತಾಲೂಕಿನ ಮಚ್ಚೇರಿ ಗ್ರಾಮದ ಎಂ.ಹೆಚ್.ರವಿ ಮುಕ್ಕಾಲು ಎಕರೆ ಜಮೀನಿನಲ್ಲಿ 4 ಸಾವಿರ ಟೊಮೇಟೊ ಗಿಡ ಹಾಕಿದ್ದರು. ಸಮೃದ್ಧವಾಗಿ ಬೆಳೆ ಬಂದು ಟೊಮೇಟೊ ಹಣ್ಣುಗಳು ಕೊಯ್ಲಿಗೆ ಬಂದಾಗ ಮೊದಲ ಸುತ್ತಿನ ಕೊಯ್ಲಿಗೆ ಮೂರು ಟನ್ಗಳಷ್ಟು ಇಳುವರಿ ಸಿಕ್ಕಾಗ ಸಹಜವಾಗಿಯೇ ಸಂತಸಗೊಂಡ ರವಿ ಹಣ್ಣಿನ ಕ್ರೇಟ್ಗಳನ್ನು ಕಡೂರು ಎಪಿಎಂಸಿಗೆ ಕೊಂಡೊಯ್ದರು. ಆದರೆ, ಖರೀದಿಸುವ ವರ್ತಕರೇ ಬಂದಿರಲಿಲ್ಲ. ಇದರಿಂದ ಬೇಸತ್ತ ರೈತ ರವಿ ಸುಮಾರು 250 ಕ್ರೇಟ್ಗಳಷ್ಟು ಟೊಮೇಟೊ ರಸ್ತೆ ಬದಿಗೆ ಸುರಿದು ಹೋಗಿದ್ದಾರೆ.