ಕೊರೊನಾದಿಂದ ಹೆಚ್ಚಾಯ್ತಾ ಆರೋಗ್ಯ ಕಾಳಜಿ ?: ಚಿಕ್ಕಬಳ್ಳಾಪುರ ತಜ್ಞ ವೈದ್ಯರು ಹೇಳೋದೇನು..?

ಕೊರೊನಾ ಸಾಕಷ್ಟು ಅವಾಂತರ ಸೃಷ್ಟಿ ಮಾಡಿದೆ. ಅವಾಂತರಗಳ ಸೃಷ್ಟಿ ಮಾಡೋದರ ಜೊತೆಗೆ ಅನೇಕ ಕಾಯಿಲೆಗಳನ್ನು ದೂರ ಮಾಡಿದೆ. ಇದು ತಜ್ಞವೈದ್ಯರೇ ಹೇಳುವ ಮಾತುಗಳಾಗಿದ್ದು, ಈ ಕುರಿತು ಕುತೂಹಲಕಾರಿ ಮಾಹಿತಿ ಇಲ್ಲಿದೆ.

ಚಿಕ್ಕಬಳ್ಳಾಪುರ: 2020ನೇ ವರ್ಷ ಬಹುತೇಕ ಕೊರೊನಾದಿಂದಲೇ ಮುಗಿಯುತ್ತೇನೋ ಎಂಬ ಅನಿಸಿಕೆ ಜನರಲ್ಲಿದೆ. ಜನರಲ್ಲಿ ನಡುಕ ಹುಟ್ಟಿಸಿದ್ದ ಈ ಸೋಂಕು ಅವರಿಗೆ ಆರೋಗ್ಯ ಪಾಠವನ್ನೂ ಮಾಡಿದೆ. ಸೋಂಕು ಹರಡುವಿಕೆ ಜನರನ್ನು ಆಗಾಗ ಆಸ್ಪತ್ರೆಗಳಿಗೆ ಎಡತಾಕೋದನ್ನು ತಪ್ಪಿಸಿದೆ.

ಇದರ ಜೊತೆಗೆ ಸಣ್ಣ ಪುಟ್ಟ ನೆಗಡಿ, ತಲೆನೋವು, ಜ್ವರ, ಚಿಕೂನ್ ಗುನ್ಯಾ ಅಂತ ಹೇಳ್ಕೊಂಡು ಆಸ್ಪತ್ರೆಗೆ ಬರೋರ ಸಂಖ್ಯೆಯೂ ಕಡಿಮೆಯಾಗಿತ್ತು. ಲಾಕ್​ಡೌನ್ ಇದ್ದ ಕಾರಣದಿಂದ ಕೆಲವರಿಗೆ ಮನೆಯಲ್ಲೇ ಉಪಚಾರ ಮಾಡಿದ್ದು ಎಲ್ಲ ಕಾಯಿಲೆಗಳು ದೂರವಾಗಿವೆ ಅನ್ನೋದು ಚಿಕ್ಕಬಳ್ಳಾಪುರ ಜಿಲ್ಲಾಸ್ಪತ್ರೆಯ ಸರ್ಜನ್​ ರಮೇಶ್ ಅಭಿಪ್ರಾಯವಾಗಿದೆ.

ಕೋವಿಡ್ ವಿಚಾರಕ್ಕೆ ಬರುವುದಾದರೆ ಚಿಕ್ಕಬಳ್ಳಾಪುರದಲ್ಲಿ ಆಶಾದಾಯಕ ವಾತಾವರಣ ನಿರ್ಮಾಣವಾಗಿದೆ. ಜಿಲ್ಲೆಯ ಸರ್ಕಾರಿ ಕೋವಿಡ್ ಕೇರ್ ಸೆಂಟರ್​ನಲ್ಲಿ ಸೋಂಕಿನಿಂದ ಗುಣಮುಖರಾಗುವವರ ಸಂಖ್ಯೆ ಹೆಚ್ಚಾಗ್ತಿದೆ. ಖಾಸಗಿ ಆಸ್ಪತ್ರೆಗಳಲ್ಲಿ ಸರಿಯಾದ ಚಿಕಿತ್ಸೆ ದೊರಕದೇ ಸರ್ಕಾರಿ ಕೋವಿಡ್ ಸೆಂಟರ್ ಬಂದು ಗುಣಮುಖರಾದವರು ಕೂಡಾ ಇದ್ದು, ಸರ್ಕಾರಿ ಆಸ್ಪತ್ರೆಗಳ ಮೇಲೆ ನಂಬಿಕೆ ಹೆಚ್ಚಿಸಿದೆ

ಲಾಕ್​ಡೌನ್ ಸಡಿಲಿಕೆಯಾದ ಮೇಲೆ ಹೊರರೋಗಿಗಳ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. ಇದರಿಂದಾಗಿ ಸಾಮಾಜಿಕ ಅಂತರ, ಸ್ವಚ್ಛತೆ ಕಾಪಾಡಿಕೊಳ್ಳೋದ್ರಿಂದ ಹಾಗೂ ಪೌಷ್ಟಿಕ ಆಹಾರ ಸೇವನೆ ಮಾಡೋದರಿಂದ ರೋಗಗಳನ್ನು ಹತೋಟಿಗೆ ತರಬಹುದಾಗಿದೆ ಅನ್ನೋದು ವೈದ್ಯರ ಅಭಿಮತವಾಗಿದೆ.