ಬಂಡೀಪುರ ಸಫಾರಿಗೆ ಬಂದವರಿಗೆ ಹಬ್ಬವೋ ಹಬ್ಬ: 3 ದಿನಗಳಿಂದ ವ್ಯಾಘ್ರನ ದರ್ಶನ!

ಹುಲಿಯೊಂದು ಯಾವುದೇ ಭಯ, ಅಳುಕಿಲ್ಲದೇ ಸಫಾರಿಗೆ ಬಂದ ಪ್ರವಾಸಿಗರಿಗೆ ದರ್ಶನ ನೀಡಿ ಪುಳಕಿತಗೊಳಿಸುತ್ತಿದ್ದು ಅಂದಿನ ಪ್ರಿನ್ಸ್​ನ್ನು ಮತ್ತೆ ನೆನಪಿಸುತ್ತಿದ್ದಾನೆ.

ಚಾಮರಾಜನಗರ:ವೀಕೆಂಡ್ ಬಂತೆಂದರೆ ಟೆಕ್ಕಿಗಳಿಗೆ, ಪಿಕ್​ನಿಕ್ ಲಹರಿಯಲ್ಲಿರುವವರಿಗೆ ಬಂಡೀಪುರ ನೆನಪಾಗುವುದು ಸಾಮಾನ್ಯ. ಆದರೆ, ಸಫಾರಿಗೆ ಬಂದ ಪ್ರವಾಸಿಗರಿಗೆ ಹುಲಿ ದರ್ಶನ ಕಳೆದ 2-3 ತಿಂಗಳಿನಿಂದ ಅಪರೂಪವೇ ಆಗಿದ್ದನ್ನು ಈಗ ಇಲ್ಲಿನ ವ್ಯಾಘ್ರ ಸರಿದೂಗಿಸಿದ್ದಾನೆ.

ಹೌದು, ಸುಂದರಿ ಎಂದು ಕೆಲ ಛಾಯಾಚಿತ್ರಗಾರರು ಹೆಸರಿಟ್ಟಿರುವ ಹುಲಿಯೊಂದು ಯಾವುದೇ ಭಯ, ಅಳುಕಿಲ್ಲದೇ ಸಫಾರಿಗೆ ಬಂದ ಪ್ರವಾಸಿಗರಿಗೆ ದರ್ಶನ ನೀಡಿ ಪುಳಕಿತಗೊಳಿಸುತ್ತಿದ್ದು ಅಂದಿನ ಪ್ರಿನ್ಸ್​ನ್ನು ಮತ್ತೆ ನೆನಪಿಸುತ್ತಿದ್ದಾನೆ.

ಸಾವಿರಾರು ರುಪಾಯಿ ಹಣ ತೆತ್ತು ಸಫಾರಿಗೆ ತೆರಳಿದರೂ ಕಳೆದ 3-4 ತಿಂಗಳಿನಿಂದ ಕೆಲವೊಮ್ಮೆ ಆನೆಯೂ ಸಿಗುತ್ತಿರಲಿಲ್ಲ. ಹುಲಿಯಂತೂ ಕಾಣುವುದು ದೂರದ ಮಾತೇ ಆಗಿತ್ತು. ಕಳೆದ 3 ದಿನಗಳಿಂದ ಬಾರ್ಡರ್ ಲೈನ್, ಬೋಳಗುಡ್ಡ, ಕೆಂಪನಕಟ್ಟೆ ಕ್ಯಾಂಪ್ ಬಳಿ ಹುಲಿ ಕಾಣಿಸಿಕೊಂಡು ಪ್ರವಾಸಿಗರಿಗೆ ಸಖತ್ ಮುದ ನೀಡುತ್ತಿದ್ದಾನೆ.

ಶುಕ್ರವಾರ ಬೆಳಗ್ಗೆ , ಶನಿವಾರ ಬೆಳಗ್ಗೆ- ಸಂಜೆ‌ ಹಾಗೂ ಇಂದು ಸಂಜೆಯೂ ಕೂಡ ವ್ಯಾನ್ ಸೇರಿದಂತೆ 6-7 ವಾಹನಗಳಿಗೆ ದರ್ಶನ ನೀಡಿದ್ದು ಸಫಾರಿಪ್ರಿಯರಲ್ಲಿ ಸಂತಸ ಉಂಟು ಮಾಡಿದೆ.