ದೀಪಾವಳಿ ಬಳಿಕ ಧನುರ್ಮಾಸದ ದಾಖಲೆ ಮುರಿದ ಮಹದೇಶ್ವರ: ಸಂಗ್ರಹವಾಗಿದೆಷ್ಟು ಗೊತ್ತೇ?

ಪ್ರಸಿದ್ಧ ಯಾತ್ರಾ ಕ್ಷೇತ್ರವಾದ ಮಲೆಮಹದೇಶ್ವರನ ಬೆಟ್ಟದಲ್ಲಿನ ಹುಂಡಿಯ ಹಣ ವಿಶೇಷಾಚರಣೆಗಳ ಹಿಂದಿನ ದಾಖಲೆಗಳನ್ನು ಈ ವರ್ಷ ಸರಿಗಟ್ಟಿದೆ.

ಚಾಮರಾಜನಗರ:ಪವಿತ್ರಯಾತ್ರಾ ಕ್ಷೇತ್ರವಾದ ಮಲೆಮಹದೇಶ್ವರನ ಬೆಟ್ಟದಲ್ಲಿನ ಹುಂಡಿ ಎಣಿಕೆ ಆದಾಯ ವಿಶೇಷಾಚರಣೆಗಳ ಹಿಂದಿನ ದಾಖಲೆಗಳನ್ನು ಸರಿಗಟ್ಟಿದೆ.

ಶುಕ್ರವಾರ ನಡೆದ ಹುಂಡಿ‌ ಎಣಿಕೆಯಲ್ಲಿ ಬರೋಬ್ಬರಿ ₹ 1,88,21,108 ಸಂಗ್ರಹವಾಗಿದ್ದು, ಧನುರ್ಮಾಸ ಅವಧಿಯಲ್ಲಿ ಸಂಗ್ರಹಗೊಂಡ ಅತ್ಯಧಿಕ ಮೊತ್ತ ಇದಾಗಿದೆ ಎಂದು ಮಲೆಮಹದೇಶ್ವರ ಬೆಟ್ಟ ಅಭಿವೃದ್ಧಿ ಪ್ರಾಧಿಕಾರದ ಕಾರ್ಯದರ್ಶಿ ಜೈವಿಭವಸ್ವಾಮಿ ತಿಳಿಸಿದ್ದಾರೆ.

ಕಳೆದ ದೀಪಾವಳಿ ಜಾತ್ರೆ ಬಳಿಕ ನಡೆದ ಹುಂಡಿ ಎಣಿಕೆ ವೇಳೆಯಲ್ಲೂ ₹ 1.71 ಕೋಟಿ ಸಂಗ್ರಹವಾಗಿ ಅತ್ಯಧಿಕ ಹಣ ಸಂಗ್ರಹವಾಗಿತ್ತು. ಈಗ ಧನುರ್ಮಾಸದ ಅತ್ಯಧಿಕ ಮೊತ್ತ ಸಂಗ್ರಹವಾಗಿದೆ.

ಇನ್ನು, 48 ಗ್ರಾಂ ಚಿನ್ನ ಹಾಗೂ 1,800 ಗ್ರಾಂ. ಬೆಳ್ಳಿ ಕಾಣಿಕೆ ರೂಪದಲ್ಲಿ ಭಕ್ತರು ದೇವರಿಗೆ ಸಮರ್ಪಿಸಿದ್ದು, ನೂತನ ವರ್ಷಾರಂಭಕ್ಕೆ ದೂರದೂರುಗಳಿಂದ ಜನಸಾಗರವೇ ಹರಿದುಬರಲಿದೆ.