ಮಾದಪ್ಪನ ದೇಗುಲಕ್ಕೆ 'ಕೊರೊನಾ' ಬೀಗ: ನೆರೆ ರಾಜ್ಯಕ್ಕೆ ತೆರಳಲು ಪರದಾಡಿದ ಭಕ್ತರು

ದೇಶದಲ್ಲಿ ಕೊರೊನಾ ಹಾವಳಿ ಹೆಚ್ಚಾಗಿದ್ದು, ತಮಿಳುನಾಡು ಮತ್ತು ಕರ್ನಾಟಕ ಗಡಿಯಲ್ಲಿ ಬಸ್​ ಸಂಚಾರ ಸ್ಥಗಿತಗೊಳಿಸಿಲಾಗಿದೆ. ಮಲೆ ಮಾಹಾದೇಶ್ವರ ದೇವಸ್ಥಾನಕ್ಕೆ ಬೀಗ ಹಾಕಿದ ಹಿನ್ನೆಲೆ ಬೆಟ್ಟಕ್ಕೆ ಬಂದ ನೆರೆ ರಾಜ್ಯದ ಭಕ್ತರು ಬಸ್​ ಇಲ್ಲದೆ ಪರದಾಡುವಂತಾಗಿದೆ.

ಚಾಮರಾಜನಗರ:ಕೊರೊನಾ ಭೀತಿಯಿಂದ ದೇಶದಲ್ಲಿ ಕಟ್ಟೆಚ್ಚರ ವಹಿಸಿದ್ದು, ಕರ್ನಾಟಕ-ತಮಿಳುನಾಡು ಗಡಿಯಲ್ಲಿ ಬಸ್​ ಸಂಚಾರ ಸ್ಥಗಿತಗೊಳಿಸಿದ ಹಿನ್ನೆಲೆ ಮಲೆಮಹದೇಶ್ವರ ಬೆಟ್ಟಕ್ಕೆ ಬಂದ ನೆರೆ ರಾಜ್ಯದ ಭಕ್ತರು ಪರದಾಡುವಂತಾಗಿದೆ.

ಪ್ರಸಿದ್ಧ ತೀರ್ಥ ಕ್ಷೇತ್ರವಾದ ಹನೂರು ತಾಲೂಕಿನ ಮಲೆಮಹದೇಶ್ವರ ಬೆಟ್ಟಕ್ಕೆ ಭಕ್ತರನ್ನು ನಿರ್ಬಂಧಿಸಿ ಬೀಗ ಹಾಕಲಾಗಿದ್ದು, ದೇಗುಲದ ಒಳಾವರಣದಲ್ಲಿ ಎಂದಿನಂತೆ ಪೂಜೆ-ಪುನಸ್ಕಾರ ನಡೆದಿದೆ. ಪುಣಜನೂರಿನ ತಮಿಳುನಾಡು ಗಡಿಯಲ್ಲಿ ತಮಿಳುನಾಡು ಸರ್ಕಾರವು ಸಾರಿಗೆ ವ್ಯವಸ್ಥೆ ಸ್ಥಗಿತಗೊಳಿಸಿರುವುದರಿಂದ ವಾಹನಗಳ ಓಡಾಟ ವಿರಳವಾಗಿ ರಸ್ತೆಗಳು ಬಿಕೋ ಎನ್ನುತ್ತಿವೆ‌. ಬಂಡೀಪುರ, ಮೂಳೆಹೊಳೆ ಭಾಗದಲ್ಲಿ ವಾಹನಗಳು ಅತೀ ವಿರಳವಾಗಿದ್ದವು.

ಬೆಟ್ಟಕ್ಕೆ ಬಂದಿದ್ದ ಭಕ್ತರನ್ನು ಕೌದಳ್ಳಿ ಮತ್ತು ಪಾಲಾರ್​​ನಲ್ಲೇ ತಡೆದು ಹಿಂದಕ್ಕೆ ಕಳುಹಿಸಲಾಗುತ್ತಿದೆ. ಇನ್ನು, ಅಂತರ್​ ರಾಜ್ಯ ಸರ್ಕಾರಿ, ಖಾಸಗಿ ಬಸ್​ಗಳನ್ನು ಸ್ಥಗಿತಗೊಳಿಸಿರುವುದರಿಂದ ನೆರೆ ರಾಜ್ಯಕ್ಕೆ ತೆರಳಬೇಕಾದ ಜನರು ಪರದಾಡಿದರು. ತಾಳವಾಡಿಗೆ ತೆರಳಬೇಕಾದವರು ರಾಜ್ಯದ ಗಡಿವರೆಗೆ ಸಾರಿಗೆ ಸಂಸ್ಥೆ ಬಸ್​ನಲ್ಲಿ ತೆರಳಿ ಅಲ್ಲಿಂದ ಸತ್ಯಮಂಗಲಂ, ಕೊಯಮತ್ತೂರಿಗೆ ತೆರಳಬೇಕಾದವರು ಪಡಿಪಾಟಲು ಪಟ್ಟರು.