ನಿರ್ಗತಿಕ ಕುಟುಂಬಕ್ಕೆ ಲಾಕ್​ಡೌನ್​ ಬರೆ: ಮಂಕಾಗಿದೆ ಮಕ್ಕಳ ಭವಿಷ್ಯ

ಎರಡು ವರ್ಷಗಳ ಹಿಂದೆ ಮೈಸೂರಿನಿಂದ ಚಾಮರಾಜನಗರ ಜಿಲ್ಲೆಯ ಕೊಳ್ಳೇಗಾಲ ತಾಲೂಕಿನ ಸತ್ತೇಗಾಲ ಗ್ರಾಮಕ್ಕೆ ಕೂಲಿ ಅರಸಿ ಬಂದ ಕುಟುಂಬಕ್ಕೆ ಲಾಕ್​ಡೌನ್​ನಿಂದಾಗಿ ಸಂಕಷ್ಟ ಎದುರಾಗಿದೆ. ಸರ್ಕಾರ ತಮ್ಮ ನೆರವಿಗೆ ಧಾವಿಸಬೇಕಿದೆ ಎಂದು ಈ ಕುಟುಂಬ ಮನವಿ ಮಾಡಿದೆ.

ಕೊಳ್ಳೇಗಾಲ(ಚಾಮರಾಜನಗರ): ಕೂಲಿ ಅರಸಿ ನಾಲ್ಕು ಮಕ್ಕಳು, ಹೆಂಡತಿಯೊಂದಿಗೆ ಬಂದ ಮೈಸೂರು ಜಿಲ್ಲೆಯಲ್ಲಿಂದ ಬಂದ ವ್ಯಕ್ತಿಯ ಕುಟುಂಬವೊಂದು ಲಾಕ್​ಡೌನ್​ನಿಂದಾಗಿ ಬೀದಿಗೆ ಬಿದ್ದಿದೆ. ಇತ್ತ ಸೂರು ಇಲ್ಲದೇ, ಅತ್ತ ಉದ್ಯೋಗವೂ ಇಲ್ಲದೇ ಅಕ್ಷರಶಃ ಕಂಗಾಲಾಗಿದೆ.

ಎರಡು ವರ್ಷಗಳಿಂದ ತಾಲೂಕಿನ ಸತ್ತೇಗಾಲ ಗ್ರಾಮ ಪಂಚಾಯತ್​ನಲ್ಲಿ ದಿನಗೂಲಿ ಕೆಲಸ ಮಾಡಿಕೊಂಡಿದ್ದ ರಾಜು ಕುಟುಂಬ, ಗ್ರಾಮದ ಬಸ್​ ನಿಲ್ದಾಣದಲ್ಲಿ ವಾಸವಾಗಿತ್ತು. ಮೈಸೂರಿನ ನರಸೀಪುರದಿಂದ ಬಂದ ಈ ಕುಟುಂಬಕ್ಕೆ ಸೂರಿನ ಅವಶ್ಯಕತೆ ಇದೆ. ಸರ್ಕಾರ ಕಷ್ಟಕ್ಕೆ ಸ್ಪಂದಿಸಬೇಕಿದೆ ರಾಜು ಬೇಡಿಕೊಂಡಿದ್ದಾನೆ.

ಪತ್ನಿ ಸೇರಿದಂತೆ ನಾಲ್ಕು ಮಕ್ಕಳ ಭವಿಷ್ಯ ನೋಡಿಕೊಳ್ಳಬೇಕಿದೆ. ಜೀವನ ನಿರ್ವಹಣೆ ತುಂಬ ಕಷ್ಟವಾಗಿದೆ. ಕೂಡಲೇ ಸರ್ಕಾರ ಸೂರಿನ ವ್ಯವಸ್ಥೆ ಕಲ್ಪಿಸಬೇಕು ಎಂದು ಕೂಲಿ ಕಾರ್ಮಿಕ ರಾಜು ಮೊರೆಯಿಟ್ಟಿದ್ದಾನೆ.