ಪತ್ರಕರ್ತರ ಸಂಘಕ್ಕೆ ಸೇರಿದ ಭೂಮಿ ಅರಣ್ಯ ಇಲಾಖೆ ಒತ್ತುವರಿ: ತೆರವಿಗೆ ಶಾಸಕರ ಸೂಚನೆ

ಪತ್ರಕರ್ತರ ಭವನ ನಿರ್ಮಾಣ ಕಾಮಗಾರಿಗೆ ಶಾಸಕರ ಅನುದಾನ‌ ಬಿಡುಗಡೆ ಮಾಡಿ, ಅಧಿವೇಶನ‌ ಮುಗಿದ ಕೂಡಲೇ ಸ್ವತಃ ನಾನೇ‌ ಕಾಮಗಾರಿ ಚಾಲನೆಗೆ ಭೂಮಿ‌ಪೂಜೆ‌ ನೆರವೇರಿಸುತ್ತೇನೆ ಎಂದು ಎನ್.‌ಮಹೇಶ್ ತಿಳಿಸಿದ್ದಾರೆ.

ಕೊಳ್ಳೇಗಾಲ (ಚಾಮರಾಜನಗರ): ನಗರದ ಮರಡಿಗುಡ್ಡ ಹಿಂಭಾಗದಲ್ಲಿರುವ ಪತ್ರಕರ್ತರ ಸಂಘದ ಕಟ್ಟಡ ನಿರ್ಮಾಣಕ್ಕಿದ್ದ 10 ಸೆಂಟ್ ಕಂದಾಯ ಭೂಮಿಯಾದ ಖಾಲಿ ನಿವೇಶನವನ್ನು ಏಕಾಏಕಿ ಅರಣ್ಯ ಇಲಾಖೆ ಒತ್ತುವರಿ ಮಾಡಿದೆ ಎಂದು ಪತ್ರಕರ್ತರು ದೂರು‌ ನೀಡಿದ್ದರು. ಈ ಹಿನ್ನೆಲೆ ಶಾಸಕ ಎನ್.ಮಹೇಶ್ ನೇತೃತ್ವದಲ್ಲಿ ಅರಣ್ಯ ಇಲಾಖೆಯಲ್ಲಿ ಒತ್ತುವರಿ ವಿಚಾರವಾಗಿ ಸಭೆ ನಡೆಸಲಾಯಿತು.

ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ‌ ಅಧ್ಯಕ್ಷ ನಟರಾಜು‌ ಮಾತನಾಡಿ, ನಗರದ ಮರಡಿಗುಡ್ಡ ಹಿಂಭಾಗವಿರುವ 10 ಸೆಂಟ್ ಕಂದಾಯ ನಿವೇಶನ 2012ರಲ್ಲಿ ಪತ್ರಕರ್ತರ ಭವನಕ್ಕೆ ಜಿಲ್ಲಾಧಿಕಾರಿಯಿಂದ ಮಂಜೂರಾಗಿತ್ತು. ಆದರೆ ಇದೀಗ ಅರಣ್ಯ ಇಲಾಖೆ ನಮ್ಮ ಜಾಗಕ್ಕೆ ಬೇಲಿ ಹಾಕಿ ಒತ್ತುವರಿ ಮಾಡಿಕೊಂಡಿದೆ. ವಿಚಾರ ತಿಳಿದು ಪತ್ರಕರ್ತರ ಸಂಘದ ಜಾಗ ಇದು ಎಂದು ಬೋರ್ಡ್​ ಬರೆಯಲಾಗಿತ್ತು. ಆದರೆ ಆ ಬೋರ್ಡ್​ಗೆ ಬಣ್ಣ ಬಳಿಯಲಾಗಿದೆ ಎಂದರು.

ಚರ್ಚೆಯ ಬಳಿಕ ಮಾತನಾಡಿದ ಶಾಸಕ ಎನ್.ಮಹೇಶ್, ಪತ್ರಕರ್ತರಿಗೆ ಮಂಜೂರಾದ ನಿವೇಶನಕ್ಕೆ ಹೇಗೆ ಬೇಲಿ ಹಾಕಿ ಒತ್ತುವರಿ ಮಾಡಿದ್ದೀರಿ?, ಡಿಎಫ್​​ಒ​​ಗೆ ಪ್ರಶ್ನಿಸಿ, ನಿಮ್ಮ ಜಾಗವೆಂಬ ಆಧಾರವಿದ್ದರೆ ರೆಕಾರ್ಡ್ ತೋರಿಸಿ ಎಂದು ತಾಕೀತು ಮಾಡಿದರು.

2012ರಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಜಿಲ್ಲಾಧಿಕಾರಿ ಸಂಘಕ್ಕೆ ನಿವೇಶನ ನೀಡಿದ್ದ ಆದೇಶವನ್ನೇ ಕಡೆಗಣಿಸಿದ್ದೀರಿ ಏಕೆ?. ಸಂಘದ ಆಸ್ತಿಯನ್ನು ಒತ್ತುವರಿ ಮಾಡಿಕೊಳ್ಳಲು ನಿಮಗೆ ಏನು ಅಧಿಕಾರವಿದೆ ಎಂದು ಡಿಎಫ್​ಒಗೆ ಜಿಲ್ಲಾಧಿಕಾರಿ ಎಂ.ಆರ್​ ರವಿ ತರಾಟೆಗೆ ತೆಗೆದುಕೊಂಡರು.

ನಂತರ ಅಕ್ರಮವಾಗಿ ಒತ್ತುವರಿಯಾಗಿರುವ ಜಾಗವನ್ನು ಖುದ್ದು ಶಾಸಕರು ಅಧಿಕಾರಿಗಳ ಜೊತೆ ವೀಕ್ಷಣೆ‌ ಮಾಡಿ, ಅರಣ್ಯ ‌ಅಧಿಕಾರಿಗಳಿಗೆ ಕೂಡಲೇ ಒತ್ತುವರಿ ಜಾಗವನ್ನು ತೆರವುಗೊಳಿಸಿ ಪತ್ರಕರ್ತರಿಗೆ ಭವನ ಕಟ್ಟಿಕೊಳ್ಳಲು ಅವಕಾಶ ನೀಡಿ ಎಂದು ಸೂಚನೆ ನೀಡಿದರು.

ಅಲ್ಲದೆ ಪತ್ರಕರ್ತರ ಭವನ ನಿರ್ಮಾಣ ಕಾಮಗಾರಿಗೆ ಶಾಸಕರ ಅನುದಾನ‌ ಬಿಡುಗಡೆ ಮಾಡಿ, ಅಧಿವೇಶನ‌ ಮುಗಿದ ಕೂಡಲೇ ಸ್ವತಃ ನಾನೇ‌ ಕಾಮಗಾರಿ ಚಾಲನೆಗೆ ಭೂಮಿ‌ಪೂಜೆ‌ ನೆರವೇರಿಸುತ್ತೇನೆ ಎಂದು ಎನ್.‌ಮಹೇಶ್ ತಿಳಿಸಿದ್ದಾರೆ.

ಇದನ್ನೂ ಓದಿ:ಡಿನೋಟಿಫಿಕೇಷನ್‌ ಪ್ರಕರಣ.. ಬಿಎಸ್​ವೈ, ನಿರಾಣಿ ಬಂಧಿಸದಂತೆ ಸೂಚನೆ ನೀಡಿದ 'ಸುಪ್ರೀಂ'..