ಚಾಮರಾಜನಗರ: 3 ಜಿಂಕೆ ಬೇಟೆಯಾಡಿ ಮಾಂಸ ಹಂಚಿಕೊಳ್ಳುವಾಗ ಐವರ ಬಂಧನ

ಹನೂರು ತಾಲೂಕಿನ‌ ಉದ್ದನೂರು ಗ್ರಾಮದ ತೋಟದ ಮನೆಯಲ್ಲಿ ಜಿಂಕೆ ಮಾಂಸವನ್ನು ಪಾಲು ಮಾಡಿಕೊಳ್ಳುತ್ತಿದ್ದ ಐವರು ಆರೋಪಿಗಳನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಬಂಧಿಸಿದ್ದಾರೆ.

ಚಾಮರಾಜನಗರ: ರಾತ್ರಿ ವೇಳೆ 3 ಜಿಂಕೆಗಳನ್ನು ಬೇಟೆಯಾಡಿ ಮಾಂಸವನ್ನು ಪಾಲು ಮಾಡಿಕೊಳ್ಳುತ್ತಿದ್ದ ಐವರು ಬೇಟೆಗಾರರನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಬಂಧಿಸಿದ್ದಾರೆ. ಹನೂರು ತಾಲೂಕಿನ‌ ಉದ್ದನೂರು ಗ್ರಾಮದ ತೋಟದ ಮನೆಯಲ್ಲಿ ಈ ಘಟನೆ ನಡೆದಿದೆ. ಲಕ್ಷ್ಮಣ (55), ಮುತ್ತಪ್ಪ(40), ಮುತ್ತುರಾಜ್(35), ಪೆರಿಯಣ್ಣ(23) ಹಾಗೂ ಗೋವಿಂದರಾಜು(27) ಬಂಧಿತ ಆರೋಪಿಗಳು. ಸತೀಶ್ ಎಂಬಾತ ತಲೆ ಮರೆಸಿಕೊಂಡಿದ್ದಾನೆ‌ ಎನ್ನಲಾಗ್ತಿದೆ.

ಮಲೆಮಹದೇಶ್ವರ ವನ್ಯಜೀವಿಧಾಮದ ಹನೂರು ಗಸ್ತಿನ ಬೆಳ್ಳತ್ತೂರು ಗುಡ್ಡ ಕಾಡಿನಲ್ಲಿ ಈ ಆರು ಮಂದಿ ನಾಡ ಬಂದೂಕಿನಿಂದ 3 ಜಿಂಕೆಗಳನ್ನು ಬೇಟೆಯಾಡಿ ತೋಟದ ಮನೆಗೆ ತಂದು ಪಾಲು ಹಾಕುತ್ತಿದ್ದರು. ಈ ವೇಳೆ ಅರಣ್ಯಾಧಿಕಾರಿಗಳು ದಾಳಿ ನಡೆಸಿದ್ದಾರೆ ಎಂದು ತಿಳಿದು ಬಂದಿದೆ. ಬಂಧಿತರಿಂದ ಜಿಂಕೆ ಮಾಂಸ, ಚರ್ಮ, 2 ಬೈಕ್ ಹಾಗೂ 2 ನಾಡ ಬಂದೂಕುಗಳನ್ನು ವಶಪಡಿಸಿಕೊಂಡಿದ್ದಾರೆ. ಸದ್ಯ ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಜಿಂಕೆ ಬೇಟೆ ಚಾಮರಾಜನಗರದಲ್ಲಿ ಐವರ ಬಂಧನ