ಬಸ್​ ಓಡಿಸುವಾಗಲೇ ಮೂರ್ಛೆ ಹೋದ ಚಾಲಕ, ಜಮೀನಿಗಿಳಿದ ಬಸ್​... ಮುಂದೇನಾಯ್ತು?

ಯಳಂದೂರು ತಾಲೂಕಿನ ಯರಿಯೂರು ಹಾಗೂ ಮದ್ದೂರು ರಸ್ತೆ ನಡುವೆ ಈ ಅನಾಹುತ ಸಂಭವಿಸಿದೆ.ಘಟನೆಯಲ್ಲಿ ಪ್ರಯಾಣಿಕರಿಗೆ ಯಾವುದೇ ಸಾವು-ನೋವು ಉಂಟಾಗಿಲ್ಲ.

ಚಾಮರಾಜನಗರ:ಬಸ್​ ಸಂಚಾರ ಮಾಡುತ್ತಿದ್ದ ವೇಳೆ ಚಾಲಕ ಮೂರ್ಛೆ ಹೋದ ಪರಿಣಾಮ ನಿಯಂತ್ರಣ ತಪ್ಪಿದ ಬಸ್ ಜಮೀನಿಗಿಳಿದಿದೆ. ಅದೃಷ್ಟವಶಾತ್​ ಯಾವುದೇ ಅನಾಹುತ ಸಂಭವಿಸಿಲ್ಲ.

ಬಸ್​ ಓಡಿಸುತ್ತಿದ್ದ ಚಾಲಕನಿಗೆ ಮೂರ್ಛೆ

ಯಳಂದೂರು ತಾಲೂಕಿನ ಯರಿಯೂರು ಹಾಗೂ ಮದ್ದೂರು ರಸ್ತೆ ನಡುವೆ ಈ ಅನಾಹುತ ಸಂಭವಿಸಿದೆ. ಕೊಳ್ಳೇಗಾಲದಿಂದ ಚಾಮರಾಜನಗರಕ್ಕೆ ಈ ಸಾರಿಗೆ ಬಸ್​ ಬರುತ್ತಿತ್ತು. ಈ ವೇಳೆ ಬಸ್​ನ ಚಾಲಕ ಎಂ.ಎನ್‌.ಯಾಲಕ್ಕಿ ಎಂಬವರಿಗೆ ಮೂರ್ಛೆ ಬಂದಿದೆ. ನಂತರ ನಿಯಂತ್ರಣ ಕಳೆದುಕೊಂಡ ಬಸ್, ಜಮೀನಿಗೆ ನುಗ್ಗಿದೆ. 10 ಅಡಿ ಆಳಕ್ಕೆ ಇಳಿದರೂ ಬಸ್ ಪಲ್ಟಿಯಾಗದಿದ್ದರಿಂದ ದೊಡ್ಡ ದುರಂತ ತಪ್ಪಿದಂತಾಗಿದೆ.

ಬಸ್​ನಲ್ಲಿ 28 ಪ್ರಯಾಣಿಕರು ಇದ್ದರೆಂದು ತಿಳಿದುಬಂದಿದ್ದು, ಓರ್ವ ಮಹಿಳೆಗೆ ಮಾತ್ರ ಸಣ್ಣ ಪುಟ್ಟ ಗಾಯವಾಗಿವೆ. ಚಾಲಕನನ್ನು ಚಾಮರಾಜನಗರ ಜಿಲ್ಲಾಸ್ಪತ್ರೆಗೆ ರವಾನಿಸಲಾಗಿದೆ. ಯಳಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.