ಚಾಮರಾಜನಗರದಲ್ಲಿಂದು ಇಬ್ಬರಿಗೆ ಕೊರೊನಾ​... ಸೋಂಕಿತರ ಸಂಖ್ಯೆ 11ಕ್ಕೆ ಏರಿಕೆ

ಚಾಮರಾಜನಗರ ಜಿಲ್ಲೆಯ ಕೊಳ್ಳೇಗಾಲದ ಕೆಎಸ್​ಆರ್​ಟಿಸಿ ಬಸ್ ಚಾಲಕ ಹಾಗೂ ಗುಂಡ್ಲುಪೇಟೆಯ ಕನಕದಾಸನಗರದ ಓರ್ವ ವ್ಯಕ್ತಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ಈ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 11ಕ್ಕೆ ಏರಿಕೆಯಾಗಿದೆ.

ಚಾಮರಾಜನಗರ: ಜಿಲ್ಲೆಯಲ್ಲಿ ಕೊರೊನಾ ಸಂಖ್ಯೆ 11ಕ್ಕೇರಿದ್ದು, ಗುಂಡ್ಲುಪೇಟೆಯ ಕನಕದಾಸನಗರ (11ನೇ ವಾರ್ಡ್​) ಓರ್ವನಿಗೆ ಹಾಗೂ ಕೊಳ್ಳೇಗಾಲದ ಕೆಎಸ್​ಆರ್​ಟಿಸಿ ಬಸ್ ಕಂಡಕ್ಟರ್ ಕಂ ಡ್ರೈವರ್​ಗೆ ವೈರಸ್ ತಗುಲಿದೆ.

ಈ ಕುರಿತು ಈಟಿವಿ ಭಾರತಕ್ಕೆ ಉನ್ನತ ಮೂಲಗಳು ಖಚಿತಪಡಿಸಿದ್ದು, ಕೊಳ್ಳೇಗಾಲದ ಮಂಜುನಾಥ್ ನಗರದ ಬಸ್ ಚಾಲಕನಿಗೆ ವೈರಸ್ ತಗುಲಿದೆ. ಈತ ಕೊಳ್ಳೇಗಾಲ-ಬೆಂಗಳೂರು ಮಾರ್ಗದ ಬಸ್ ಚಲಾಯಿಸುತ್ತಿದ್ದರು ಎಂದು ತಿಳಿದುಬಂದಿದೆ‌.‌ ಸದ್ಯ, ಇಂದು ಕೂಡ ಅವರು ಬೆಂಗಳೂರಿಗೆ ಕರ್ತವ್ಯ ನಿರ್ವಹಿಸಿದ್ದು, ಅವರು ಬರುವುದನ್ನು ಕಾಯಲಾಗುತ್ತಿದೆ‌. ಇನ್ನು ಮಂಜುನಾಥ ನಗರವನ್ನು ಸೀಲ್​ಡೌನ್ ಮಾಡಲಾಗಿದ್ದು ಕೊಳ್ಳೇಗಾಲದ ಜನರಲ್ಲಿ ಆತಂಕ ಮೂಡಿಸಿದೆ.

ಇನ್ನು, ಗುಂಡ್ಲುಪೇಟೆಯ ಕನಕದಾಸನಗರದಲ್ಲಿ ಓರ್ವನಿಗೆ ಕೊರೊನಾ ತಗುಲಿದ್ದು, ಈ ಮೂಲಕ ಗುಂಡ್ಲುಪೇಟೆ ಒಂದರಲ್ಲೇ ಪ್ರಕರಣಗಳ ಸಂಖ್ಯೆ 7ಕ್ಕೇರಿದೆ. ಇವರಲ್ಲಿ , ಮೂವರು ಚಾಲಕರು, ಚಾಲಕನೋರ್ವನ ಪತ್ನಿ, ಇಬ್ಬರು ಬೀಡಿಕಟ್ಟುವ ಮಹಿಳೆಯರು ಹಾಗೂ ಇಂದು ಓರ್ವನಿಗೆ ಕೊರೊನಾ ತಗುಲಿಕೊಂಡಿದೆ.

ಚಾಮರಾಜನಗರದಲ್ಲಿ ಪೊಲೀಸ್ ಕಾನ್ಸ್‌ಟೇಬಲ್, ಭೂಮಾಪಕಿ, ಕೊಳ್ಳೇಗಾಲದಲ್ಲಿ ಕಂಡಕ್ಟರ್ ಹಾಗೂ ಗುಂಡ್ಲುಪೇಟೆಯಲ್ಲಿ 7 ಮಂದಿ ಸೇರಿದಂತೆ ಸಕ್ರಿಯ ಪ್ರಕರಣಗಳ ಸಂಖ್ಯೆ 10ಕ್ಕೇರಿದೆ, ಒಟ್ಟು 11 ಪ್ರಕರಣಗಳಾಗಿದೆ.