ಯಾರಿಗೂ ಆತಂಕಬೇಡ... 'ಉಯಿಲನತ್ತದಲ್ಲಿ ಯುವತಿ ಮೃತಪಟ್ಟಿದ್ದು ಚಿಕೂನ್ ಗುನ್ಯಾದಿಂದಲ್ಲ'

ಉಯಿಲನತ್ತದಲ್ಲಿ ಚಿಕೂನ್ ಗುನ್ಯಾ ಜ್ವರ ಕಾಡುತ್ತಿದೆ. ಆದರೆ, ಇಲ್ಲಿ ಯುವತಿ ಮೃತಪಟ್ಟಿರುವುದು ಜ್ವರದಿಂದಲ್ಲ, ಎದೆ ನೋವಿನಿಂದ. ಗ್ರಾಮಸ್ಥರು ಆತಂಕಕ್ಕೆ ಒಳಗಾಗಬೇಡಿ ಎಂದು ಡಿಹೆಚ್ಒ ಡಾ. ಎಂ.ಸಿ‌.ರವಿ ಸ್ಪಷ್ಟಪಡಿಸಿದ್ದಾರೆ.

ಚಾಮರಾಜನಗರ:ಒಂದೂವರೆ ತಿಂಗಳಿನಿಂದ ವಿಚಿತ್ರ ಜ್ವರಕ್ಕೆ ಉಯಿಲನತ್ತ ಗ್ರಾಮದ 20ಕ್ಕೂ ಹೆಚ್ಚು ಮಂದಿ ಬಳಲುತ್ತಿರುವುದು ಚಿಕೂನ್ ಗುನ್ಯಾದಿಂದ ಎಂದು ದೃಢಪಟ್ಟಿದೆ ಎಂದು ಡಿಹೆಚ್ಒ ಡಾ. ಎಂ.ಸಿ‌.ರವಿ 'ಈಟಿವಿ ಭಾರತ'ಕ್ಕೆ ಮಾಹಿತಿ ನೀಡಿದರು.

ಜ್ವರದಿಂದ ಬಳಲುತ್ತಿದ್ದವರ ಮೂತ್ರದ ಮಾದರಿ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿತ್ತು. ಈಗ ಅದರ ಫಲಿತಾಂಶ ಬಂದಿದ್ದು, ಇಬ್ಬರಿಗೆ ಚಿಕೂನ್ ಗುನ್ಯಾ ಇರುವುದು ಖಚಿತವಾಗಿದೆ. ಆದರೆ, ಗೀತಾ (23) ಎಂಬ ಯುವತಿ ಮೃತಪಟ್ಟಿರುವುದು ಚಿಕೂನ್ ಗುನ್ಯಾದಿಂದಲ್ಲ, ಎದೆನೋವಿನಿಂದ ಎಂದು ಸ್ಪಷ್ಟಪಡಿಸಿದರು. ಗ್ರಾಮಸ್ಥರು ಆತಂಕಕ್ಕೆ ಒಳಗಾಗಬೇಡಿ ಎಂದು ಧೈರ್ಯ ತುಂಬಿದರು.

ಶಂಕಿತ ಡೆಂಗ್ಯೂ ಜ್ವರಕ್ಕೆ ಗಿರಿಜನ ಯುವತಿ ಗೀತಾ ಮೃತಪಟ್ಟಿದ್ದಾರೆ ಎಂದು ಗ್ರಾಮಸ್ಥರು ಆತಂಕ ವ್ಯಕ್ತಪಡಿಸಿದ್ದರು. ಇದರಿಂದ ಜನ ಭೀತಿಗೊಳಗಾಗಿದ್ದರು. ಎದೆನೋವಿಗೆ ಯುವತಿ ಮೃತಪಟ್ಟಿದ್ದಳು. ಗ್ರಾಮಸ್ಥರು ಖಚಿತ ಮಾಹಿತಿ ಇಲ್ಲದೆ ಸುಳ್ಳು ಹಬ್ಬಿಸಬೇಡಿ ಎಂದು ಮನವಿ ಮಾಡಿದರು.

ಶುಕ್ರವಾರ ಉಯಿಲನತ್ತ ಗ್ರಾಮದಲ್ಲಿ ಆರೋಗ್ಯ ಶಿಬಿರ ಏರ್ಪಡಿಸಲಿದ್ದು, ಮುನ್ನೆಚ್ಚರಿಕಾ ಕ್ರಮ ತೆಗೆದುಕೊಳ್ಳಲಾಗುವುದು. ಮತ್ತೊಮ್ಮೆ ಗ್ರಾಮಸ್ಥರ ರಕ್ತದ ಮಾದರಿ ಪ್ರಯೋಗಾಲಯಕ್ಕೆ ಕಳುಹಿಸಲಾಗುವುದು ಎಂದರು.