ಕರೆ ಮಾಡಿದ 18 ನಿಮಿಷದಲ್ಲಿ ಪೊಲೀಸ್ ಸೇವೆ: ಚಾಮರಾಜನಗರ ERSSಗೆ ರಾಜ್ಯದಲ್ಲಿ ಮೊದಲ ಸ್ಥಾನ

ಪೊಲೀಸ್‌ ಇಲಾಖೆ ಬಿಡುಗಡೆ ಮಾಡಿರುವ ಈ ವರ್ಷದ ಜನವರಿಯಿಂದ ಮಾರ್ಚ್‌ವರೆಗಿನ ಅಂಕಿ ಅಂಶದ ಪ್ರಕಾರ, ಚಾಮರಾಜನಗರ ಜಿಲ್ಲೆಯಲ್ಲಿ ಜನರು ಸಹಾಯವಾಣಿಗೆ ಕರೆ ಮಾಡಿದ ನಂತರ ಸರಾಸರಿ 18.20 ನಿಮಿಷಗಳ ಅವಧಿಯಲ್ಲಿ ಪೊಲೀಸರು ಘಟನಾ ಸ್ಥಳ ತ‌ಲುಪುತ್ತಿದ್ದಾರೆ. ಅತ್ಯಂತ ಕಡಿಮೆ ತುರ್ತು ಸ್ಪಂದನಾ ಅವಧಿ ಹೊಂದಿರುವ ಜಿಲ್ಲೆಗಳ ಪೈಕಿ ಚಾಮರಾಜನಗರ ಮೊದಲ ಸ್ಥಾನದಲ್ಲಿದೆ. ರಾಯಚೂರು ಜಿಲ್ಲೆ ಎರಡನೇ ಸ್ಥಾನದಲ್ಲಿದೆ.

ಚಾಮರಾಜನಗರ: ಎಲ್ಲಾ ಆದ ನಂತರ ಪೊಲೀಸರು ತಡವಾಗಿ ಬರುತ್ತಾರೆ ಎಂಬ ಅಪವಾದಕ್ಕೆ ಚಾಮರಾಜನಗರ ಜಿಲ್ಲಾ ಪೊಲೀಸರು ವಿರುದ್ಧ ನಡೆ ತೋರಿದ್ದಾರೆ. ಕರೆ ಮಾಡಿದ ಸರಾಸರಿ 18 ನಿಮಿಷದಲ್ಲೇ ಸೇವೆ ನೀಡುತ್ತಿರುವ ಮೂಲಕ ಕ್ಷಿಪ್ರ ಅವಧಿಯಲ್ಲಿ ಜನರ ರಕ್ಷಣೆಗೆ ಧಾವಿಸುತ್ತಿದ್ದಾರೆ.

ರಾಜ್ಯ ಪೊಲೀಸ್ ಇಲಾಖೆ ಬಿಡುಗಡೆ ಮಾಡಿರುವ ಜನವರಿಯಿಂದ ಮಾರ್ಚ್​ ವರೆಗಿನ ERSS-112 ತುರ್ತು ಸಹಾಯವಾಣಿ ಅಂಕಿ ಅಂಶದ ಪ್ರಕಾರ, ಇಡೀ ರಾಜ್ಯದಲ್ಲಿ ಚಾಮರಾಜನಗರ ಜಿಲ್ಲಾ ಪೊಲೀಸರು ದೂರಿದಾರರು ಕರೆ ಮಾಡಿದ ಸರಾಸರಿ 18.20 ನಿಮಿಷದಲ್ಲಿ ಘಟನಾ ಸ್ಥಳಕ್ಕೆ ತೆರಳಿ ಸ್ಪಂದಿಸುತ್ತಿದ್ದಾರೆ. ರಾಯಚೂರು ಜಿಲ್ಲೆ ಸರಾಸರಿ 18.27 ನಿಮಿಷದಲ್ಲಿ ಸ್ಪಂದಿಸುವ ಮೂಲಕ ಎರಡನೇ ಸ್ಥಾನ, ಮಹಾನಗರಗಳ ಪೈಕಿ ಬೆಂಗಳೂರು‌ ಸಿಟಿ ಪೊಲೀಸರು ಮೊದಲನೇ ಸ್ಥಾನ, ಮೈಸೂರು ಎರಡನೇ ಸ್ಥಾನದಲ್ಲಿದೆ.

ರಾಜ್ಯ ಪೊಲೀಸ್ ಇಲಾಖೆ ಬಿಡುಗಡೆ ಮಾಡಿದ ಪಟ್ಟಿ

ಕೌಟಂಬಿಕ ಕಲಹ, ಅಪಘಾತ ಎಲ್ಲದಕ್ಕೂ ಸ್ಪಂದನೆ: ಕುಡಿದು ಗಲಾಟೆ, ಅಪಘಾತ, ಕೌಟಂಬಿಕ‌ ಕಲಹ, ಶಬ್ಧ ಮಾಲಿನ್ಯ, ಕಳ್ಳತನ, ಆತ್ಮಹತ್ಯೆಗೆ ಯತ್ನ ಹೀಗೆ ನಾನಾ ರೂಪದ ಸಮಸ್ಯೆ, ಅವಘಡಗಳಿಗೆ ಸ್ಪಂದಿಸಲು ಜಿಲ್ಲೆಯಲ್ಲಿ 10 ವಾಹನಗಳು ಕಾರ್ಯ ನಿರ್ವಹಿಸುತ್ತಿದೆ.‌ ಕೆಲವೊಮ್ಮೆ ಆತ್ಮಹತ್ಯೆಗೆ ಯತ್ನಿಸುತ್ತಿದ್ದವರನ್ನು ಈಆರ್​ಎಸ್​ಎಸ್​ ಪೊಲೀಸರು ರಕ್ಷಿಸಿದ್ದಾರೆ. ಕೋವಿಡ್ ಜಾಗೃತಿ ಮೂಡಿಸಿದ್ದಾರೆ. ಕೊಲೆ, ದರೋಡೆ, ಅಕ್ರಮ ಮದ್ಯ ಮಾರಾಟ, ಮಹಿಳೆ ಮತ್ತು ಹಿರಿಯ ನಾಗರಿಕರ ರಕ್ಷಣೆಯನ್ನೂ ಮಾಡುವ ಮೂಲಕ ಪೊಲೀಸರು ಮತ್ತಷ್ಟು ಜನಸ್ನೇಹಿಯಾಗಿದ್ದಾರೆ.

ಜಗಳ, ಕಲಹದ ಕರೆಗಳೇ ಹೆಚ್ಚು: ಜನವರಿಯಿಂದ ಮಾರ್ಚ್ ವರೆಗೆ ಚಾಮರಾಜನಗರ ERSS ತುರ್ತು ಸಹಾಯವಾಣಿಗೆ 1936 ಕರೆಗಳು ಬಂದಿದ್ದು ಇವುಗಳಲ್ಲಿ 1473 ಸಾರ್ವಜನಿಕ ಸ್ಥಳಗಳಲ್ಲಿ ಗದ್ದಲ, ಜಗಳ, ಕೌಟಂಬಿಕ ಕಲಹದ್ದಾಗಿದೆ. ಉಳಿದಂತೆ, 159- ಅಪಘಾತಕ್ಕೆ ಸಂಬಂಧಿಸಿದಂತೆ, 40- ಕಳ್ಳತನಕ್ಕೆ ಸಂಬಂಧಿಸಿದಂತೆ, 106- ಜೂಜು, ಮದ್ಯ ಮಾರಾಟಕ್ಕೆ ಸಂಬಂಧಿಸಿದಂತಹ ಕರೆಗಳಿಗೆ ಪೊಲೀಸರು ಸ್ಪಂದಿಸಿದ್ದಾರೆ.

ದೂರುದಾರರು ಕರೆ ಮಾಡಿದ ಸ್ಥಳಕ್ಕೆ ದೌಡಾಯಿಸುವ ಪೊಲೀಸರು ಕೌಟಂಬಿಕ ಸಮಸ್ಯೆ, ಕುಡುಕರ ರಂಪಾಟ, ಗಲಾಟೆ, ಜಮೀನು ವಿಚಾರಕ್ಕೆ ಕಲಹ ಸೇರಿದಂತೆ ಸಣ್ಣಪುಟ್ಟ ಸಮಸ್ಯೆಗಳನ್ನು ಸ್ಥಳದಲ್ಲೇ ಪರಿಹರಿಸಲಿದ್ದು, ಗಂಭೀರ ಪ್ರಕರಣಗಳಾದರೆ ಸಂಬಂಧಿಸಿದ ಠಾಣೆಗೆ ಮಾಹಿತಿ ನೀಡಿ ಅವಶ್ಯಬಿದ್ದರೆ ವ್ಯಕ್ತಿಗಳನ್ನು ವಶಕ್ಕೆ ಪಡೆದುಕೊಳ್ಳುತ್ತಾರೆ.

ಈ ಕುರಿತು ಮಾತನಾಡಿರುವ ಪೊಲೀಸ್ ವರಿಷ್ಠಾಧಿಕಾರಿ ಟಿ.ಪಿ.ಶಿವಕುಮಾರ್, ಮೂರು ತಿಂಗಳಿನ ಅಂಕಿ-ಅಂಶದ ಪ್ರಕಾರ ಸಿಬ್ಬಂದಿ ಅತ್ಯುತ್ತಮವಾಗಿ ಕಾರ್ಯ ನಿರ್ವಹಿಸಿದ್ದು, ರಾಜ್ಯದಲ್ಲೇ ಅತಿ ವೇಗವಾಗಿ ಸ್ಪಂದಿಸಿದರಲ್ಲಿ ಜಿಲ್ಲೆ ಮೊದಲ ಸ್ಥಾನದಲ್ಲಿದೆ. ತುರ್ತು ಸಹಾಯವಾಣಿಯನ್ನು ಸಾರ್ವಜನಿಕರು ಸದುಪಯೋಗ ಪಡಿಸಿಕೊಳ್ಳಬೇಕು, ಈ ಸಂಬಂಧವಾಗಿ ಜಾಗೃತಿ ಮೂಡಿಸಲಾಗುತ್ತಿದೆ ಎಂದರು.

ಇದನ್ನೂ ಓದಿ:ಈ ವರ್ಷ ಸರ್ಕಾರಿ ಸ್ವಾಮ್ಯದ ತೈಲ-ನೈಸರ್ಗಿಕ ಅನಿಲ ನಿಗಮಕ್ಕೆ 40,305 ಕೋಟಿ ರೂ. ನಿವ್ವಳ ಲಾಭ!