ಚಾಮರಾಜನಗರದಲ್ಲೂ ಇದಾನೆ ಬಘೀರಾ: ಮೊದಲ ಬಾರಿಗೆ ಬಿಆರ್​​ಟಿಯಲ್ಲಿ ಕರಿಚಿರತೆ ಪತ್ತೆ

ಕಬಿನಿ ಹಿನ್ನೀರಿನಲ್ಲಿ ಈ ಹಿಂದೆ ಕರಿಚಿರತೆ ಚಿತ್ರವೊಂದು ವನ್ಯಜೀವಿ ಛಾಯಾಗ್ರಾಹಕನ ಕ್ಯಾಮರಾ ಕಣ್ಣಿಗೆ ಸೆರೆಯಾಗಿ ಎಲ್ಲರ ಗಮನ ಸೆಳೆದಿದೆ. ಇದೀಗ ಬಿಳಿಗಿರಿರಂಗನಾಥ ಸ್ವಾಮಿ ಹುಲಿ ಸಂರಕ್ಷಿತ ಪ್ರದೇಶದಲ್ಲಿಯೂ ಕರಿಚಿರತೆಯೊಂದು ಪತ್ತೆಯಾಗಿದೆ.

ಚಾಮರಾಜನಗರ:ಬಿಳಿಗಿರಿರಂಗನಾಥ ಸ್ವಾಮಿ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಇದೇ ಮೊದಲ ಬಾರಿಗೆ ಕರಿಚಿರತೆಯೊಂದು ಪತ್ತೆಯಾಗಿದೆ.

ಬೈಲೂರು ಅರಣ್ಯ ವಲಯದ ಕೆ. ಡ್ಯಾಂ ಸಮೀಪದಲ್ಲಿ ಕರಿಚಿರತೆ ನಡೆದು ಹೋಗುತ್ತಿರುವ ಚಿತ್ರ ಹುಲಿ ಗಣತಿಗಾಗಿ ಅಳವಡಿಸಿದ್ದ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಮಲೆಮಹದೇಶ್ವರ ವನ್ಯಜೀವಿ ಧಾಮದಿಂದ ಈ ಕರಿ ಚಿರತೆ ಬಂದಿದೆಯಾ ಅಥವಾ ಬೇರೆ ಇನ್ನೆಲ್ಲಾದರೂ ಕರಿಚಿರತೆ ಇರುವ ಸಾಧ್ಯತೆ ಇದೆಯೇ ಎಂದು ಪರಿಶೀಲಿಸಲಾಗುತ್ತಿದೆ ಎಂದು ಬಿ.ಆರ್.​​ಟಿ ಡಿಎಫ್ಒ ಸಂತೋಷ್ ಕುಮಾರ್ ತಿಳಿಸಿದ್ದಾರೆ.

ಅಂದಾಜು 4 ವರ್ಷದ ಕರಿಚಿರತೆ ಇದಾಗಿದ್ದು, ಚಾಮರಾಜನಗರದಲ್ಲೂ ಬಘೀರಾ ಇರುವುದು ಈ ಮೂಲಕ ಖಾತ್ರಿಯಾಗಿದೆ.