ಗುಂಡ್ಲುಪೇಟೆ: ವ್ಯಕ್ತಿ ನಾಪತ್ತೆಯಾಗಿ 14 ವರ್ಷಗಳ ಬಳಿಕ ದಾಖಲಾಯ್ತು ದೂರು, ಹುಡುಕಿ ಕೊಡುವಂತೆ ಖಾಕಿ ಮೊರೆ

ನಾಪತ್ತೆಯಾಗಿದ್ದ ಸಹೋದರನನ್ನು ಎಷ್ಟೇ ಹುಡುಕಾಡಿದರೂ ಪತ್ತೆಯಾಗಿಲ್ಲ. ದೂರು ನೀಡುವ ಬಗ್ಗೆ ಮಾಹಿತಿ ಕೊರತೆಯಿಂದಾಗಿ ಕಂಪ್ಲೇಂಟ್‌ ನೀಡಿರಲಿಲ್ಲ ಎಂದು ದೂರುದಾರೆ ಅಳಲು ತೋಡಿಕೊಂಡಿದ್ದಾರೆ. 14 ವರ್ಷಗಳಿಂದ ವ್ಯಕ್ತಿ ನಾಪತ್ತೆಯಾಗಿದ್ದಾನೆ.

ಚಾಮರಾಜನಗರ: ವ್ಯಕ್ತಿಯೊಬ್ಬರು ನಾಪತ್ತೆಯಾದ ಬರೋಬ್ಬರಿ 14 ವರ್ಷಗಳ ಬಳಿಕ ಕುಟುಂಸ್ಥರು ಪೊಲೀಸರ ನೆರವು ಕೋರಿ ದೂರು ದಾಖಲಿಸಿರುವ ಘಟನೆ ಗುಂಡ್ಲುಪೇಟೆ ತಾಲೂಕಿನ‌ ಗ್ರಾಮವೊಂದರಲ್ಲಿ ನಡೆದಿದೆ.

2008ರ ನವೆಂಬರ್‌ನಲ್ಲಿ ಮೈಸೂರಿನ ಆಸ್ಪತ್ರೆಗೆ ಹೋಗುವುದಾಗಿ ಹೇಳಿ ಹೋಗಿದ್ದ ವ್ಯಕ್ತಿ ಮನೆಗೆ ವಾಪಸ್​​ ಬಂದಿಲ್ಲ, ಸಾಕಷ್ಟು ಕಡೆ ಹುಡುಕಾಡಿದರೂ ವ್ಯಕ್ತಿಯ ಸುಳಿವು ಪತ್ತೆಯಾಗಿಲ್ಲ. ಪೊಲೀಸರಿಗೆ ದೂರು ಕೊಡಬೇಕೆಂದು ಅರಿವಿಲ್ಲದಿದ್ದ ಹಿನ್ನೆಲೆಯಲ್ಲಿ ಇದೀಗ ದೂರು ಕೊಡುತ್ತಿದ್ದು, ಹುಡುಕಿಕೊಡುವಂತೆ ಕಾಣೆಯಾಗಿರುವ ವ್ಯಕ್ತಿಯ ಸಹೋದರಿ ಪೊಲೀಸರಿಗೆ ಕಂಪ್ಲೇಂಟ್‌ ನೀಡಿದ್ದಾರೆ.

ಕಾಣೆಯಾದ ವ್ಯಕ್ತಿಗೆ 54 ವರ್ಷ ವಯಸ್ಸಾಗಿದ್ದು, ಕೆಲ ದಿನಗಳ ಅಂತರದಲ್ಲೇ ತನ್ನ ಇಬ್ಬರು ಮಕ್ಕಳನ್ನು ಕಳೆದುಕೊಂಡಿದ್ದರಂತೆ. ಅದಾದ ಬಳಿಕ ಅನಾರೋಗ್ಯಕ್ಕೀಡಾಗಿ 2008ರ ನವೆಂಬರ್ 14 ರಂದು ಮೈಸೂರಿನ ಜೆಎಸ್ಎಸ್ ಆಸ್ಪತ್ರೆಗೆ ಹೋಗಿ ಬರುವುದಾಗಿ ತೆರಳಿದವರು ವಾಪಸ್ ಆಗಿಲ್ಲ. ಮನೆಗೆ ಬರಬಹುದು ಎಂದುಕೊಂಡಿದ್ದೆವು. ಆದರೆ, ಇನ್ನು ವಾಪಾಸ್ ಆಗಿಲ್ಲ ಎಂದು ದೂರುದಾರೆ ಅಳಲು ತೋಡಿಕೊಂಡಿದ್ದಾರೆ. ಸದ್ಯ, ತೆರಕಣಾಂಬಿ ಪೊಲೀಸ್ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಮುಂದಿನ ಕ್ರಮ ಕೈಗೊಂಡಿದ್ದಾರೆ.

ಇದನ್ನೂ ಓದಿ:ಚಾಮರಾಜನಗರ : ಹಿಜಾಬ್, ಬುರ್ಕಾ ತೆಗೆದು ಪರೀಕ್ಷೆ ಬರೆದ ವಿದ್ಯಾರ್ಥಿನಿಯರು, 229 ಮಂದಿ ಗೈರು