ಆರ್​ಬಿಐ ಸ್ಪಷ್ಟನೆ ನೀಡಿದ್ದರೂ ನಾಣ್ಯಕ್ಕೆ ಒದಗದ ಶುಕ್ರದೆಸೆ: ಕೆಎಸ್ಆರ್​​ಟಿಸಿ ಬಸ್​​​ಗಳಲ್ಲಿ ೧೦ ರೂ.ಕಾಯಿನ್ ಬ್ಯಾನ್!?

ಕೊಳ್ಳೇಗಾಲದಿಂದ ತೆರಳುತ್ತಿದ್ದ ಕೆಎ-೪೨ ಎಫ್-೨೧೮೦ ಬಸ್​​​​​ನ ಕಂಡಕ್ಟರ್ ೧೦ ರೂ. ನಾಣ್ಯ ಪಡೆಯಲು ನಿರಾಕರಿಸಿದ್ದು, ದೇಶದಲ್ಲೇ ೧೦ ರೂ. ನಾಣ್ಯ ಬ್ಯಾನ್ ಮಾಡಿದ್ದಾರೆಂದು ತಮ್ಮ ಅಜ್ಞಾನ ಪ್ರದರ್ಶಿಸಿದ್ದಾರೆ.

ಚಾಮರಾಜನಗರ:ಆರ್​ಬಿಐ ಎಷ್ಟೇ ಸ್ಪಷ್ಟನೆ ನೀಡಿದ್ದರೂ ೧೦ ರೂ. ನಾಣ್ಯಕ್ಕೆ ಶುಕ್ರದೆಸೆ ಒದಗಿದಂತೆ ಕಾಣುತ್ತಿಲ್ಲ ಎಂಬುದಕ್ಕೇ ಈ ಘಟನೆಯೇ ನಿದರ್ಶನ.

ಹೌದು, ಕೊಳ್ಳೇಗಾಲದಿಂದ ತೆರಳುತ್ತಿದ್ದ ಕೆಎ-೪೨ ಎಫ್-೨೧೮೦ ಬಸ್​​​ನ ಕಂಡಕ್ಟರ್ ೧೦ ರೂ. ನಾಣ್ಯ ಪಡೆಯಲು ನಿರಾಕರಿಸಿದ್ದು, ದೇಶದಲ್ಲೇ ೧೦ ರೂ. ನಾಣ್ಯ ಬ್ಯಾನ್ ಮಾಡಿದ್ದಾರೆಂದು ತಮ್ಮ ಅಜ್ಞಾನ ಪ್ರದರ್ಶಿಸಿದ್ದಾರೆ. ಈ ವೇಳೆ ಡಿಪೋದಲ್ಲಿ ೧೦ ರೂ. ನಾಣ್ಯವನ್ನು ಪಡೆಯುತ್ತಿಲ್ಲ, ನಾನು ಲಾಸ್ ಮಾಡಿಕೊಳ್ಳಲೇ ಎಂಬ ಅಸಹಾಯತೆ ತೋರ್ಪಡಿಸಿದ್ದಾರೆ. ನಾಣ್ಯ ಪಡೆದು ಟಿಕೆಟ್ ನೀಡಬೇಕೆಂದು ಸಹ ಪ್ರಯಾಣಿಕರು ಎಷ್ಟೇ ಒತ್ತಾಯ ಮಾಡಿದರೂ ಹಣ ಪಡೆಯದೇ ಬ್ಯಾನ್ ಆಗಿದೆ ಎಂದಿರುವ ವಿಡಿಯೋ ಈಟಿವಿ ಭಾರತಕ್ಕೆ ಲಭ್ಯವಾಗಿದೆ.

ಈ ಕುರಿತು ಈಟಿವಿಯೊಂದಿಗೆ ಹೆಸರು ಹೇಳಲು ಇಚ್ಛಿಸದ ಅಧಿಕಾರಿಯೊಬ್ಬರು ಮಾತನಾಡಿ, ಕೆಲವೊಮ್ಮೆ ಬ್ಯಾಂಕ್​ಗಳು ಕೂಡ ೧೦ ರೂ. ನಾಣ್ಯಗಳನ್ನು ಪಡೆಯಲು ನಿರಾಕರಿಸುತ್ತವೆ. ಆದ್ದರಿಂದ ಡಿಪೋದವರು ನಾಣ್ಯಗಳನ್ನು ಪಡೆಯುತ್ತಿಲ್ಲ ಎಂಬ ಮಾಹಿತಿಯನ್ನು ನೀಡಿದ್ದಾರೆ.

ಒಟ್ಟಿನಲ್ಲಿ ಜಿಲ್ಲಾ ಕೆಎಸ್​ಆರ್​ಟಿಸಿಯಲ್ಲಿ ೧೦ ರೂ. ನಾಣ್ಯಕ್ಕೆ ಅಘೋಷಿತ ನಿಷೇಧವಿದ್ದು ಸಂಬಂಧ ಪಟ್ಟವರು ಕೂಡಲೇ ಈ ಕುರಿತು ಕ್ರಮ ಕೈಗೊಳ್ಳಬೇಕಿದೆ. ಆರ್​ಬಿಐ ಠಂಕಿಸಿರುವ ನಾಣ್ಯವನ್ನು ಸರ್ಕಾರಿ ಸಂಸ್ಥೆಗಳೇ ಪಡೆಯಲು ಹಿಂದೇಟು ಹಾಕಿದರೇ ಸಾಮಾನ್ಯರಿಗೆ ಅರಿವು ಮೂಡಿಸುವರು ಯಾರು? ಎಂಬ ಪ್ರಶ್ನೆ ಸಾರ್ವಜನಿಕರದ್ದಾಗಿದೆ.