ಐಎಂಎ ಗ್ರಾಹಕರನ್ನು ಗುರಿಯಾಗಿಸಿ ವಂಚನೆಗೆ ಸಜ್ಜಾದ ಖದೀಮರ ಗ್ಯಾಂಗ್​: ಪೊಲೀಸರು ಅಲರ್ಟ್​

ಐಎಂಎ ಕಂಪನಿಯಲ್ಲಿ ಹಣ ಕಳೆದುಕೊಂಡ ಗ್ರಾಹಕರನ್ನೇ ಟಾರ್ಗೆಟ್ ಮಾಡಿ, ಕಳೆದುಕೊಂಡಿರುವ ಹಣವನ್ನು ವರ್ಗಾಯಿಸುವುದಾಗಿ ಕೆಲವರು ಬ್ಯಾಂಕ್​ ಡಿಟೇಲ್ಸ್​ ಕೇಳುತ್ತಿದ್ದಾರೆ. ಇಂತವರ ಬಗ್ಗೆ ಗ್ರಾಹಕರು ಎಚ್ಚರ ವಹಿಸಿ ಎಂದು ಸೈಬರ್ ಪೊಲೀಸರು ಸೂಚಿಸಿದ್ದಾರೆ.

ಬೆಂಗಳೂರು: ಐಎಂಎ ಕಂಪನಿಯಲ್ಲಿ ಹಣ ಕಳೆದುಕೊಂಡು ಒಂದು ಕಡೆ ಗ್ರಾಹಕರು ಕಂಗಲಾಗಿದ್ರೆ, ಮತ್ತೊಂದೆಡೆ ಅವರ ಹಣ ವಾಪಸ್​ ಕೊಡ್ತಿವಿ ಎಂದು ಪುಂಗಿ ಬಿಡುವ ಗ್ಯಾಂಗ್​ವೊಂದು ಕಾರ್ಯಾಚರಣೆಗೆ ಇಳಿದಿದೆ. ಈ ಕುರಿತು ನಗರ ಪೊಲೀಸ್ ಆಯುಕ್ತರ ಕಚೇರಿ ಬಳಿ ಇರುವ ಸೈಬರ್ ಠಾಣೆಯಲ್ಲಿ ಆನ್​ಲೈನ್ ವಂಚನೆ ಕೇಸ್ ದಾಖಲಾಗಿದೆ.

ಐಎಂಎ ವಂಚಿತ ಗ್ರಾಹಕರನ್ನೇ ಟಾರ್ಗೆಟ್ ಮಾಡಿ ಅವರ ಅಸಹಾಯಕತೆಯನ್ನ ದುರುಪಯೋಗಪಡಿಸಿಕೊಂಡು ಕಳೆದುಕೊಂಡಿರುವ ಹಣವನ್ನು ವರ್ಗಾಯಿಸುವುದಾಗಿ ದೂರವಾಣಿ ಮೂಲಕ ಕರೆ ಮಾಡಿ ಗ್ರಾಹಕರ ಬ್ಯಾಂಕ್ ಖಾತೆ ವಿವರ, ಐಎಫ್ ಎಸ್ ಸಿ‌ ಕೋಡ್​, ಡೆಬಿಟ್ ಕಾರ್ಡ್ ಸಂಖ್ಯೆ ಮಾಹಿತಿಯನ್ನ ಕೆಲ ಖದೀಮರು ಕಲೆ ಹಾಕುತ್ತಿದ್ದಾರೆ.

ಈ ವಿಚಾರ ತಿಳಿದ ಪೊಲೀಸರು ಇದೀಗ ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿದ್ದಾರೆ. ಐಎಂಎ ಗ್ರಾಹಕರು ಯಾವುದೇ ಮೋಸದ ಕರೆಗಳಿಗೆ ತಮ್ಮ ಬ್ಯಾಂಕ್​ ಮಾಹಿತಿಯನ್ನ ನೀಡಬೇಡಿ. ಒಂದು ವೇಳೆ ಕರೆ ಬಂದ್ರೆ ಎಚ್ಚರ ವಹಿಸಿ ಠಾಣೆಗೆ ದೂರು ನೀಡಿ ಎಂದಿದ್ದಾರೆ. ಈ ಸಂಬಂಧ ಸೈಬರ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ದೂರವಾಣಿ ಕರೆ ಆಧರಿಸಿ ತನಿಖೆ ಮುಂದುವರೆಸಿದ್ದಾರೆ.