ಕೊರೊನಾ ಭೀತಿಗೆ ಲಾಕ್​ಡೌನ್ ಇನ್ನಷ್ಟು ಬಿಗಿ: ಬೀದರ್​​​ ನಗರದಲ್ಲಿ ಔಷಧಿ ಸಿಂಪಡಣೆ

ಬೀದರ್​ ಜಿಲ್ಲೆಯಲ್ಲು ಕೊರೊನಾ ಸೋಂಕಿತರ ಸಂಖ್ಯೆ 14ಕ್ಕೆ ಏರಿಕೆಯಾಗುತ್ತಿದ್ದಂತೆ ಲಾಕ್​ಡೌನ್​ ಇನ್ನಷ್ಟು ಬಿಗಿಯಾಗಿದೆ. ಅಲ್ಲದೆ ಇಂದು ನಗರದ ಪ್ರಮುಖ ಬೀದಿಗಳಲ್ಲಿ ರಾಸಾಯನಿಕ ಸಿಂಪಡಣೆ ಮಾಡಲಾಯಿತು.

ಬೀದರ್: ಜಿಲ್ಲೆಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ 14ಕ್ಕೆ ಏರಿಕೆಯಾಗುತ್ತಿದ್ದಂತೆ ನಗರದ ಹಳೇ ಸಿಟಿ ಭಾಗವನ್ನು ಹಾಟ್ ಸ್ಪಾಟ್ ಎಂದು ಘೋಷಣೆ ಮಾಡಲಾಗಿದೆ. ಇಂದು ಜಿಲ್ಲಾಡಳಿತ ಲಾಕ್​ಡೌನ್ 2.0 ಮತ್ತಷ್ಟು ಬಿಗಿಗೊಳಿಸಿದೆ.

ದೆಹಲಿಯ ತಬ್ಲಿಘಿ ಜಮಾತ್​ಗೆ ಹೋಗಿ ಬಂದವರ ಒಡನಾಟದಲ್ಲಿದ್ದ ಮೊದಲ ಹಂತದ ಸೋಂಕಿತರು ಹಾಗೂ 2ನೇ ಹಂತದ ಸಂಪರ್ಕದಲ್ಲಿದ್ದವರಲ್ಲಿ ಸೋಂಕು ದೃಢಪಡುತ್ತಿದ್ದಂತೆ ಜಿಲ್ಲಾಡಳಿತ ಈ ಕ್ರಮ ತೆಗೆದುಕೊಂಡಿದೆ.

ನಗರಾದ್ಯಂತ ಔಷಧಿ ಸಿಂಪಡಣೆ ಕಾರ್ಯ ಚುರುಕು

ನಗರದ ಪ್ರಮುಖ ಭಾಗಗಳಲ್ಲಿ ಅಗ್ನಿಶಾಮಕ ವಾಹನ ಬಳಸಿ ಔಷಧಿ ಸಿಂಪಡಣೆ ಮಾಡಲಾಯಿತು. ನಯಾ ಕಮಾನ್ ಗೇಟ್, ಪೊಲೀಸರ ವಾಹನಗಳು ಹಾಗೂ ಬ್ಯಾರಿಕೇಡ್​ಗಳಿಗೂ ಸಿಂಪಡಣೆ ಮಾಡಿದರು.

ಇನ್ನು ಅನಗತ್ಯವಾಗಿ ರಸ್ತೆಗಿಳಿದ ಬೈಕ್ ಸವಾರರಿಗೆ ಮೈಚಳಿ ಬಿಡಿಸಿದ್ದು, ಕೆಲ ಬೈಕ್​ಗಳನ್ನು ಪೊಲೀಸರು ವಶಕ್ಕೆ ಪಡೆದರು.