ಬೀದರ್ ಪೊಲೀಸರ ಭರ್ಜರಿ ಕಾರ್ಯಾಚರಣೆ : 6.5 ಕ್ವಿಂಟಲ್ ಗಾಂಜಾ ಸೀಜ್, ಇಬ್ಬರ ಕೈಗೆ ಕೋಳ

ತೆಂಗಿನ ಲಾರಿಯಲ್ಲಿ ಲೋಡ್​​​ ಮಾಡಿ ಅಕ್ರಮವಾಗಿ ಗಾಂಜಾ ಸಾಗಾಟ - ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ ಪೊಲೀಸರು-ಲಕ್ಷಾಂತರ ಮೌಲ್ಯದ ಗಾಂಜಾ, ಕಾರು ಸೀಜ್, ಇಬ್ಬರು ಆರೋಪಿಗಳ ಬಂಧನ

ಬೀದರ್:ಕಳ್ಳರು ಚಾಪೆ ಕೆಳಗೆ ನುಸುಳಿದ್ರೇ, ಪೊಲೀಸರು ರಂಗೋಲಿ ಕೆಳಗೆ ನುಸುಳ್ತಾರೆ. ಅದಕ್ಕೊಂದು ಉದಾಹರಣೆ ಇವತ್ತು ಬೀದರ್ ನಲ್ಲಿ ಪೊಲೀಸರು ನಡೆಸಿದ ಕಾರ್ಯಾಚರಣೆ.ಜಿಲ್ಲಾ ಪೊಲೀಸರು ಭರ್ಜರಿ ಕಾರ್ಯಾಚರಣೆ ನಡೆಸಿದ್ದಾರೆ. 6.5 ಕ್ವಿಂಟಲ್​ ಗಾಂಜಾ ಜಪ್ತಿ ಮಾಡುವಲ್ಲಿ ಯಶಸ್ವಿಯಾಗಿದ್ದಲ್ಲದೇ, ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಜಿಲ್ಲೆಯ ಔರಾದ್ ತಾಲೂಕಿನ ಜಂಬಗಿ ತಾಂಡಾ ಭಾಗದಲ್ಲಿ ಪೊಲೀಸರು ದಾಳಿ ಮಾಡಿದ್ದರು. ತೆಂಗಿನ ಲಾರಿಯಲ್ಲಿ ಲೋಡ್​​​ ಮಾಡಿ ಅಕ್ರಮವಾಗಿ ಗಾಂಜಾ ಸಾಗಾಟ ಮಾಡುವ ವೇಳೆಯಲ್ಲಿ ರೆಂಡ್​​​ ಹ್ಯಾಂಡ್ ಆಗಿ ಪೊಲೀಸರ ಬಲೆಗೆ ದಂಧೆಕೋರರು ಸಿಕ್ಕಿ ಬಿದ್ದಿದ್ದಾರೆ. ಈ ಬಗ್ಗೆ ಖಚಿತ ಮಾಹಿತಿ ಪಡೆದಿದ್ದ ಪೊಲೀಸರು ಕಾರ್ಯಾಚರಣೆಗಿಳಿದಿದ್ದರು.ಜಂಬಗಿ ತಾಂಡದ ನಿವಾಸಿಗಳಾದ ಅನೀಲ, ವಿಜಯ ಎಂಬ ಇಬ್ಬರು ಆರೋಪಿಗಳನ್ನ ಪೊಲೀಸರು ಬಂಧಿಸಿದ್ದಾರೆ. ಆದರೆ, ನಾಪತ್ತೆಯಾಗಿರುವ ಜಮೀನು ಮಾಲೀಕ ಗೋಪಾಲ್​​​​ಗಾಗಿ ಖಾಕಿ ಪಡೆ ಹುಡುಕಾಟ ನಡೆಸುತ್ತಿದೆ.

ದಾಳಿ ವೇಳೆಯಲ್ಲಿ ಒಂದು ಕಾರ್ ಮೂರು ಬೈಕ್​​​ಗಳು ಜಪ್ತಿ ಮಾಡಲಾಗಿದೆ. ಜಿಲ್ಲಾ ಪೊಲೀಸ್ ವರಿಷ್ಠ ಟಿ. ಶ್ರೀಧರ್ ಅವರ ನೇತೃತ್ವದಲ್ಲಿ ಎಎಸ್​ಪಿ ನಾಗರಾಜ್ ರೆಡ್ಡಿ, ಡಿವೈಎಸ್​​ಪಿ ವೆಂಕನಗೌಡ ಪಾಟೀಲ್ ಸೇರಿದಂತೆ ಹಲವು ಪೊಲೀಸ್​​ ಅಧಿಕಾರಿಗಳ ತಂಡ ಸ್ಥಳದಲ್ಲೇ ಪಂಚನಾಮೆ ನಡೆಸಿದ್ದು, ಈ ಕುರಿತು ಸಂತಪೂರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸತತ ಪರಿಶ್ರಮಕ್ಕೆ ಸಿಕ್ಕ ಫಲ :

ಕಳೆದ ಮೂರು ತಿಂಗಳಿಂದ ಬೀದರ್ ಎಸ್​​​ಪಿ ಟಿ.ಶ್ರೀಧರ ಅವರು ಗಾಂಜಾ ದಲ್ಲಾಳಿಗಳ ಪತ್ತೆಗಾಗಿ ಬಲೆ ಬೀಸಿದ್ದರು. ಇದಕ್ಕಾಗಿ ಜಿಲ್ಲೆಯ ಎಲ್ಲಾ ಚೆಕ್ ಪೋಸ್ಟ್​​​​ಗಳ ಗಸ್ತು ಕೂಡ ಹೆಚ್ಚಿಸಿದ್ದರು. ಆದರೆ, ಆರೋಪಿಗಳು ಬಸ್​​​ಗಳ ಮೂಲಕ ಗಾಂಜಾ ಸಾಗಾಟ ಮಾಡುವಾಗ ಸಿಕ್ಕಿ ಬಿದ್ದಿದ್ದರು. ಈ ದಾಳಿಯಿಂದ ಗಾಂಜಾ ಎಲ್ಲಿಂದ ಬರುತ್ತೆ ಎನ್ನುವುದರ ಮಾಹಿತಿ ಈ ಹಿಂದೆಯೇ ಗೊತ್ತಾಗಿತ್ತು. ಒಡಿಶಾ, ತೆಲಂಗಾಣ, ಮಹಾರಾಷ್ಟ್ರ ಹಾಗೂ ಕರ್ನಾಟಕದಲ್ಲಿಯೂ ಮಾದಕ ದಂಧೆಯ ಜಾಲ ವ್ಯಾಪಿಸಿಕೊಂಡಿದೆ.