ಬಸವಕಲ್ಯಾಣ :ನಗರಸಭೆ ಚುನಾವಣೆಯಲ್ಲಿ ಪರಸ್ಪರ ನಿಂದನೆ, ಹೊಡೆದಾಟ ನಡೆಸಿದ ಕಾಂಗ್ರೆಸ್, ಜೆಡಿಎಸ್ ಹಾಗೂ ಎಂಐಎಂ ಪಕ್ಷಗಳು ಅಧಿಕಾರಕ್ಕಾಗಿ ಇಂದು ದೋಸ್ತಿಗಳಾಗಿವೆ ಎಂದು ಸಂಸದ ಭಗವಂತ ಖೂಬಾ ಲೇವಡಿ ಮಾಡಿದರು.
ಅಧಿಕಾರಕ್ಕಾಗಿ ಕಾಂಗ್ರೆಸ್, ಜೆಡಿಎಸ್,ಎಂಐಎಂಗಳಿಂದ ಮೈತ್ರಿ: ಸಂಸದ ಖೂಬಾ..
ನಗರದ ಬಿಜೆಪಿ ಕಾರ್ಯಾಲಯದಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ನಗರಸಭೆಯಲ್ಲಿ ನಮ್ಮ ಪಕ್ಷಕ್ಕೆ ಬಹುಮತ ಇಲ್ಲದಿದ್ದರೂ ಕೂಡ ನಾನು ಈ ಮೂರು ಪಕ್ಷಗಳ ಕಳ್ಳಾಟ ನೋಡಲೆಂದು ಇಲ್ಲಿಗೆ ಆಗಮಿಸಿದ್ದೇನೆ. ಹಿಂದೆ ನಡೆದ ನಗರಸಭೆ ಚುನಾವಣೆ ಸಂದರ್ಭದಲ್ಲಿ ಕಾಂಗ್ರೆಸ್, ಜೆಡಿಎಸ್ ಹಾಗೂ ಎಂಐಎ ಪಕ್ಷಗಳು ಪರಸ್ಪರ ಬೈದಾಡಿಕೊಳ್ಳುವ ಜೊತೆಗೆ ಹೊಡೆದಾಡಿಕೊಂಡಿದ್ದವು.
ಆದರೆ, ಇಂದು ಅಧಿಕಾರದ ಆಸೆಗಾಗಿ ಹಿಂದೆ ನಡೆದ ಘಟನೆಗಳು ಮತ್ತು ಪಕ್ಷಗಳ ಸಿದ್ಧಾಂತವನ್ನು ಬದಿಗೊತ್ತಿ ದೋಸ್ತಿ ಮಾಡಿಕೊಂಡಿವೆ. ಮುಂಬರುವ ಬಸವಕಲ್ಯಾಣ ಕ್ಷೇತ್ರದ ವಿಧಾನಸಭೆ ಉಪಚುನಾವಣೆಯಲ್ಲಿಯೂ ಇವರ ದೋಸ್ತಿ ಮುಂದುವರೆಯಲಿದೆ ಎಂದು ಹೇಳಿದರು.