ಔಷಧೀಯ ಸಸ್ಯ ಸಂರಕ್ಷಣಾ ಪ್ರದೇಶ ಕ್ಲೀನ್​​​​ ಮಾಡಿದ ಸಂಡೂರು ಚಾರಣಿಗರು

ಮಹಾತ್ಮ ಗಾಂಧೀಜಿಯವರ 150 ಜನ್ಮದಿನದ ಪ್ರಯುಕ್ತ ಜಿಲ್ಲೆಯ ಸಂಡೂರು ನಗರದ ಗಂಡಿ ಮಾರೆಮ್ಮ ದೇಗುಲದ ಮುಂದಿರುವ ಔಷಧೀಯ ಸಸ್ಯಗಳ ಸಂರಕ್ಷಣಾ ಪ್ರದೇಶದಲ್ಲಿ ಸಂಡೂರು ಸಮ್ಮಿಟರ್ಸ್​ನ ಚಾರಣಿಗರ ತಂಡ ಅರಣ್ಯ ಪ್ರದೇಶದಲ್ಲಿ ಸ್ವಚ್ಛತಾ ಅಭಿಯಾನ ಹಮ್ಮಿಕೊಂಡಿತ್ತು. ಈ ಮೂಲಕ ನೂರಾರು ಎಕರೆ ಪ್ರದೇಶದಲ್ಲಿರುವ ಅರಣ್ಯ ಪ್ರದೇಶ ಶುಚಿಗೊಳಿಸಿ ಜನರ ಮೆಚ್ಚುಗೆಗೆ ಪಾತ್ರರಾದರು.

ಬಳ್ಳಾರಿ:ಜಿಲ್ಲೆಯ ಸಂಡೂರು ನಗರದ ಬಳಿಯಿರುವ ಅಂದಾಜು ಐನೂರು ಎಕರೆ ಪ್ರದೇಶ ವ್ಯಾಪ್ತಿಯ ಸಸ್ಯವನದಲ್ಲಿನ ತ್ಯಾಜ್ಯವನ್ನು ಶುಚಿತ್ವ ಗೊಳಿಸುವ ಮೂಲಕ ಸಂಡೂರು ಸಮ್ಮಿಟರ್ಸ್​ ಚಾರಣಿಗರ ತಂಡ ವಿಶೇಷ ಗಮನ ಸೆಳೆದಿದೆ.

ಮಹಾತ್ಮ ಗಾಂಧೀಜಿಯವರ 150 ಜನ್ಮದಿನದ ನಿಮಿತ್ತ ಜಿಲ್ಲೆಯ ಸಂಡೂರು ನಗರದ ಗಂಡಿ ಮಾರೆಮ್ಮ ದೇಗುಲದ ಮುಂದಿರುವ ಔಷಧೀಯ ಸಸ್ಯಗಳ ಸಂರಕ್ಷಣಾ ಪ್ರದೇಶದಲ್ಲಿ ಸಂಡೂರು ಸಮ್ಮಿಟರ್ಸ್​ನ ಚಾರಣಿಗರ ತಂಡ ಅರಣ್ಯ ಪ್ರದೇಶದಲ್ಲಿ ಬಿದ್ದಿದಂತಹ ಮದ್ಯದ ಬಾಟಲ್, ಪ್ಲಾಸ್ಟಿಕ್ ಸೇರಿದಂತೆ ಇತರ ಘನ ತ್ಯಾಜ್ಯ ಸ್ವಚ್ಛಗೊಳಿಸಿದರು. ಇನ್ನು ಈ ತಂಡದ ಕಾರ್ಯಕ್ಕೆ ಸ್ಥಳೀಯರು ಶ್ಲಾಘನೆ ವ್ಯಕ್ತಪಡಿಸಿದರು.

ಸಂಡೂರು ಸಮ್ಮಿಟರ್ಸ್​ ತಂಡದ ಮುಖಂಡ ಚಾರಣಿಗ ಶ್ರೀನಿವಾಸ್​ ಮಾತನಾಡಿ, ಕೆಲ ಅವಿವೇಕಿಗಳ ಮತ್ತು ಕಿಡಿಗೇಡಿಗಳ ಪರಿಸರ ವಿರೋಧಿ ಚಟುವಟಿಕೆಗಳಿಂದ ಹಾಗೂ ಅರಣ್ಯ ಇಲಾಖೆ ದಿವ್ಯ ಮೌನ (ನಿರ್ಲಕ್ಷ) ದಿಂದ ಈ ಕಾಡು ಅಳಿವಿನಂಚಿನಲ್ಲಿದೆ. ಹೀಗಾಗಿ ಶುಚಿತ್ವ ಕಾರ್ಯ ಕೈಗೆತ್ತಿಕೊಳ್ಳಲಾಗಿದೆ ಎಂದರು.

ಇನ್ನು ಸುರೇಶ ಘೋರ್ಪಡೆ ಮಾತನಾಡಿ, ಔಷಧೀಯ ಸಸ್ಯಗಳ ಸಂರಕ್ಷಣಾ ಪ್ರದೇಶವನ್ನು ಸಾರ್ವಜನಿಕರು ಹಾಗೂ ಅರಣ್ಯ ಇಲಾಖೆಯವರು ಅನೈತಿಕ ಚಟುವಟಿಕೆಗಳಿಗೆ ಆಸ್ಪದ ಕೊಡದಂತೆ ಕಡಿವಾಣ ಹಾಕಬೇಕು. ನಾವು ಸ್ವಚ್ಛಗೊಳಿಸಿರುವ ಈ ಪ್ರದೇಶವನ್ನು ಅಶುದ್ಧವಾಗದಂತೆ ಸಾರ್ವಜನಿಕರು ನೋಡಿಕೊಳ್ಳಬೇಕು ಎಂದು ಕರೆ ನೀಡಿದರು.