ಹೋಗ್ಬೇಕಿದ್ದು ಹೊಸಪೇಟೆ, ಬಂದಿಳಿದಿದ್ದು ಬಳ್ಳಾರಿ: ಬಸ್​​ನವರನ್ನು ಕೇಳಿದ್ರೆ ಉತ್ತರವಿಲ್ಲ

ನಗರದ ಹೊಸ ಬಸ್​ ನಿಲ್ದಾಣದಲ್ಲಿ ಖಾಸಗಿ ಬಸ್‌ಗಳ ಮಾಲೀಕರದ್ದೇ ದರ್ಬಾರ್ ನಡೆಯುತ್ತಿದೆ. ಸಾರಿಗೆ ಮುಷ್ಕರವನ್ನೇ ಲಾಭವಾಗಿರಿಸಿಕೊಂಡ ಖಾಸಗಿ ಬಸ್‌ನವರು, ಜನರ ದಾರಿ ತಪ್ಪಿಸುತ್ತಿದ್ದಾರೆ. ನೇರವಾಗಿ ವಸೂಲಿ ಮಾಡೋ ದಂಧೆಗೆ ಅವರು ಇಳಿದಿದ್ದಾರೆ.

ಬಳ್ಳಾರಿ: ಧರ್ಮಸ್ಥಳದಿಂದ ರಾತ್ರಿ ಬಸ್ ಹತ್ತಿದ್ದ ಪ್ರಯಾಣಿಕ ಹೋಗಬೇಕಾಗಿದ್ದು ಹೊಸಪೇಟೆಗೆ. ಆದರೆ, ಬೆಳಗ್ಗೆ ಬಸ್ ಇಳಿದು ನೋಡಿದರೆ ಆತ ಬಳ್ಳಾರಿಯಲ್ಲಿದ್ದ!. ಈ ಬಗ್ಗೆ ಖಾಸಗಿ ಬಸ್​ ಮಾಲೀಕರನ್ನು ಕೇಳಿದರೆ ಸರಿಯಾದ ಉತ್ತರ ನೀಡುತ್ತಿಲ್ಲವಂತೆ.

ಬೆಂಗಳೂರು, ಬಳ್ಳಾರಿ ಅಥವಾ ಹೊಸಪೇಟೆಗೆ ಬಸ್​ ಚಾರ್ಜ್​ 500 ರೂ. ಇದೆ. ಖಾಸಗಿ ಬಸ್​​ನವರು 1,500, 2,000 ಹೀಗೆ ಮನಸೋಇಚ್ಛೆ ಹಣ ವಸೂಲಿ ಮಾಡುತ್ತಿದ್ದಾರೆ ಎನ್ನುವ ಆರೋಪವಿದೆ.‌ ಹೆಚ್ಚುವರಿ ಹಣ ಕೊಟ್ಟರೂ ನಮ್ಮನ್ನು ಊರಿಗೆ ತಲುಪಿಸುತ್ತಾರೆ ಅನ್ನೋ ಭರವಸೆಯೇ ಇಲ್ಲ. ಏಕೆಂದರೆ ಧರ್ಮಸ್ಥಳದಿಂದ, ಹೊಸಪೇಟೆಗೆ ಬಸ್​​ ಹೋಗುತ್ತೆ ಎಂದು ಹತ್ತಿಸಿಕೊಂಡು ಬಳ್ಳಾರಿಗೆ ತಂದು ಬಿಟ್ಟಿದ್ದಾರೆ ಎಂದು ಪ್ರಯಾಣಿಕರೊಬ್ಬರು ಅಳಲು ತೋಡಿಕೊಂಡರು.

ನಗರದ ಹೊಸ ಬಸ್​ ನಿಲ್ದಾಣದಲ್ಲಿ ಖಾಸಗಿ ಬಸ್‌ಗಳ ಮಾಲೀಕರು ಆಡಿದ್ದೇ ಆಟ ಎನ್ನುವಂತಾಗಿದೆ. ಸಾರಿಗೆ ಮುಷ್ಕರವನ್ನೇ ಸ್ವಾರ್ಥಕ್ಕೆ ಬಳಸಿಕೊಂಡ ಖಾಸಗಿ ಬಸ್‌ನವರು, ಜನರ ಹಾದಿ ತಪ್ಪಿಸುತ್ತಿದ್ದಾರೆ. ಅವರು ನೇರವಾಗಿ ವಸೂಲಿ ದಂಧೆಗಿಳಿದಿದ್ದಾರೆ. ಆರ್.ಟಿ.ಒ ಅಧಿಕಾರಿಗಳು ಮತ್ತು ಸಂಬಂಧಪಟ್ಟ ಅಧಿಕಾರಿಗಳು ಈ ಬಗ್ಗೆ ಪ್ರಶ್ನಿಸುತ್ತಿಲ್ಲ ಅನ್ನೋದು ಸಾರ್ವಜನಿಕರ ಆರೋಪ.‌