ಜೆಎಸ್​ಡಬ್ಲ್ಯು ವರ್ತನೆ ಅಮಾನವೀಯ‌: ಪ್ರತಾಪ​ ರೆಡ್ಡಿ ಆರೋಪ

ಕೊರೊನಾ ಸಂದರ್ಭದಲ್ಲಿ ಉದಾತ್ತವಾಗಿ ವರ್ತಿಸಬೇಕಿದ್ದ ಜೆಎಸ್​ಡಬ್ಲ್ಯು ಕಂಪನಿ ಈಗ ಅತ್ಯಂತ ಅಮಾನವೀಯವಾಗಿ ವರ್ತಿಸುತ್ತಿದೆ ಎಂದು ಜೆಡಿಎಸ್ ಮುಖಂಡ, ಬುಡಾ ಮಾಜಿ ಅಧ್ಯಕ್ಷ ಪ್ರತಾಪ ರೆಡ್ಡಿ ಆರೋಪಿಸಿದ್ದಾರೆ.

ಬಳ್ಳಾರಿ:ಜೆಎಸ್​ಡಬ್ಲ್ಯು ಸಂಸ್ಥೆ ತನ್ನ ಕಾರ್ಮಿಕರೊಂದಿಗೆ ಅತ್ಯಂತ ಅಮಾನವೀಯವಾಗಿ ವರ್ತಿಸುತ್ತಿದ್ದು, ಸುಖಾಸುಮ್ಮನೆ ಕೆಲಸದಿಂದ ವಜಾ ಮಾಡಿ ನೋಟಿಸ್ ಕಳುಹಿಸುತ್ತಿದೆ ಎಂದು ಜೆಡಿಎಸ್ ಮುಖಂಡ, ಬುಡಾ ಮಾಜಿ ಅಧ್ಯಕ್ಷ ಪ್ರತಾಪ ರೆಡ್ಡಿ ಆರೋಪಿಸಿದ್ದಾರೆ.

ನಗರದ ತಮ್ಮ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಜೆಎಸ್​ಡಬ್ಲ್ಯು ಅನೇಕ ನೌಕರರನ್ನು ಏಕಾಏಕಿ ವಜಾ ಮಾಡುತ್ತಿದೆ. ಮನೆಗಳಿಗೆ ಪತ್ರ ಕಳುಹಿಸಿ, ದೂರವಾಣಿ ಕರೆ ಮಾಡಿ, ಇ-ಮೇಲ್ ಮೂಲಕ ವಜಾ ಮಾಡಿದ ಕುರಿತು ಮಾಹಿತಿ ನೀಡುತ್ತಿದೆ. ಕೊರೊನಾ ಹಾವಳಿಯ ಇಂತಹ ಸಂದರ್ಭದಲ್ಲಿ ಉದಾತ್ತವಾಗಿ ವರ್ತಿಸಬೇಕಿದ್ದ ಕಂಪನಿ ಈಗ ಅತ್ಯಂತ ಅಮಾನವೀಯವಾಗಿ ವರ್ತಿಸುತ್ತಿದೆ. ತಕ್ಷಣ ಅಧಿಕಾರಿಗಳು ಈ ಧೋರಣೆ ಬದಲಾಯಿಸಿಕೊಳ್ಳಬೇಕು ಎಂದರು.

ಕೊರೊನಾ ಭಯಕ್ಕೆ ಅನೇಕರು ಸರಿಯಾಗಿ ಕೆಲಸಕ್ಕೆ ಹೋಗುತ್ತಿಲ್ಲ. ಅಂತಹವರ ಮನೆಗೆ ಪತ್ರ ಕಳುಹಿಸುವ ಸಂಸ್ಥೆ ತಮ್ಮನ್ನು ಕೆಲಸದಿಂದ ತೆಗೆದು ಹಾಕಲಾಗಿದೆ ಎಂದು ತಿಳಿಸುತ್ತಿದೆ. ಇನ್ನು ಕೆಲವರಿಗೆ ದೂರವಾಣಿ ಕರೆ ಮಾಡಿ ನಿಗದಿತ ದಿನಾಂಕದಂದು ಕಚೇರಿಗೆ ಬಂದು ರಾಜೀನಾಮೆ ಪತ್ರಕ್ಕೆ ಸಹಿ ಮಾಡುವಂತೆ ತಿಳಿಸುತ್ತಿದ್ದಾರೆ. ಕೆಲವರಿಗೆ ಇ-ಮೇಲ್ ಮೂಲಕ ಟರ್ಮಿನೇಟ್ ಮಾಡಿದ ಕುರಿತು ಪತ್ರ ಕಳುಹಿಸುತ್ತಿದ್ದಾರೆ. ಇದು ಅತ್ಯಂತ ಅಮಾನವೀಯ. ಇಂತಹ ಸಂದರ್ಭದಲ್ಲಿ ಸಂಸ್ಥೆ ತನ್ನ ನೌಕರರ ಪರ ನಿಲ್ಲಬೇಕಿತ್ತು. ಆದರೆ ಈಗ ಅವರನ್ನು ಬೀದಿಗೆ ತರುವ ಕೆಲಸ ಮಾಡುತ್ತಿದೆ ಎಂದು ಕುಟುಕಿದರು.

ಹಾಗೆ ನೋಡಿದರೆ ಜಿಲ್ಲೆಯಲ್ಲಿ ಮೊದಲ ಹಂತದಲ್ಲಿಯೇ ಕೊರೊನಾ ಸೋಂಕು ನಿಯಂತ್ರಿಸುವಲ್ಲಿ ಜಿಲ್ಲಾಡಳಿತ ಯಶ ಕಂಡಿತ್ತು. ಜಿಲ್ಲಾಧಿಕಾರಿ, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅತ್ಯಂತ ಪರಿಣಾಮಕಾರಿಯಾಗಿ ಕೆಲಸ ಮಾಡಿ, ಕೊರೊನಾ ನಿಯಂತ್ರಿಸಿದ್ದರು. ಒಂದು ಹಂತದಲ್ಲಿ ಸೋಂಕು ಸಂಪೂರ್ಣ ನಿವಾರಣೆ ಆಗುವ ಹಂತಕ್ಕೆ ತಲುಪಿತ್ತು. ಆದರೆ ಈ ಹಂತದಲ್ಲಿ ಜೆಎಸ್​ಡಬ್ಲ್ಯು ಸಂಸ್ಥೆಯ ಅಧಿಕಾರಿಗಳು ತೋರಿದ ನಿರ್ಲಕ್ಷ್ಯದಿಂದ ಸೋಂಕು ಒಮ್ಮೆಲೇ ಸ್ಫೋಟಗೊಂಡಿತು ಎಂದು ಆರೋಪಿಸಿದರು.

ತಮಿಳುನಾಡಿನಿಂದ ವಾಪಸ್ಸಾದ ಸಂಸ್ಥೆಯ ಅಧಿಕಾರಿಯನ್ನು ಕ್ವಾರಂಟೈನ್ ಮಾಡದ ಸಂಸ್ಥೆಯ ಅಧಿಕಾರಿಗಳು ಸೋಂಕು ಹರಡಲು ಕಾರಣರಾದರು. ಈಗ ಇಡೀ ಜಿಲ್ಲೆಯಲ್ಲಿ ಕೊರೊನಾ ಆವರಿಸಲು ಕಾರಣ ಆಗಿರುವುದು ಇದೇ ಸಂಸ್ಥೆಯ ಅಧಿಕಾರಿಗಳ ವರ್ತನೆ ಎಂದು ಅವರು ಆಪಾದಿಸಿದರು.

ಜಿಲ್ಲಾಡಳಿತ ಕೂಡಲೇ ಜೆಎಸ್​ಡಬ್ಲು ವಸತಿ ಸಮುಚ್ಚಯದಲ್ಲಿ ಮನೆ ಮನೆ ಸಮೀಕ್ಷೆ ಮಾಡಬೇಕು. ಈ ಹಂತದಲ್ಲಿ ಸಂಸ್ಥೆಯ ಅಧಿಕಾರಿಗಳು ಪರೀಕ್ಷೆಯನ್ನು ವೇಗವಾಗಿ ಮಾಡದೆ ನಿಧಾನ ಮಾಡಿ ಎಂದು ತಿಳಿಸುತ್ತಿದ್ದಾರೆ. ಇದಕ್ಕೆ ಕಾರಣ ಏನು ಎಂದು ಪ್ರಶ್ನಿಸಿದ ಅವರು, ಜಿಲ್ಲಾಡಳಿತ ತಕ್ಷಣ ಕಠಿಣ ಕ್ರಮ ವಹಿಸಲು ಮುಂದಾಗಬೇಕು ಎಂದು ಆಗ್ರಹಿಸಿದರು.