ಬಳ್ಳಾರಿಯಲ್ಲಿ ಭಾರಿ ಮಳೆ: ಟೆಂಟ್​ಗೆ ನೀರು ನುಗ್ಗಿ ಗಣೇಶ ಮೂರ್ತಿಗಳು ಭಗ್ನ, ಸಂಕಷ್ಟದಲ್ಲಿ ತಯಾರಕರು

ಕೋಲ್ಕತ್ತಾ ಮೂಲದ ಕಲಾವಿದರು ಕಳೆದ ನಾಲ್ಕೈದು ತಿಂಗಳಿನಿಂದ ನೂರಾರು ಗಣೇಶ ಮೂರ್ತಿಗಳನ್ನ ಸಿದ್ಧಪಡಿಸಿದ್ರು. ಆದರೆ ಶನಿವಾರ ರಾತ್ರಿ ಸುರಿದ ಭಾರಿ ಮಳೆಯಿಂದ ನೀರು ಟೆಂಟ್​ಗೆ ನುಗ್ಗಿದ ಪರಿಣಾಮ ಗಣೇಶನ ಮೂರ್ತಿಗಳು ಹಾಳಾಗಿವೆ. ಇದು ಕಲಾವಿದರ ಸಂಕಷ್ಟಕ್ಕೆ ಕಾರಣವಾಗಿದೆ.

ಬಳ್ಳಾರಿ: ಕಳೆದ ನಾಲ್ಕೈದು ತಿಂಗಳಿನಿಂದ ಕೋಲ್ಕತ್ತಾ ಮೂಲದ ಕಲಾವಿದರ ಕುಟುಂಬವೊಂದು ಬಳ್ಳಾರಿಯ ರಾಮೇಶ್ವರಿ ನಗರದ ಬಳಿ ಪರಿಸರ ಸ್ನೇಹಿ ಮಣ್ಣಿನ ಗಣೇಶನ ಮೂರ್ತಿಗಳನ್ನು ಸಿದ್ಧಪಡಿಸಿತ್ತು. ನೂರಾರು ಮೂರ್ತಿಗಳು ಈಗಾಗಲೇ ಸಿದ್ಧಗೊಂಡಿದ್ದವು. ಇನ್ನೇನು ಸಾರ್ವಜನಿಕರಿಗೆ ಮಾರಾಟ ಮಾಡಬೇಕು ಎನ್ನುವಷ್ಟರಲ್ಲಿ ನಿನ್ನೆ ತಡರಾತ್ರಿ ಸುರಿದ ಧಾರಾಕಾರ ಮಳೆ ಅವಾಂತರಗಳನ್ನು ಸೃಷ್ಟಿ ಮಾಡಿದೆ.

ನೂರಾರು ಗಣೇಶನ ಮೂರ್ತಿಗಳನ್ನು ಸಿದ್ಧಪಡಿಸಿ ಶೆಡ್​ನೊಳಗೆ ಇಡಲಾಗಿತ್ತು. ಆದ್ರೆ ಜೋರು ಮಳೆ ಬಂದ ಹಿನ್ನೆಲೆ ಶೆಡ್​ನೊಳಗೆ ನೀರು ನುಗ್ಗಿದೆ. ಹಾಗಾಗಿ ನೂರಾರು ಗಣೇಶನ ಮೂರ್ತಿಗಳು ಹಾನಿಯಾಗಿವೆ. ಇದರಿಂದಾಗಿ ಕಲಾವಿದರು ಭಾರಿ ನಷ್ಟ ಎದುರಿಸುವಂತಾಗಿದೆ. ಮಣ್ಣಿನ ಗಣೇಶನ ಮೂರ್ತಿಗಾಗಿ ಸಾರ್ವಜನಿಕರು ಮುಂಗಡ ಹಣ ಸಹ ನೀಡಿದ್ರು. ಈಗ ಮುಂಗಡ ಹಣ ನೀಡಿದವರೆಲ್ಲಾ ಗಣೇಶನ ಮೂರ್ತಿಗಳು ಬೇಕು ಅಂತಾ ಕೇಳುತ್ತಿದ್ದಾರೆ.

ಆದರೆ ಗಣೇಶನ ಮೂರ್ತಿಗಳಿಗೆ ಸಾಕಷ್ಟು ಹಾನಿಯಾಗಿದೆ. ಈಗ ಸರಿಪಡಿಸುವಷ್ಟು ಕಾಲಾವಕಾಶ ಇಲ್ಲ. ಹೀಗಾಗಿ ಕೆಲವರು ಮುಂಗಡ ಹಣ ವಾಪಸ್ ನೀಡುವಂತೆ ಕೇಳುತ್ತಿದ್ದಾರೆ. ಇದು ಕೋಲ್ಕತ್ತಾ ಕಲಾವಿದರಿಗೆ ಭಾರಿ ನಷ್ಟ ಉಂಟು ಮಾಡಿದೆ. ನಾಲ್ಕೈದು ತಿಂಗಳಿನಿಂದ ಹಗಲು-ರಾತ್ರಿ ಕಷ್ಟಪಟ್ಟು ಗಣೇಶನ ಮೂರ್ತಿಗಳನ್ನು ಸಿದ್ಧಪಡಿಸಿದ್ದೇವೆ. ಆದರೆ ಮಳೆಗೆ ಬಹುತೇಕ ಗಣೇಶನ ಮೂರ್ತಿಗಳಿಗೆ ಹಾನಿಯಾಗಿದ್ದು, ತುಂಬಾ ನಷ್ಟವಾಗಿದೆ ಅಂತಾರೆ ಕಲಾವಿದರು‌.

ಇದನ್ನೂ ಓದಿ: ತಡರಾತ್ರಿ ಸುರಿದ ಭಾರಿ ಮಳೆಗೆ ಕೆಸರುಗದ್ದೆಯಾದ ತರಕಾರಿ ಮಾರುಕಟ್ಟೆ