ಮತಯಾಚನೆ ವೇಳೆ ಯುಪಿಎಸ್​ಸಿ ಪರೀಕ್ಷೆಯಲ್ಲಿ 423ನೇ ಸ್ಥಾನ ಪಡೆದ ಅಶ್ವಿಜಾಗೆ ಶೆಟ್ಟರ್​ ಅಭಿನಂದನೆ

ಬಳ್ಳಾರಿ ಜಿಲ್ಲೆಯಲ್ಲಿ ಬಿಜೆಪಿ ಅಭ್ಯರ್ಥಿ ಪರ ಮಾಜಿ ಸಿಎಂ ಮತಬೇಟೆ- ವೈ.ದೇವೇಂದ್ರಪ್ಪ ಪರ ಮತಯಾಚನೆ ಮಾಡಿದ ಜಗದೀಶ ಶೆಟ್ಟರ್- ಇದೇ ವೇಳೆ ಕೇಂದ್ರ ಲೋಕಸೇವಾ ಆಯೋಗದ (ಯುಪಿಎಸ್‌ಸಿ) ಪರೀಕ್ಷೆಯಲ್ಲಿ 423ನೇ ಸ್ಥಾನ ಪಡೆದ ಅಶ್ವಿಜಾಗೆ ಅಭಿನಂದನೆ

ಬಳ್ಳಾರಿ:ತಾಲೂಕಿನ ವಿವಿಧ ಗ್ರಾಮಗಳಲ್ಲಿ ಬಳ್ಳಾರಿ‌ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ವೈ.ದೇವೇಂದ್ರಪ್ಪ ಪರ ಮಾಜಿ ಸಿಎಂ ಜಗದೀಶ ಶೆಟ್ಟರ್​ ಇಂದು ಮತಯಾಚಿಸಿದರು.

ಸಂಗನಕಲ್ಲು ಗ್ರಾಮದಲ್ಲಿಅಭ್ಯರ್ಥಿದೇವೇಂದ್ರಪ್ಪ ಪರ ಮತಬೇಟೆ ನಡೆಸಿದರು. ಈ ದೇಶದಲ್ಲಿ ಚುನಾವಣಾ ಪರ್ವ ಶುರುವಾಗಿದೆ. ದೇಶಕ್ಕೆ ಸಮರ್ಥ ನಾಯಕತ್ವದ ಅಗತ್ಯತೆಯಿದೆ. ಹಾಗಾಗಿ, ಮತ್ತೊಮ್ಮೆ ಪ್ರಧಾನಿ ನರೇಂದ್ರ ಮೋದಿ ಅಧಿಕಾರದ ಚುಕ್ಕಾಣೆ ಹಿಡಿಯಬೇಕಿದೆ. ಪ್ರಜ್ಞಾವಂತ ಮತದಾರರು ಮೋದಿಯವರಿಗೆ ತಮ್ಮ ಮತ ಹಾಕಬೇಕು ಎಂದು ಮನವಿ ಮಾಡಿದರು.

ಅಶ್ವಿಜಾಗೆ ಅಭಿನಂದನೆ:

ಇನ್ನು ಈ ಗ್ರಾಮ ಶೈಕ್ಷಣಿಕವಾಗಿ ಸಾಕಷ್ಟು ಮುಂದುವರಿದಿದೆ. ಗ್ರಾಮದ ವಿದ್ಯಾರ್ಥಿನಿ ಬಿ.ವಿ. ಅಶ್ವಿಜಾ ಅವರು ಕೇಂದ್ರ ಲೋಕಸೇವಾ ಆಯೋಗದ (ಯುಪಿಎಸ್‌ಸಿ) ಪರೀಕ್ಷೆಯಲ್ಲಿ 423ನೇ ಸ್ಥಾನ ಪಡೆದು ಸಾಧನೆ ಮಾಡಿದ್ದಾರೆ. ಆ ವಿದ್ಯಾರ್ಥಿನಿಗೆ ಅಭಿನಂದನೆ ಸಲ್ಲಿಸುವುದಾಗಿ ತಿಳಿಸಿದರು. ಅಲ್ಲದೆ ಇಡೀ ದೇಶದಲ್ಲೇ ಈ ಗ್ರಾಮದ ಹೆಸರು ಅಚ್ಚಳಿಯದಂತೆ ಉಳಿದಿದೆ ಎಂದು ಅಶ್ವಿಜಾಳ ಸಾಧನೆ ಕೊಂಡಾಡಿದರು.

ಉಗ್ರಪ್ಪನವರೇ ಜಮೀನಿನಲ್ಲಿ ಕೆಲಸ ಮಾಡಿದ ಅನುಭವ ಇದೆಯಾ?

ಬಿಜೆಪಿ ರೈತಮೋರ್ಚಾ ರಾಜ್ಯ ಘಟಕದ ಉಪಾಧ್ಯಕ್ಷ ಎಸ್. ಗುರುಲಿಂಗನಗೌಡ‌ ಮಾತನಾಡಿ, ವೈ.ದೇವೇಂದ್ರಪ್ಪ ಅನಕ್ಷರಸ್ಥ. ಅವರಿಗೆ ಭಾಷೆಯ ಸಂವಹನ ಗೊತ್ತಿಲ್ಲವೆಂದು ಕಾಂಗ್ರೆಸ್​ ಅಭ್ಯರ್ಥಿ ಉಗ್ರಪ್ಪ ಹೇಳುತ್ತಿದ್ದಾರೆ. ಹಾಗಾದ್ರೆ ಉಗ್ರಪ್ಪನವರೇ ನಿಮಗೇನಾದ್ರೂ ಜಮೀನಿನಲ್ಲಿ ಕೆಲಸ ಮಾಡಿದ ಅನುಭವ ಇದೆಯಾ? ನಮ್ಮ ಪಕ್ಷದ ಅಭ್ಯರ್ಥಿ ದೇವೇಂದ್ರಪ್ಪ, ಹೊಲದಲ್ಲಿ ಕೆಲಸ ಮಾಡಿದ್ದಾರೆ. ಅದು ನಿಜವಾದ ರೈತಾಪಿ ವರ್ಗದ ಕಾಳಜಿ ಎಂದು ಕಾಂಗ್ರೆಸ್​ ಅಭ್ಯರ್ಥಿ ವಿರುದ್ಧ ವಾಗ್ದಾಳಿ ನಡೆಸಿದರು.

ನನಗೂ ಮತ್ತು ಆತನಿಗೂ ಎರಡು ಎತ್ತುಗಳನ್ನು ಕೊಡಲಿ:

ಇನ್ನು ಇದೇ ವೇಳೆ ಬಿಜೆಪಿ ಅಭ್ಯರ್ಥಿ ವೈ. ದೇವೇಂದ್ರಪ್ಪ ಮಾತನಾಡಿ, ನನಗೂ ಮತ್ತು ಆತನಿಗೂ(ಉಗ್ರಪ್ಪಗೂ) ಎರಡು ಎತ್ತುಗಳನ್ನು ಕೊಡಲಿ. ನಾನು ಹೊಲಕ್ಕೆ ಹೋಗುತ್ತೇನೆ, ಆತನೂ ಬರಲಿ. ವ್ಯವಸಾಯ ಮಾಡೋಣ. ಯಾರು ನಿಜವಾದ ರೈತರು ಅಂತಾ ಗೊತ್ತಾಗುತ್ತೆ ಎಂದು ಕಾಂಗ್ರೆಸ್​ ಅಭ್ಯರ್ಥಿ ಉಗ್ರಪ್ಪಗೆ ಸವಾಲು ಹಾಕಿದರು.