ಮಾಮನಿ ಸೇರಿ ಅಗಲಿದ ಗಣ್ಯರಿಗೆ ಪರಿಷತ್​ನಲ್ಲಿ ಸಂತಾಪ: ಕಲಾಪ ನಾಳೆಗೆ ಮುಂದೂಡಿಕೆ

ಸುವರ್ಣಸೌಧದಲ್ಲಿ ಇಂದಿನಿಂದ ಆರಂಭಗೊಂಡಿರುವ ಚಳಿಗಾಲದ ಅಧಿವೇಶನದಲ್ಲಿ ಮೊದಲ ದಿನವಾದ ಇಂದು ಇತ್ತೀಚೆಗೆ ಅಗಲಿದ ಗಣ್ಯರಿಗೆ ಸಂತಾಪ ಸೂಚಿಸಲಾಯಿತು.

ಬೆಂಗಳೂರು: ಉಪ ಸಭಾಪತಿ ಆನಂದ್ ಮಾಮನಿ ಸೇರಿದಂತೆ ಇತ್ತೀಚೆಗೆ ಅಗಲಿದ 10 ಮಂದಿ ಗಣ್ಯರಿಗೆ ವಿಧಾನ ಪರಿಷತ್​ನಲ್ಲಿ ಸಂತಾಪ ಸೂಚಿಸಲಾಯಿತು. ಮೃತ ಗಣ್ಯರು ರಾಜಕೀಯ, ಸಾಮಾಜಿಕ ಕ್ಷೇತ್ರಕ್ಕೆ ನೀಡಿದ್ದ ಕೊಡುಗೆಯನ್ನು ಸದನದಲ್ಲಿ ಸ್ಮರಿಸಲಾಯಿತು. ನಂತರ ಕಲಾಪವನ್ನು ನಾಳೆ ಬೆಳಗ್ಗೆ 11 ಗಂಟೆಗೆ ಮುಂದೂಡಲಾಯಿತು.

ಕುಂದಾನಗರಿಯ ಸುವರ್ಣಸೌಧದಲ್ಲಿ ಇಂದಿನಿಂದ ಚಳಿಗಾಲದ ಅಧಿವೇಶನ ಆರಂಭಗೊಂಡಿದ್ದು, ವಂದೇಮಾತರಂ ಗೀತೆಯೊಂದಿಗೆ ವಿಧಾನ ಪರಿಷತ್ ಕಲಾಪವನ್ನು ಆರಂಭಿಸಲಾಯಿತು. ಕಲಾಪ ಆರಂಭಗೊಳ್ಳುತ್ತಿದ್ದಂತೆ ಇತ್ತೀಚೆಗೆ ಅಗಲಿದ ಗಣ್ಯರಿಗೆ ಸಂತಾಪ ಸೂಚನೆಯನ್ನು ಸಭಾಪತಿ ರಘುನಾಥರಾವ್ ಮಲ್ಕಾಪುರೆ ಮಂಡಿಸಿದರು. ಉಪ ಸಭಾಪತಿ ಆನಂದ ಮಾಮನಿ, ಮಾಜಿ ಸಚಿವ ಜಬ್ಬರ್ ಖಾನ್ ಹೊನ್ನಳ್ಳಿ, ಮಾಜಿ ಸಚಿವ ಎಸ್.ಎಸ್.ಪೂಜಾರಿ, ಮಾಜಿ ಸಚಿವ ಸುದೀಂಧ್ರರಾವ್ ಕಸಬೆ, ಮಾಜಿ ಸಂಸದ ಕೋಳೂರು ಬಸವನಗೌಡರು, ರಾಜ್ಯಸಭೆ ಮಾಜಿ ಸದಸ್ಯ ಅಬ್ದುಲ್ ಸಿದ್ದಕಿ, ನಟ ಟಿ.ಎಸ್.ಲೋಹಿತಾಶ್ವ, ಯಕ್ಷಗಾನ ಭಾಗವತ ಬಂಗಾರ್ ಆಚಾರ್, ಆಧುನಿಕ ಭಗೀರಥ ಕಲ್ಮನೆ ಕಾಮೇಗೌಡ, ವೇದಾಂತ ವಿಜ್ಞಾನಿ ಡಾ.ಆರ್.ಎಲ್ ಕಶ್ಯಪ್ ನಿಧನಕ್ಕೆ ಸಂತಾಪ ಸೂಚನೆ ಮಂಡಿಸಿದರು.

ಸಭಾಪತಿಗಳು ಮಂಡಿಸಿದ ಸಂತಾಪ ಸೂಚನೆ ನಿರ್ಣಯಕ್ಕೆ ಸಭಾನಾಯಕ ಕೋಟಾ ಶ್ರೀನಿವಾಸ ಪೂಜಾರಿ ಸಹಮತ ವ್ಯಕ್ತಪಡಿಸಿದರು. ಮಾಮನಿ ಸೇರಿ 10 ಜನರ ನಿಧನಕ್ಕೆ ಸರ್ಕಾರದ ಪರ ಸಹಮತವಿದೆ. ಆನಂದ್ ಮಾಮನಿ ಅನಾರೋಗ್ಯದ ನಡುವೆ ನಮ್ಮ ಜೊತೆ ಮುಂಗಾರು ಅಧಿವೇಶನದಲ್ಲಿ ಕೆಲಸ ಮಾಡಿದ್ದರು. ಹತ್ತಿ ವ್ಯಾಪಾರದಿಂದ ವಿಧಾನಸೌಧದವರೆಗೆ ಶಕ್ತಿ ಕ್ರೋಢೀಕರಿಸಿಕೊಂಡು ಬೆಳೆಯಲು ಮಾಮನಿ ನಿದರ್ಶನ ಎಂದು ವ್ಯಾಖ್ಯಾನಿಸಲಾಗಿತ್ತು.

56 ವರ್ಷ ಬದುಕಿದ್ದ ಮಾಮನಿ ಕ್ಷೇತ್ರದ ಜನತೆ ಜೊತೆ ಭಾವನಾತ್ಮಕ ಸಂಬಂಧ ಇರಿಸಿಕೊಂಡಿದ್ದರು. ನೀರಾವರಿ ಕ್ಷೇತ್ರದ ಬಗ್ಗೆ ಆಸಕ್ತಿ ವಹಿಸಿ ಕೆಲಸ ಮಾಡಿದ್ದರು. ಆಧ್ಯಾತ್ಮದಲ್ಲಿಯೂ ಅವರಿಗೆ ವಿಶೇಷ ಆಸಕ್ತಿ ಇತ್ತು. ಸವದತ್ತಿಯ ಎಲ್ಲ ಸಮಸ್ಯೆ ಪರಿಹರಿಸಿ ಧಾರ್ಮಿಕ ಕೇಂದ್ರದಲ್ಲಿ ಉತ್ತಮ ವ್ಯವಸ್ಥೆ ಕಲ್ಪಿಸಿದ್ದರು. ಮೂರು ಬಾರಿ ಶಾಸಕರಾಗಿದ್ದರು, ಅವರ ತಂದೆಯೂ ಉಪ ಸಭಾಧ್ಯಕ್ಷರಾಗಿದ್ದರು, ಅವರಂತೆ ಇವರೂ ಉಪ ಸಭಾಧ್ಯಕ್ಷರಾಗಿದ್ದರು. ಯೋಗ್ಯ ಶಾಸಕ, ರಾಜಕಾರಣಿಯನ್ನು ರಾಜ್ಯ ಕಳೆದುಕೊಂಡಂತಾಗಿದೆ ಎಂದರು.

ಜಬ್ಬರ್ ಖಾನ್ ಹೊನ್ನಳ್ಳಿ ಶಿಕ್ಷಕರಾಗಿ ಕೆಲಸ ಮಾಡಿ ಧರಂ ಸಿಂಗ್ ಸಂಪುಟದಲ್ಲಿ ಸಚಿವರಾಗಿದ್ದರು. ಶಾಂತಿ ಸುವ್ಯವಸ್ಥೆ ಕಾಪಾಡುವ ನಿಟ್ಟಿನಲ್ಲಿ ಕೆಲಸ ಮಾಡಿದ್ದರು. ಎಸ್.ಎಸ್.ಪೂಜಾರಿ ಶಿಕ್ಷಕ ಕ್ಷೇತ್ರದಿಂದ ಸ್ವತಂತ್ರ ಅಭ್ಯರ್ಥಿಯಾಗಿ ಆಯ್ಕೆಯಾಗಿದ್ದರು. ಶಿಕ್ಷಣ, ಮತ್ತು ಶಿಕ್ಷಕರ ಬಗ್ಗೆ ಬಹಳ ಕಾಳಜಿ ಹೊಂದಿದ್ದರು. ಸುದೀಂಧ್ರರಾವ್ ಕಸಬೆ, ಗುಂಡೂರಾವ್ ಸಂಪುಟದಲ್ಲಿ ಸಚಿವರಾಗಿ, ಹಿಂದುಳಿದ ವರ್ಗಗಳ ಸಬಲೀಕರಣಕ್ಕಾಗಿ ದುಡಿದಿದ್ದರು. ಹಿಂದುಳಿದ, ಕೃಷಿಕರ ಬಗ್ಗೆ ರಾಜಕಾರಣ ಮಾಡಿದ್ದರು.

ಕೋಳೂರು ಬಸವನಗೌಡರು ಸಂಸದರಾಗಿ, ಶಿಕ್ಷಣ ಕ್ಷೇತ್ರದಲ್ಲಿ ಕೆಲಸ ಮಾಡಿದ್ದರು. ರಾಜ್ಯಸಭೆ ಮಾಜಿ ಸದಸ್ಯ ಅಬ್ದುಲ್ ಸಿದ್ದಕಿ, ನಗರಸಭೆಯಿಂದ ರಾಜ್ಯಸಭೆವರೆಗೆ ರಾಜಕಾರಣದ ಬುದುಕು ಬೆಳೆಸಿಕೊಂಡು, ಪ್ರೌಢ, ಪ್ರಾಥಮಿಕ ಶಾಲೆ ತೆರೆದಿದ್ದರು. ಇವರ ನಿಧನದಿಂದ ಸಾಮಾಜಿಕ ಕ್ಷೇತ್ರ ಉತ್ತಮ ವ್ಯಕ್ತಿಯನ್ನು ಕಳೆದುಕೊಂಡಂತಾಗಿದೆ. ಟಿಎಸ್ ಲೋಹಿತಾಶ್ವ, ಒಳ್ಳೆಯ ರಂಗಕಲಾವಿದ, ಸಿನಿಮಾ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ನಾಟಕ ಅಕಾಡಮಿ ಪ್ರಶಸ್ತಿ ಪಡೆದಿದ್ದರು. ಶ್ರೇಷ್ಟ ರಂಗಕರ್ಮಿ ಕಳೆದುಕೊಂಡಿದೆ ಎಂದರು.

ಬಂಗಾರ್ ಆಚಾರ್, ಯಕ್ಷಗಾನ ಕಲಾವಿದರಾದರಾಗಿದ್ದು, ಅವರ ನಿಧನ ತುಂಬಲಾರದ ನಷ್ಟವಾಗಿದೆ. ಮೂಡಲಪಾಯ ಯಕ್ಷಗಾನ ಭಾಗವತರಾಗಿದ್ದರು. ಜನಪದ ಪರಿಷತ್ತಿನ ಲೋಕದಲ್ಲಿ ದೊಡ್ಡ ಗೌರವಕ್ಕೆ ಪಾತ್ರರಾಗಿದ್ದರು. ಕಲ್ಮನೆ ಕಾಮೇಗೌಡರು ಆಧುನಿಕ ಭಗೀರಥ ಎಂದು ಕರೆದಿದ್ದರು. ಮಂಡ್ಯದ ಮಳವಳ್ಳಿಯಲ್ಲಿ ಕುರಿಗಾಯಿಯಾಗಿದ್ದರು. ಅವರು ಬೆಟ್ಟದ ಮೇಲೆ ಕಟ್ಟೆ ಕಟ್ಟುತ್ತಾರೆ ಹಾಗಾಗಿಯೇ ಅವರನ್ನು ಕಟ್ಟೆ ಕಾಮೇಗೌಡ ಎಂದು ಕರೆಯುತ್ತಿದ್ದರು. 16 ಕಟ್ಟೆ ಕಟ್ಟಿದ್ದಾರೆ.

ಕರೆ ಕಟ್ಟೆ ಮೂಲಕ ಪ್ರಾಣಿ ಪಕ್ಷಗಳಿಗೆ ನೀರು, ಅಂತರ್ಜಲ ಹೆಚ್ಚಿಸಲು ಕೊಡುಗೆ ನೀಡಿದ್ದಾರೆ. ಆದರ್ಶ ಸಮಾಜ ಸೇವಕರಾಗಿ ಕೆಲಸ ಮಾಡಿದ್ದಾಗಿ ರಾಜ್ಯೋತ್ಸವ ಪ್ರಶಸ್ತಿ ನೀಡಲಾಗಿದೆ. ಮೋದಿ ಅವರೇ ಮನ್ ಕಿ ಬಾತ್​ನಲ್ಲಿ ಕಾಮೇಗೌಡರ ಹೆಸರು ಉಲ್ಲೇಖಿಸಿದ್ದರು. ಡಾ.ಕಶ್ಯಪ ವೇದಾಂತ ವಿಜ್ಞಾನಿಯಾಗಿದ್ದು, 33 ವರ್ಷ ಪ್ರಾಧ್ಯಾಪಕರಾಗಿ ಕೆಲಸ ಮಾಡಿದ್ದರು, ಪದ್ಮ ಶ್ರೀ, ರಾಜ್ಯೋತ್ಸವ ಪ್ರಶಸ್ತಿ ಸಂದಿದೆ, ಅಪಾರ ಕೆಲಸ ಮಾಡಿದ ಕಶ್ಯಪ್ ಸಂತಾಪಕ್ಕೆ ಸಹಮತವಿದೆ ಎಂದರು.

ಪ್ರತಿಪಕ್ಷ ಕಾಂಗ್ರೆಸ್ ಪರವಾಗಿ ಮುಖ್ಯ ಸಚೇತಕ ಪ್ರಕಾಶ್ ರಾಥೋಡ್ ಸಂತಾಪ ಸೂಚನೆಗೆ ಸಹಮತ ವ್ಯಕ್ತಪಡಿಸಿದರು. ಕಾಂಗ್ರೆಸ್​ನ ಚನ್ನರಾಜ್ ಮಾತನಾಡಿ, ಮಾಮನಿ ಇದೇ ಸರ್ಕಾರದಲ್ಲಿ ಮಂತ್ರಿಯಾಗುತ್ತೇನೆ ಎಂದಿದ್ದರು. ಆದರೆ ಅವರ ಆಸೆ ಈಡೇರಲೇ ಇಲ್ಲ ಎನ್ನುತ್ತಾ ಬೇರೆ ಪಕ್ಷವಾದರೂ ಅವರೊಂದಿಗೆ ಇದ್ದ ಒಡನಾಟವನ್ನು ಸ್ಮರಿಸಿ ಸಂತಾಪ ಸೂಚಿಸಿದರು.

ಸಚಿವ ಗೋವಿಂದ ಕಾರಜೋಳ, ಬಿಜೆಪಿ ಸದಸ್ಯೆ ತೇಜಸ್ವಿನಿಗೌಡ, ಕಾಂಗ್ರೆಸ್ ಸದಸ್ಯ ಸಲೀಂ ಅಹಮದ್, ಬಿಜೆಪಿ ಸದಸ್ಯ ಪ್ರತಾಪ್ ಸಿಂಹ ನಾಯಕ್, ರವಿಕುಮಾರ್, ಸಂಕನೂರು ಸಂತಾಪ ಸೂಚನೆ ನಿರ್ಣಯ ಬೆಂಬಲಿಸಿ ಮಾತನಾಡಿದರು.

ಶ್ರೀಶೈಲಪ್ಪ ಬಿದರೂರು, ಕುಂಬ್ಳೆ ಸುಂದರರಾಯ ಅವರ ನಿಧನಕ್ಕೂ ಸಂತಾಪ ಸೂಚಿಸಬೇಕು ಎಂದು ಸದಸ್ಯರು ಪ್ರಸ್ತಾಪಿಸಿದರು. ಪಟ್ಟಿಯಲ್ಲಿ ಬಿಟ್ಟಿರುವ ಹೆಸರುಗಳನ್ನು ಸೇರಿಸಿ ಮತ್ತೊಮ್ಮೆ ಸಂತಾಪ ಸೂಚಿಸುವ ಕುರಿತು ಸಭಾಪತಿ ರಘುನಾಥರಾವ್ ಮಲ್ಕಾಪುರೆ ಭರವಸೆ ನೀಡಿದರು. ನಂತರ ಮೃತರ ಆತ್ಮಕ್ಕೆ ಸದ್ಗತಿ ಕೋರುತ್ತಾ ಅವರ ಅಗಲಿಕೆಯ ನೋವನ್ನು ಸಹಿಸುವ ಶಕ್ತಿಯನ್ನು ಅವರ ಕುಟುಂಬ ವರ್ಗಕ್ಕೆ ಪರಮಾತ್ಮ ಕರುಣಿಸಲೆಂದು ಪ್ರಾರ್ಥಿಸುತ್ತಾ, ಮೃತರ ಗೌರವಾರ್ಥ ಒಂದು ನಿಮಿಷ ಮೌನವನ್ನು ಆಚರಿಸಿ ಗೌರವ ಸಲ್ಲಿಸಲಾಯಿತು.

ನಂತರ ಸದನದಲ್ಲಿ ಪ್ರಸ್ತಾಪಿಸಿದ ಸಂತಾಪ ಸೂಚನೆಯ ನಿರ್ಣಯವನ್ನು ಮೃತ ಗಣ್ಯರ ಕುಟುಂಬ ವರ್ಗದವರಿಗೆ ಕಳುಹಿಸಿಕೊಡಲಾಗುತ್ತದೆ ಎಂದು ಪ್ರಕಟಿಸಿದ ಸಭಾಪತಿ ರಘುನಾಥರಾವ್ ಮಲ್ಕಾಪುರೆ ಸದನದವನ್ನು ನಾಳೆ ಬೆಳಗ್ಗೆ 11 ಗಂಟೆಗೆ ಮುಂದೂಡಿಕೆ ಮಾಡಿದರು.

ಇದನ್ನೂ ಓದಿ:ನವಜಾತ ಶಿಶುವಿನೊಂದಿಗೆ ಕಲಾಪಕ್ಕೆ ಹಾಜರಾದ ಎನ್​ಸಿಪಿ ಶಾಸಕಿ!