ವೀಕೆಂಡ್ ಲಾಕ್​​ಡೌನ್: ಸ್ವತಃ ಫೀಲ್ಡ್​ಗೆ ಇಳಿದ ಡಿಸಿಪಿ ಡಾ. ವಿಕ್ರಮ್ ಆಮಟೆ

ಜಿಲ್ಲಾಡಳಿತದ ಆದೇಶದಂತೆ ಮೂರು‌ ದಿನಗಳ ಕಾಲ ಕಟ್ಟುನಿಟ್ಟಿನ ಲಾಕ್​ಡೌನ್​ಗೆ ಮುಂದಾಗಿರುವ ಪೊಲೀಸರು, ‌ಪ್ರತಿಯೊಂದು ವಾಹನಗಳನ್ನು ತಪಾಸಣೆ ನಡೆಸುತ್ತಿದ್ದಾರೆ.

ಬೆಳಗಾವಿ: ಎರಡನೇ ದಿನದ ವೀಕೆಂಡ್ ಲಾಕ್​​ಡೌನ್​ ಹಿನ್ನೆಲೆ ಕುಂದಾನಗರಿ ಜನ ಸಂಚಾರವಿಲ್ಲದೆ ಸ್ತಬ್ಧವಾಗಿದ್ದು, ಸ್ವತಃ ಡಿಸಿಪಿ ಡಾ. ವಿಕ್ರಮ್ ಆಮಟೆ ಫೀಲ್ಡ್​ಗೆ ಇಳಿದು ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

ಜಿಲ್ಲೆಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ದಿನದಿಂದ ದಿನಕ್ಕೆ ಕೊಂಚ ಕಡಿಮೆ ಆಗುತ್ತಿದ್ದರೂ ಸೋಂಕಿತರ ಸಾವಿನ ಪ್ರಮಾಣ ಮಾತ್ರ ಹೆಚ್ಚಾಗುತ್ತಿದೆ. ಈ ಮೊದಲು ಆರೋಗ್ಯ ಇಲಾಖೆ ಬಿಡುಗಡೆ ಮಾಡುವ ಹೆಲ್ತ್ ಬುಲೆಟಿನ್​​ನಲ್ಲಿ 4ರಿಂದ 5ಕ್ಕೆ ಇದ್ದ ಕೊರೊನಾ ಸಾವಿನ ಸಂಖ್ಯೆ ಇದೀಗ 14ಕ್ಕೇರಿದೆ. ಹೀಗಾಗಿ ಜಿಲ್ಲಾಡಳಿತದ ಆದೇಶದಂತೆ ಮೂರು‌ ದಿನಗಳ ಕಾಲ ಕಟ್ಟುನಿಟ್ಟಿನ ಲಾಕ್​ಡೌನ್​ಗೆ ಮುಂದಾಗಿರುವ ಪೊಲೀಸರು ‌ಪ್ರತಿಯೊಂದು ವಾಹನಗಳನ್ನು ತಪಾಸಣೆ ನಡೆಸುತ್ತಿದ್ದಾರೆ. ಅನಗತ್ಯವಾಗಿ ರಸ್ತೆಗಿಳಿದ ಬೈಕ್ ಮತ್ತು ವಾಹನಗಳನ್ನು ಸೀಜ್ ಮಾಡುತ್ತಿದ್ದಾರೆ. ಹೀಗಾಗಿ ಜಿಲ್ಲೆಯಲ್ಲಿ ಅನಗತ್ಯವಾಗಿ ‌ರಸ್ತೆಗಿಳಿಯುವವರ ಸಂಖ್ಯೆ ಕಡಿಮೆಯಾಗುತ್ತಿದೆ.

ಮೇ‌ ಜಾರಕಿಹೊಳಿ ಆದ್ಮಿ ಸಾಬ್, ಛೋಡೋ ಎಂದವನಿಗೆ ದಂಡ:

ಬಾದಾಮಿಯಿಂದ ಖಾನಾಪುರಕ್ಕೆ ಹೊರಟ್ಟಿದ್ದ ಇನೋವಾ ಕಾರನ್ನು ಚೆನ್ನಮ್ಮ ವೃತ್ತದಲ್ಲಿ ಪೊಲೀಸರು ತಪಾಸಣೆ ಮಾಡಿದರು. ಈ ವೇಳೆ ಮೆಹಬೂಬ್ ಸೈಯದ್ ಎಂಬಾತ ನಾನು ಜಾರಕಿಹೊಳಿ ಕಡೆಯವನು ಬಿಡಿ ಸರ್.. ಸತೀಶ ಜಾರಕಿಹೊಳಿ‌ ಅವರ ಕಾರ್ಮಿಕರನ್ನು ಕರೆದುಕೊಂಡು ಬಾದಾಮಿಗೆ ಬಿಡಲು ಹೋಗಿದ್ದೆ ಎಂದನು. ಆದ್ರೆ, ಇದ್ಯಾವದಕ್ಕೂ ಜಗ್ಗದ ಪೊಲೀಸರು, ದಾಖಲಾತಿ ಪರಿಶೀಲಿಸಿ 250 ರೂ.ಗಳ ದಂಡ ವಿಧಿಸಿ ಕಳುಹಿಸಿದರು.