ಹುಬ್ಬಳ್ಳಿ/ಬೆಳಗಾವಿ:ಇಂದಿನಿಂದ ಲಾಕ್ ಡೌನ್ ಜಾರಿ ಹಿನ್ನೆಲೆ ಅನಗತ್ಯವಾಗಿ ಓಡಾಡುವ ಬೈಕ್ ಸವಾರರಿಗೆ ಹುಬ್ಬಳ್ಳಿ, ಬೆಳಗಾವಿ ಪೊಲೀಸರು ಬಿಸಿ ಮುಟ್ಟಿಸಿದ್ದಾರೆ.
ಬೆಳಗ್ಗೆಯಿಂದಲೆ ಫೀಲ್ಡ್ಗೆ ಇಳಿದ ಪೊಲೀಸರು ವಾಹನ ಸವಾರರಿಗೆ ಶಾಕ್ ಕೊಟ್ಟಿದ್ದಾರೆ. ಕೊರೊನಾ ನಿಯಮ ಗಾಳಿಗೆ ತೂರಿ ಸಮಂಜಸ ಕಾರಣವಿಲ್ಲದೇ ಓಡಾಡುವರರ ಬೈಕ್ ಸೀಜ್ ಮಾಡಿದ್ದಾರೆ. ಇನ್ನು ಕೆಲವರಿಗೆ ಎಚ್ಚರಿಕೆ ನೀಡಿ ಬಿಟ್ಟಿದ್ದಾರೆ.
ನಖಲಿ ಪಾಸ್ ಮಾಡಿಸಿದ್ದವನ ಕಾರ್ ಸೀಜ್
ಹುಬ್ಬಳ್ಳಿ-ಧಾರವಾಡ ಕಮಿಷನರ್ ಲಾಬುರಾಮ ನಗರದ ಕೇಶ್ವಾಪೂರ ಸರ್ಕಲ್ನಲ್ಲಿ ವಾಹನಗಳ ಕಾರ್ಯಾಚರಣೆ ಮಾಡುವ ವೇಳೆ, ಕಾರಿನ ಸವಾರನೊಬ್ಬ ನಖಲಿ ಪಾಸ್ ಹಚ್ಚಿಕೊಂಡು ಹೋಗುತ್ತಿದ್ದ. ಕಮಿಷನರ್ ಅನುಮಾನಗೊಂಡು ಸಂಬಂಧಿಸಿದ ಕಚೇರಿಗೆ ವಿಚಾರಿಸಿದಾಗ ಯಾವುದೇ ಪಾಸ್ ಕೊಟ್ಟಿಲ್ಲ ಎಂದು ತಿಳಿದಿದ್ದು, ಆ ವ್ಯಕ್ತಿಯ ಮೇಲೆ ಕಠಿಣ ಕ್ರಮ ಕೈಗೊಂಡು ಕಾರ್ ಸೀಜ್ ಮಾಡಿದರು. ಈ ರೀತಿ ಯಾರಾದರೂ ಪೊಲೀಸರನ್ನು ಯಾಮಾರಿಸಲು ಹೋದರೆ ಅವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಖಡಕ್ ಸೂಚನೆ ನೀಡಿದರು.
ಬೆಳಗಾವಿಯಲ್ಲಿ ನಕಲಿ ವೈದ್ಯನ ಬೈಕ್ ಸೀಜ್
ಯುವಕನೊಬ್ಬ ವೈದ್ಯರ ಏಪ್ರೊನ್ ಹಾಕಿಕೊಂಡು ಹಿಂಬದಿಯಲ್ಲಿ ಮಹಿಳೆಯೊಬ್ಬರನ್ನು ಕೂರಿಸಿಕೊಂಡು ತರಕಾರಿ ತರಲು ಬಂದಿದ್ದಾನೆ. ಈ ವೇಳೆ, ಡಿಸಿಪಿ ವಿಕ್ರಮ್ ಆಮಟೆ, ಯುವಕನ ಬೈಕ್ ತಡೆದು ತಪಾಸಣೆ ನಡೆಸಿದಾಗ ಯುವಕ ಸಿಕ್ಕಿಬಿದ್ದಿದ್ದು, ಬೈಕ್ ಸೀಜ್ ಮಾಡಿದರು. ಈ ವೇಳೆ ಯುವಕ ನಮ್ಮ ಅಣ್ಣನ ಏಪ್ರೊನ್ ಮರೆತು ಹಾಕಿಕೊಂಡು ಬಂದಿದ್ದೇನೆ. ಬಿಟ್ಟು ಬಿಡಿ ಸರ್ ಎಂದು ಪೊಲೀಸರಿಗೆ ಮನವಿ ಮಾಡಿಕೊಂಡನು. ಆದ್ರೆ, ಪೊಲೀಸರು ಬೈಕ್ ಬಿಡದ ಹಿನ್ನೆಲೆ ಮಹಿಳೆ ಜತೆಗೆ ಯುವಕ ನಡೆದುಕೊಂಡು ಮನೆ ದಾರಿ ಹಿಡಿದನು.