ಸಂತೋಷ್​​ ಪಾಟೀಲ್​​ ಆತ್ಮಹತ್ಯೆ ಕೇಸ್​: ಗ್ರಾಮದಲ್ಲಿ ಆಗಿರುವ 108 ಕಾಮಗಾರಿಗಳ ಪರಿಶೀಲನೆ

contractor suicide case: ಉಡುಪಿ ಪೊಲೀಸರ ಸೂಚನೆ ಮೇರೆಗೆ ಸಿಬ್ಬಂದಿಯು ಗುತ್ತಿಗೆದಾರ ಸಂತೋಷ್​ ಪಾಟೀಲ್​​ ನಿರ್ವಹಿಸಿದ್ದರೆನ್ನಲಾದ 108 ಕಾಮಗಾರಿಗಳ ಪರಿಶೀಲನೆ ನಡೆಸುತ್ತಿದ್ದಾರೆ.

ಬೆಳಗಾವಿ:ಗುತ್ತಿಗೆದಾರ ಸಂತೋಷ್​ ಪಾಟೀಲ್​​ ಆತ್ಮಹತ್ಯೆ ಪ್ರಕರಣ ಸಂಬಂಧ ಉಡುಪಿ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ. ಪೊಲೀಸರ ಸೂಚನೆ ಮೇರೆಗೆ ಸಿಬ್ಬಂದಿ ಸಂತೋಷ್​ ಪಾಟೀಲ್​​ ನಿರ್ವಹಿಸಿದ್ದರು ಎನ್ನಲಾದ ರಸ್ತೆ-ಚರಂಡಿ ಸೇರಿ ಇನ್ನಿತರ 108 ಕಾಮಗಾರಿಗಳ ಗುಣಮಟ್ಟ ಪರಿಶೀಲನೆ ಮಾಡುತ್ತಿದ್ದಾರೆ.

ಪ್ರಕರಣದ ತನಿಖೆಗಾಗಿ ಉಡುಪಿ ಪೊಲೀಸರು ಹಿಂಡಲಗಾ ಗ್ರಾಮ ಪಂಚಾಯತ್​​ ಅಧ್ಯಕ್ಷ‌ ನಾಗೇಶ್ ಮನ್ನೋಳಕರ್ ಮನೆಗೆ ಭೇಟಿ ನೀಡಿದ್ದಾರೆ. ಇನ್ಸ್‌ಪೆಕ್ಟರ್ ಶರಣಗೌಡ ಪಾಟೀಲ್ ಅವರು ನಾಗೇಶ್ ಮನ್ನೋಳಕರ್ ಅವರನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ. ನಾಗೇಶ್​​ ಮನ್ನೋಳ್ಕರ್ ನಿವಾಸ ಹಿಂಡಲಗಾದ ಲಕ್ಷ್ಮೀ ನಗರದಲ್ಲಿದೆ. ಸಂತೋಷ್​ ಪಾಟೀಲ್ ಮಾಡಿದ್ದಾರೆ ಎನ್ನಲಾದ 108 ಕಾಮಗಾರಿಗಳ ಬಗ್ಗೆ ಖಾಕಿ ಪಡೆ ಮಾಹಿತಿ ಪಡೆಯುತ್ತಿದೆ. ಎರಡು ದಿನಗಳಿಂದ ನಾಗೇಶ್​​ ಮನ್ನೋಳ್ಕರ್ ಪೊಲೀಸರ ಕೈಗೆ ಸಿಕ್ಕಿರಲಿಲ್ಲ. ಅಲ್ಲದೇ ಉಡುಪಿ ಪೊಲೀಸರು ಬೆಳಗಾವಿಗೆ ದೌಡಾಯಿಸುತ್ತಿದ್ದಂತೆ ನಾಗೇಶ್​​ ಗ್ರಾಮ ಪಂಚಾಯಿತಿ ಕಡೆಗೂ ಸುಳಿದಿರಲಿಲ್ಲ. ಹೀಗಾಗಿ ಇಂದು ದಿಢೀರ್ ಮನೆಗೆ ಭೇಟಿ ನೀಡಿದ ಪೊಲೀಸರು ನಾಗೇಶ್ ಮನ್ನೋಳಕರ್ ಹೇಳಿಕೆ ಪಡೆಯುತ್ತಿದ್ದಾರೆ.

ತುಂಡು ಗುತ್ತಿಗೆದಾರರ ತನಿಖೆ: ಹಿಂಡಲಗಾ ಗ್ರಾಮದಲ್ಲಿ ನಡೆದಿದ್ದ 108 ಕಾಮಗಾರಿಗಳನ್ನು ತುಂಡು ಗುತ್ತಿಗೆದಾರರು ನಿರ್ವಹಿಸಿದ್ದಾರೆ. ಗುತ್ತಿಗೆದಾರ ಸಂತೋಷ್​ ‌ಪಾಟೀಲ್​​ ಹಾಗೂ ಗ್ರಾ.ಪಂ ಅಧ್ಯಕ್ಷ ನಾಗೇಶ ಮನ್ನೋಳ್ಕರ್ ಸಲಹೆ ಮೇರೆಗೆ 12 ಗುತ್ತಿಗೆದಾರರು ತುಂಡು ಗುತ್ತಿಗೆ ಪಡೆದಿದ್ದರು. ಸ್ವಂತ ಹಣ ಹಾಕಿ ಕಾಮಗಾರಿಯನ್ನು ನಿರ್ವಹಿಸಿದ್ದಾರೆ. ಹೀಗಾಗಿ ಪೊಲೀಸರು ತುಂಡು ಗುತ್ತಿಗೆದಾರರನ್ನು ನಾಗೇಶ ಮನ್ನೋಳ್ಕರ್ ಮನೆಗೆ ಕರೆಯಿಸಿ ವಿಚಾರಣೆ ನಡೆಸಿದರು. ಎಲ್ಲೆಲ್ಲಿ, ಯಾರು? ಎಷ್ಟು ಕೆಲಸ ಮಾಡಿದ್ದೀರಿ ಎಂದು ಮಾಹಿತಿ ಪಡೆದರು.

ಇದನ್ನೂ ಓದಿ:ಸಂತೋಷ ಪಾಟೀಲ್ ಸಾವಿಗೆ ನ್ಯಾಯ ಸಿಗ್ಬೇಕು.. ಸ್ನೇಹಿತ ಸುನೀಲ್​ ಪವಾರ ಒತ್ತಾಯ