ಕಾಡುಪ್ರಾಣಿಗಳ ಬೇಟೆಗೆ ತಂದಿದ್ದ ಸ್ಫೋಟಕ ಸಿಡಿದು ತಾನೇ ಬಲಿಯಾದ ಬೇಟೆಗಾರ

12:21 November 25

ಬೈಕ್​ನಲ್ಲಿ ಒಯ್ಯುತ್ತಿದ್ದ ಸ್ಫೋಟಕ ಸಿಡಿದು ಅನಾಹುತ

ಬೆಳಗಾವಿ:ಕಾಡು ಪ್ರಾಣಿಗಳ ಬೇಟೆಗಾಗಿ ತಂದಿದ್ದ ಸ್ಪೋಟಕ ಸಿಡಿದು ಬೇಟೆಗಾರನೇ ಸ್ಥಳದಲ್ಲೇ ಭೀಕರವಾಗಿ ಮೃತಪಟ್ಟಿರುವ ಘಟನೆ ಬೆಳಗಾವಿ ಜಿಲ್ಲೆಯ ಖಾನಾಪುರ ತಾಲೂಕಿನ ಮಾಚಿಗಡ ಗ್ರಾಮದ ಅರಣ್ಯ ಪ್ರದೇಶದಲ್ಲಿ ನಡೆದಿದೆ.

ಶಿವಮೊಗ್ಗ ಜಿಲ್ಲೆಯ ಹೊಳೆ ಹೊನ್ನೂರು ತಾಲೂಕಿನ ಹಕ್ಕಿಪಕ್ಕಿ ಗ್ರಾಮದ 17 ವರ್ಷದ ಗಜೇಂದ್ರ ರಜಪೂತ ಮೃತ ದುರ್ದೈವಿ. ಶಿವಕುಮಾರ್ ರಜಪೂತ ಎಂಬಾತನ ಜತೆಗೆ ಗಜೇಂದ್ರ ಶಿಕಾರಿಗೆ ಬಂದಿದ್ದನು. ಪ್ರಾಣಿಗಳ ಬೇಟೆಗೆ ಗಜೇಂದ್ರ ತನ್ನ ಬ್ಯಾಗಲ್ಲಿ ಸ್ಫೋಟಕ ವಸ್ತುಗಳನ್ನು ತಂದಿದ್ದರು. ಕಾಡು ಪ್ರದೇಶದ ಕಡೆಗೆ ಬೇಟೆಗೆ ಹೊರಟಿದ್ದಾಗ ಸವಾರರ ಬೈಕಿಗೆ ಟ್ರ್ಯಾಕ್ಟರ್ ಡಿಕ್ಕಿ ಹೊಡೆದಿದೆ. 

ಈ ಭೀಕರ ಅಪಘಾತದಿಂದ ಬ್ಯಾಗ್​​ನಲ್ಲಿದ್ದ ಸ್ಫೋಟಕ ವಸ್ತುಗಳು ಸ್ಫೋಟಗೊಂಡಿದ್ದು, ಸ್ಥಳದಲ್ಲೇ ಗಜೇಂದ್ರ ‌ಮೃತಪಟ್ಟಿದ್ದು, ಶಿವಕುಮಾರ್ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಸ್ಫೋಟಕ್ಕೆ ಮೃತನ ದೇಹ ಛಿದ್ರ ಛಿದ್ರವಾಗಿದೆ. ಸ್ಥಳಕ್ಕೆ ನಂದಗಡ ಠಾಣೆ ಪೊಲೀಸರ ಭೇಟಿ ನೀಡಿದ್ದು, ಪರಿಶೀಲನೆ ನಡೆಸುತ್ತಿದ್ದಾರೆ.