ಕಬ್ಬು ಬೆಳೆಗಾರರಿಗೆ ತಲೆನೋವಾದ ಸೂಲಂಗಿ: ನೆರೆಯಿಂದ ಮತ್ತೆ ಬರೆ

ಕಬ್ಬು ಬೆಳೆದ ರೈತ ಈ ಬಾರಿ ಹೈರಾಣಾಗಿದ್ದಾನೆ. ರೈತರಿಗೆ ಇಳುವರಿ ಬರದೇ ಪರದಾಡುವಂತಾಗಿದೆ. ಬೇಸಿಗೆಯಲ್ಲಿ ನೀರಿಲ್ಲದೆ, ಮಳೆಗಾಲದಲ್ಲಿ ಪ್ರವಾಹದಿಂದಾಗಿ ಕಬ್ಬು ಬೆಳೆಗಾರನಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ಚಿಕ್ಕೋಡಿ:ಕಬ್ಬು ಬೆಳೆಗಾರರ ಸಂಕಟಕ್ಕೆ ಕೊನೆ ಇಲ್ಲದಂತಾಗಿದೆ. ನೆರೆ ಹಾವಳಿಯಿಂದ ಅಳಿದುಳಿದ ಕಬ್ಬಿನ ಬೆಳೆಗೆ ಈಗ ಸೂಲಂಗಿ ಬಂದಿದ್ದು, ಕಬ್ಬು ಬೆಳೆಗಾರರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ.

ಕಳೆದ ಬೇಸಿಗೆಯಲ್ಲಿ ಕೃಷ್ಣಾ ನದಿ ಸಂಪೂರ್ಣವಾಗಿ ಬತ್ತಿದ್ದರಿಂದ ನೀರಿಲ್ಲದೆ ಕಬ್ಬು ನಾಶವಾಗಿತ್ತು. ಅದರಲ್ಲೂ ಬಾವಿ, ಬೋರ್​ವೆಲ್​ಗಳಿಂದ ನೀರು ಹರಿಸಿ ಬೆಳೆದ ಕಬ್ಬು ಪ್ರವಾಹಕ್ಕೆ ಹಾಳಾಗಿದೆ. ಈಗ ಉಳಿದ ಕಬ್ಬಿಗೆ ಸೂಲಂಗಿ ಬೆಳೆಯುತ್ತಿರುವುದರಿಂದ ಬೆಳೆದ ಕಬ್ಬು ಬೆಂಡೊಡೆಯುತ್ತಿದೆ. ಕಬ್ಬಿನಲ್ಲಿ ತೂಕ ಕಡಿಮೆಯಾಗುತ್ತಿದೆ. ಇದರಿಂದ ಮತ್ತೆ ನದಿ ತೀರದ ರೈತ ಕಂಗಾಲಾಗುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಕಬ್ಬು ನಾಟಿ ಮಾಡಿದ 11 ತಿಂಗಳ ಬಳಿಕ ಸೂಲಂಗಿ ಬರುತ್ತದೆ. ಆದರೆ, ಈ ಬಾರಿ 5 ರಿಂದ 8 ತಿಂಗಳ ಅವಧಿಯಲ್ಲೇ ಸೂಲಂಗಿ ಮೂಡಿದೆ. ಸೂಲಂಗಿ ಕಾಣಿಸಿಕೊಳ್ಳಾರಂಭಿಸಿದರೆ ಆದಷ್ಟು ಬೇಗ ಕಬ್ಬು ಕಟಾವು ಮಾಡಿ ಕಾರ್ಖಾನೆಗೆ ಕಳುಹಿಸಬೇಕು. ತಡ ಮಾಡಿದಷ್ಟೂ ಕಬ್ಬು ಬೆಂಡೊಡೆಯಲಾರಂಭಿಸುತ್ತದೆ.

ಒಂದು ಎಕರೆಗೆ 35ರಿಂದ 40 ಟನ್ ಕಬ್ಬಿನ ಫಸಲು ಸಿಗುತ್ತಿದ್ದರೆ, ಸೂಲಂಗಿ ಬಂದಾಗ 24ರಿಂದ 28 ಟನ್ ಮಾತ್ರ ಸಿಗುವ ಸಾಧ್ಯತೆ ಇದೆ. ಮಳೆ, ನೆರೆಯಿಂದ ಈ ಬಾರಿ ಶೇ. 40ರಷ್ಟು ಕಬ್ಬಿನ ಬೆಳೆ ನಾಶವಾಗುದ್ದು, ಉಳಿದ ಕಬ್ಬಿನ ಬೆಳೆಗೆ ಕಬ್ಬು ಕಟಾವು ಮಾಡುವ ಮೊದಲೇ ಸೂಲಂಗಿ ಕಾಣಿಸಿಕೊಂಡಿದೆ.

ಸೂಲಂಗಿ ಕಬ್ಬು ಕಟಾವಿಗೆ ಕಾರ್ಮಿಕರು ಹೆಚ್ಚಿನ ದರ ಕೇಳುತ್ತಾರೆ. ಅಲ್ಲದೇ ಸೂಲಂಗಿ ಕಬ್ಬು ಮೇವಿಗೂ ಬರುವುದಿಲ್ಲ. ಇದು ಕೂಡ ರೈತರ ಆರ್ಥಿಕ ಹಾನಿ ಹೆಚ್ಚಿಸುತ್ತದೆ. ಸೂಲಂಗಿ ಬೆಳೆ ಬಿಸಲಿನ ತಾಪಕ್ಕೆ ಬೆಂಕಿಗೆ ಆಹುತಿಯಾಗುವ ಸಂಭವವೂ ಹೆಚ್ಚಾಗಿದೆ.

ಮುಂಚಿತವಾಗಿ ನಾಟಿ ಮಾಡಿದ ಕಬ್ಬಿಗೆ ಡಿಸೆಂಬರ್ ಅಂತ್ಯದೊಳಗೆ ಹೂ ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ, ಈ ವರ್ಷ ಡಿಸೆಂಬರ್​ಗೂ ಮುಂಚೆ ಮತ್ತು ನಂತರ ನಾಟಿ ಮಾಡಿದ ಕಬ್ಬಿನಲ್ಲೂ ಸೂಲಂಗಿ ಹೂ ಕಾಣಿಸಿಕೊಂಡಿದೆ. ಕುಳೆ ಕಬ್ಬಲ್ಲೂ ಈ ಬಾರಿ ಡಿಸೆಂಬರ್​ನಲ್ಲೇ ಹೂ ಬಿಟ್ಟರುವುದು ರೈತರ ಆತಂಕಕ್ಕೆ ಕಾರಣವಾಗಿದೆ.

ಒಟ್ಟಾರೆ ರೈತರು ಈ ಬಾರಿ ಕಬ್ಬು ಬೆಳೆಯನ್ನು ಮೂರು ಹಂತಗಳಲ್ಲಿ ಕಷ್ಟ ಪಟ್ಟು ಉಳಿಸಿಕೊಂಡು ಬಂದರೂ ಸಹಿತ ಕೊನೆಗೆ ಕೈಗೆ ಸಿಕ್ಕ ತುತ್ತು ಬಾಯಿಗೆ ಸಿಗಲಾರದ ಸ್ಥಿತಿಗೆ ಬಂದಿದೆ. ಕಬ್ಬು ಹಾಳಾಗಿದ್ದು, ಅಲ್ಪ ಸ್ವಲ್ಪ ಉಳಿದ ಕಬ್ಬು ಕಟಾವಿನ ಸ್ಥಿತಿಗೆ ಬಂದರೂ ಸಹಿತ ಕಾರ್ಖಾನೆ ಮಾಲೀಕರು ಕಬ್ಬು ಒಯ್ಯುತ್ತಿಲ್ಲ.

ಇತ್ತ ಸರ್ಕಾರದಿಂದ ಬರಬೇಕಾದ ಸಹಾಯಧನ ಕೂಡಾ ಬರುತ್ತಿಲ್ಲ. ಒಟ್ಟಾರೆ ನದಿ ತೀರದ ಜನರ ಗೋಳು ಮಾತ್ರ ಯಾರು ಕೇಳುತ್ತಿಲ್ಲ. ಈಗ ರೈತರ ಬಾಳು ಬೀದಿಗೆ ಬಿದ್ದಿದ್ದು, ಅವರ ನೋವಿಗೆ ಸರ್ಕಾರ ಸ್ಪಂದಿಸಬೇಕಿದೆ.