ನೆರೆ ಸಂತ್ರಸ್ತರಿಗೆ ಅಗತ್ಯ ವಸ್ತುಗಳ ಸಂಗ್ರಹ... ಅಕ್ಕ-ತಂಗಿ ಕಾರ್ಯಕ್ಕೆ ಮನಸೋತ ಕುಂದಾನಗರಿ!

ಮಳೆ, ಪ್ರವಾಹ ಹಿನ್ನೆಲೆ ಸಿಕ್ಕಿದ ರಜೆಯ ಸಮಯ ಸದುಪಯೋಗ ಮಾಡಿಕೊಂಡಿರುವ ಬೆಳಗಾವಿಯ ಈ ಸಹೋದರಿಯರು ಸಂತ್ರಸ್ತರ ನೆರವಿಗೆ ನಿಂತಿದ್ದಾರೆ.

ಬೆಳಗಾವಿ: ಕುಂದಾನಗರಿಯಲ್ಲಿ ಸುರಿಯುತ್ತಿರುವ ಧಾರಾಕಾರ ಮಳೆ, ಪ್ರವಾಹ ಹಿನ್ನಲೆ ಶಾಲಾ-ಕಾಲೇಜಿಗೆ ರಜೆ ಘೋಷಿಸಲಾಗಿದೆ. ಆದರೆ, ರಜೆಯ ಸಮಯ ಸದುಪಯೋಗ ಮಾಡಿಕೊಂಡಿರುವ ಬೆಳಗಾವಿಯ ಈ ಸಹೋದರಿಯರು ಸಂತ್ರಸ್ತರ ನೆರವಿಗೆ ನಿಂತಿದ್ದಾರೆ.

ಹೌದು, ಈ ಸಹೋದರಿಯರು ಸಾರ್ವಜನಿಕರಿಂದ ಅಗತ್ಯ ವಸ್ತುಗಳನ್ನು‌ ಸಂಗ್ರಹಿಸಿ ಪರಿಹಾರ ಕೇಂದ್ರದಲ್ಲಿರುವ ಸಂತ್ರಸ್ತರಿಗೆ ಸರಬರಾಜು ಮಾಡುತ್ತಿದ್ದಾರೆ. ಬೆಳಗಾವಿಯ ಕೆಎಲ್ಇ ಸಂಸ್ಥೆಯ ಲಿಂಗರಾಜ ಕಾಲೇಜಿನಲ್ಲಿ ವ್ಯಾಸಂಗ ಮಾಡುತ್ತಿರುವ ಸುಶ್ಮಿತಾ ಹಳ್ಯಾಳ ಹಾಗೂ ಸೌಂಧರ್ಯ ಹಳ್ಯಾಳ ಸಹೋದರಿಯರು ಇತರ ಯುವಕರಿಗೆ ಮಾದರಿಯಾಗಿದ್ದಾರೆ.

ಬೆಳಗಾವಿಯ ವಿನಾಯಕ ನಗರದಲ್ಲಿ ವಾಸವಾಗಿರುವ ಈ ಸಹೋದರಿಯರು ಕಳೆದೊಂದು ವಾರದಿಂದ ಸಾರ್ವಜನಿಕರಿಂದ ಅಗತ್ಯ ವಸ್ತು ಸಂಗ್ರಹಿಸಿ ಸಂಜೆ ವೇಳೆಗೆ ಪರಿಹಾರ ಕೇಂದ್ರಗಳಿಗೆ ವಿತರಿಸುತ್ತಿದ್ದಾರೆ. ಅಲ್ಲದೇ ಸಾಮಾಜಿಕ ಜಾಲತಾಣಗಳಲ್ಲಿ ಸ್ನೇಹಿತರಿಂದ ನೆರವು ಪಡೆದು ಸಂತ್ರಸ್ತರಿಗೆ ಅಗತ್ಯ ವಸ್ತುಗಳಾದ ಶಾಲು, ಅಕ್ಕಿ, ಬಿಸ್ಕಿಟ್, ಸೋಪ್​, ಬ್ರೇಷ್, ಪೇಸ್ಟ್ ಸಂಗ್ರಹಿಸಿ ವಿತರಿಸುತ್ತಿದ್ದಾರೆ. ಸಹೋದರಿಯರ ಮಾನವೀಯತೆಗೆ ವಿನಾಯಕ ಕಾಲನಿ ಜನತೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.