ಚಿಕ್ಕೋಡಿ/ಬೆಳಗಾವಿ: ಹೆಚ್.ವಿಶ್ವನಾಥ್ ಅನರ್ಹತೆ ಬಗ್ಗೆ ಹೈಕೋರ್ಟ್ ನೀಡಿರುವ ಮಧ್ಯಂತರ ಆದೇಶ ಪ್ರಶ್ನಿಸಿ ಸುಪ್ರೀಂ ಕೋರ್ಟ್ಗೆ ಮೇಲ್ಮನವಿ ಸಲ್ಲಿಸುತ್ತೇವೆ ಎಂದು ಸಚಿವ ರಮೇಶ್ ಜಾರಕಿಹೊಳಿ ತಿಳಿಸಿದರು.
ಬೆಳಗಾವಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈಗಾಗಲೇ ಬೆಂಗಳೂರು ಹಾಗೂ ದೆಹಲಿ ವಕೀಲರ ಜತೆ ಮಾತನಾಡಿದ್ದೇನೆ. 17 ಶಾಸಕರ ಅನರ್ಹತೆ ಬಗ್ಗೆ ಈ ಹಿಂದೆ ಸುಪ್ರೀಂ ಕೋರ್ಟ್ ಆದೇಶ ಹೊರಡಿಸಿದೆ. ಈ ಆದೇಶದ ವಿರುದ್ಧವೂ ನಾವು ಸುಪ್ರೀಂ ಕೋರ್ಟ್ಗೆ ಮನವಿ ಮಾಡುತ್ತೇವೆ. ಎಲ್ಲ ಮಿತ್ರಮಂಡಳಿ ಶಾಸಕರು, ಬಿಜೆಪಿ ಶಾಸಕರು ಸೇರಿಯೇ ಸುಪ್ರೀಂಕೋರ್ಟ್ಗೆ ಮೇಲ್ಮನವಿ ಸಲ್ಲಿಸುತ್ತೇವೆ. ಸರ್ಕಾರ ಹಾಗೂ ಬಿಜೆಪಿಯ ಕೆಲ ನಾಯಕರ ವಿರುದ್ಧ ಹೆಚ್.ವಿಶ್ವನಾಥ್ ಏನು ಹೇಳಿಕೆ ನೀಡಿದ್ದಾರೆ ಗೊತ್ತಿಲ್ಲ. ಸಂಪುಟ ಪುನಾರಚನೆ ಮಾಡುವ ಪರಮಾಧಿಕಾರ ಸಿಎಂ ಹೊಂದಿದ್ದಾರೆ. ಅವರು ಸಮಯ ನೋಡಿಕೊಂಡು ನಿರ್ಧಾರ ಕೈಗೊಳ್ಳುತ್ತಾರೆ ಎಂದು ಹೇಳಿದರು.
ಮಹಾದಾಯಿ ಯೋಜನೆ ಸೂಕ್ಷ್ಮ ವಿಚಾರ:
ಮಹಾದಾಯಿ ಯೋಜನೆ ಸೂಕ್ಷ್ಮ ವಿಚಾರ. ಆ ಬಗ್ಗೆ ಹೆಚ್ಚೇನೂ ಕೇಳಬೇಡಿ. ರಾಜ್ಯದ ಹಿತಾಸಕ್ತಿ ಬಗ್ಗೆ ನನಗೆ ಅರಿವಿದೆ. ಗೋವಾ ಸಿಎಂ ಹೇಳಿಕೆಗೆ ನಾನು ಪ್ರತಿಕ್ರಿಯೆ ನೀಡಲ್ಲ ಎಂದರು.
ದಿಲ್ಲಿ ಲಾಬಿಗಿಬಿ ಯಾವುದೂ ಇಲ್ಲ :
ನಾನು ಯೋಗೇಶ್ವರ್ ಕಳೆದ 20 ವರ್ಷಗಳಿಂದಲೂ ಮಿತ್ರರೇ. ದಿಲ್ಲಿ ಲಾಬಿಗಿಬಿ ಯಾವುದೂ ಇಲ್ಲ ನಮಗೆ, ಎಲ್ಲವೂ ಒಂದೇ. ನಾನು ಮೊದಲ ಬಾರಿ ಶಾಸಕನಾದಾಗಿನಿಂದಲೂ ನಾವಿಬ್ಬರೂ ಮಿತ್ರರು ಎಂದು ನೀರಾವರಿ ಸಚಿವ ರಮೇಶ್ ಜಾರಕಿಹೊಳಿ ಹೇಳಿದರು.