ಶಾಸಕ ಮಹೇಶ್ ಕುಮಟಳ್ಳಿ ವಾಹನಕ್ಕೆ ಕನ್ನಡಪರ ಸಂಘಟನೆಗಳಿಂದ ಘೇರಾವ್​..

ನನ್ನನ್ನು ಯಾರೂ ಘೇರಾವ್ ಹಾಕಲಿಲ್ಲ, ನಾನು ಅವರ ಸೇವಕನಷ್ಟೇ.. ಅವರು ಕ್ಷೇತ್ರದ ಕೆಲಸದ ಕುರಿತು ಕೇಳುತಿದ್ದಾರೆ, ನೀವು ತಪ್ಪಾಗಿ ಘೇರಾವ್ ಹಾಕಿದರು ಎಂದು ತಿಳಿಕೊಳ್ಳಬೇಡಿ, ನಮ್ಮ ಗ್ರಾಮಕ್ಕೆ ಬನ್ನಿ ಸಮಸ್ಯೆ ಆಲಿಸಿ ಎಂದು ಮನವಿ ಮಾಡಿದರು..

ಅಥಣಿ :ತಾಲೂಕಿನ ಹಿಪ್ಪರಗಿ ಬ್ಯಾರೇಜ್​ಗೆ ಸಂಪರ್ಕ ಕಲ್ಪಿಸುವ ರಸ್ತೆ ಕಾಮಗಾರಿಯ ಭೂಮಿಪೂಜೆ ನೆರವೇರಿಸಲು ಬಂದ ಶಾಸಕ ಮಹೇಶ್ ಕುಮಟಳ್ಳಿ ಅವರನ್ನು ರಸ್ತೆ ಮಧ್ಯದಲ್ಲಿ ತಡೆದ ಕನ್ನಡಪರ ಸಂಘಟನೆಗಳ ಕಾರ್ಯಕರ್ತರು, ಗ್ರಾಮದ ಸಮಸ್ಯೆ ಆಲಿಸುವಂತೆ ಹಾಗೂ ಗ್ರಾಮಕ್ಕೆ ಭೇಟಿ ನೀಡುವಂತೆ ಪಟ್ಟು ಹಿಡಿದಿದ್ದಾರೆ.

ಒತ್ತಾಯಕ್ಕೆ ಮಣಿದ ಶಾಸಕರು, ಭೂಮಿ ಪೂಜೆ ಮಾರ್ಗ ಬದಲಾಯಿಸಿ ಸಮಸ್ಯೆ ಇರುವ ನಂದೇಶ್ವರ ಗ್ರಾಮಕ್ಕೆ ಭೇಟಿ ನೀಡಿ ರಸ್ತೆ ಹಾಗೂ ಕಳೆದ ವರ್ಷದ ಕೃಷ್ಣಾ ನದಿ ನೆರೆ ಸಂತ್ರಸ್ತರ ಪರಿಹಾರ ಕುರಿತು ಸಮಸ್ಯೆ ಆಲಿಸಿದರು.

ಇದೇ ವೇಳೆ ಕನ್ನಡಪರ ಸಂಘಟನೆಯ ಮುಖಂಡ ಹನಮಂತ ನಂದಗಾಂವ್ ಮಾತನಾಡಿ, ಹಲವಾರು ವರ್ಷಗಳಿಂದ ನಮ್ಮ ಗ್ರಾಮದ ರಸ್ತೆ ನಿರ್ಮಾಣದ ಬಗ್ಗೆ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರೂ ಯಾವುದೇ ರೀತಿಯ ಸ್ಪಂದನೆ ದೊರೆತಿಲ್ಲ. ಅನಿವಾರ್ಯವಾಗಿ ನಾವು ಅಥಣಿ ಶಾಸಕ ಮಹೇಶ್ ಕುಮಟಳ್ಳಿ ಅವರಿಗೆ ಕಾರು ಅಡ್ಡ ಹಾಕಿ ನಮ್ಮ ಗ್ರಾಮದ ಸಮಸ್ಯೆ ಬಗ್ಗೆ ಮನವರಿಕೆ ಮಾಡಬೇಕಾಯಿತು ಎಂದು ತಿಳಿಸಿದರು.

ಈ ವಿಷಯದ ಕುರಿತು ಪ್ರತಿಕ್ರಿಯಿಸಿದ ಅಥಣಿ ಶಾಸಕ ಮಹೇಶ್ ಕುಮಟಳ್ಳಿ, ನನ್ನನ್ನು ಯಾರೂ ಘೇರಾವ್ ಹಾಕಲಿಲ್ಲ, ನಾನು ಅವರ ಸೇವಕನಷ್ಟೇ.. ಅವರು ಕ್ಷೇತ್ರದ ಕೆಲಸದ ಕುರಿತು ಕೇಳುತಿದ್ದಾರೆ, ನೀವು ತಪ್ಪಾಗಿ ಘೇರಾವ್ ಹಾಕಿದರು ಎಂದು ತಿಳಿಕೊಳ್ಳಬೇಡಿ, ನಮ್ಮ ಗ್ರಾಮಕ್ಕೆ ಬನ್ನಿ ಸಮಸ್ಯೆ ಆಲಿಸಿ ಎಂದು ಮನವಿ ಮಾಡಿದರು. ಅದಕ್ಕಾಗಿ ನಾನು ನಂದೇಶ್ವರ ಗ್ರಾಮಕ್ಕೆ ಭೇಟಿ ನೀಡಿದೆ ಎಂದು ತಿಳಿಸಿದರು.