ವೋಟ್​​ ಬ್ಯಾಂಕ್​​​ಗಾಗಿ ಅನಧಿಕೃತವಾಗಿ ಮತದಾರರ ಸೇರ್ಪಡೆ ಆರೋಪ: ಜನರ ಪ್ರತಿಭಟನೆ

ಮತಗಳನ್ನು ಸಂಪಾದಿಸುವ ಉದ್ದೇಶದಿಂದ ಅನಧಿಕೃತವಾಗಿ ಬೇರೆ ವಾರ್ಡ್​​ಗಳಲ್ಲಿ ಮತದಾರರನ್ನು ಸೇರ್ಪಡೆ ಮಾಡಿಕೊಳ್ಳಲಾಗ್ತಿದೆ ಎಂದು ಆರೋಪಿಸಿ ಚಿಕ್ಕೋಡಿಯಲ್ಲಿ ಜನರು ಪ್ರತಿಭಟನೆ ನಡೆಸಿದ್ದಾರೆ.

ಚಿಕ್ಕೋಡಿ/ಬೆಳಗಾವಿ:ಚಿಕ್ಕೋಡಿ ತಾಲೂಕಿನ ಖಡಕಲಾಟ ಗ್ರಾಮಸ್ಥರು ಅನಧಿಕೃತವಾಗಿ ಮತದಾರ ಪಟ್ಟಿಯಲ್ಲಿ ವಾರ್ಡ್​​​​​ಗಳನ್ನು ಬದಲಾವಣೆ ಮಾಡಲಾಗಿದೆ ಎಂದು ಆರೋಪಿಸಿ ತಹಶೀಲ್ದಾರ್​​ ಕಚೇರಿ ಬಳಿ ಪ್ರತಿಭಟನೆ ಮಾಡಿದ್ದಾರೆ.

ಅನಧಿಕೃತವಾಗಿ ಹಾಗೂ ಒತ್ತಾಯ ಪೂರ್ವಕವಾಗಿ ಮತದಾರರ ಪಟ್ಟಿಯಲ್ಲಿ ವಾರ್ಡ್​​​ಗಳನ್ನು ಬದಲಾಯಿಸಿ ಮತದಾರರನ್ನು ಅದಲು ಬದಲು ಮಾಡಲಾಗಿದೆ ಎಂದು ದೂರಿದ್ದಾರೆ. ಖಡಕಲಾಟ ಗ್ರಾಮದ ಭಾಗ ಸಂಖ್ಯೆ 135, 147, 148 ರಲ್ಲಿ ಇರುವ ಗ್ರಾಮಸ್ಥರನ್ನು ಒತ್ತಾಯ ಪೂರ್ವಕವಾಗಿ ಭಾಗ ಸಂಖ್ಯೆ 143 ರಲ್ಲಿ ಸೇರ್ಪಡೆ ಮಾಡಲಾಗಿದೆ ಎನ್ನಲಾಗ್ತಿದೆ. ಈ ಹಿನ್ನೆಲೆ ನೂರಾರು ಗ್ರಾಮಸ್ಥರು ಪ್ರತಿಭಟನೆ ಮಾಡಿ ನ್ಯಾಯ ದೊರಕಿಸಿಕೊಡಿ ಎಂದು ಘೋಷಣೆ ಕೂಗಿದ್ರು.

ಅನಧಿಕೃತವಾಗಿ ಭಾಗ ಸಂಖ್ಯೆ 143 ರಲ್ಲಿ ಸೇರಿಸಲು ಮನೆ ನಂಬರ್​​, ವಿದ್ಯುತ್ ಬಿಲ್ ಹಾಗೂ ಪಡಿತರ ಚೀಟಿ ಮಾಡಿಕೊಡಲು ಗ್ರಾಮದ ಜನರ ಸಹಿಗಳನ್ನು ಸಹ ನಕಲು ಮಾಡಿ ದಾಖಲೆಗಳನ್ನು ಸೃಷ್ಟಿಸುತ್ತಾರೆ. ರಾಜಕೀಯ ಕುತಂತ್ರದಿಂದ ಈ ರೀತಿ ಇಲ್ಲಸಲ್ಲದ ಬದಲಾವಣೆ ಮಾಡುತ್ತಿದ್ದಾರೆ ಎಂದು ಗ್ರಾಮಸ್ಥರು ಸಂಬಂಧಪಟ್ಟ ಅಧಿಕಾರಿಗಳಿಗೆ ದೂರು ಸಲ್ಲಿಸಿದ್ದಾರೆ.