ಗೋಕಾಕ:ಹನಿಟ್ರ್ಯಾಪ್ ಹೆಸರಿನಲ್ಲಿ ಹಣಕ್ಕಾಗಿ ಬ್ಲಾಕ್‍ಮೇಲ್ ಮಾಡುತ್ತಿದ್ದ ಇಬ್ಬರು ನಕಲಿ ಪತ್ರಕರ್ತರನ್ನು ಬಂಧಿಸಿದ ಘಟನೆ ನಗರದಲ್ಲಿ ಜರುಗಿದೆ.
ಇಲ್ಲಿಯ ಆದಿಜಾಂಬವ ನಗರದ ನಿವಾಸಿ ರವಿ ಕಡಕೋಳ ಹಾಗೂ ಸಂಗಮ ನಗರದ ಸತೀಶ್ ಹರಿಜನ ಬಂಧಿತರು. ಕೆಲ ದಿನಗಳ ಹಿಂದೆ ನಡೆದ ಹನಿಟ್ರ್ಯಾಪ್ ಪ್ರಕರಣದಲ್ಲಿ ಓರ್ವ ಮಹಿಳೆ ಸೇರಿದಂತೆ ಏಳು ಜನರ ತಂಡವನ್ನು ಪೊಲೀಸರು ಬಂಧಿಸಿದ್ದರು.
ಯರಗಟ್ಟಿ ಗ್ರಾಮದ ರಮೇಶ್ ಮಹಾದೇವ ಕಟ್ಟಿಮನಿ ಎಂಬವರಿಂದ ನಕಲಿ ಪತ್ರಕರ್ತರಿಬ್ಬರು ಪ್ರಕರಣದ ಆರೋಪಿ ಶಿಂಗಳಾಪೂರ ಗ್ರಾಮದ ಲಕ್ಷ್ಮಿ ಹೆಸರು ಹೇಳಿ ಹಣ ದೋಚಲು ಪ್ರಯತ್ನಪಟ್ಟಿದ್ದರು. ಈ ಕುರಿತು ದೂರು ನೀಡಿರುವ ರಮೇಶ್, ಪ್ರಕರಣದಿಂದ ನನ್ನ ಹೆಸರು ತೆಗೆಸುವುದಾಗಿ ಹೇಳಿ ₹ 3 ಲಕ್ಷ ನೀಡುವಂತೆ ನಕಲಿ ಪತ್ರಕರ್ತರು ಬೇಡಿಕೆ ಇಟ್ಟಿದ್ದರು ಎಂದು ತಿಳಿಸಿದ್ದಾರೆ.
ಈ ಹಿನ್ನಲೆಯಲ್ಲಿ ಪ್ರಕರಣ ದಾಖಲಿಸಿಕೊಂಡ ನಗರ ಠಾಣೆ ಪೊಲೀಸರು ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಿದ್ದು, ಬಂಧಿತರಿಂದ 2 ಮೋಟಾರ ಸೈಕಲ್, 2 ಮೊಬೈಲ್ ಹಾಗೂ 4 ನಕಲಿ ಪತ್ರಕರ್ತರ ಗುರುತಿನ ಚೀಟಿಗಳನ್ನು ವಶಪಡಿಕೊಂಡಿದ್ದಾರೆ.