ಚಿಕ್ಕೋಡಿ: ಕುಸಿಯುವ ಭೀತಿಯಲ್ಲಿರುವ ಕಲ್ಲೋಳ- ಯಡೂರ ಸೇತುವೆ; ಕಾಮಗಾರಿಗೆ ಸಾರ್ವಜನಿಕರ ಒತ್ತಾಯ...

ಕಳೆದ ತಿಂಗಳು ಅತಿಯಾದ ಪ್ರವಾಹ ಉಂಟಾಗಿ ಚಿಕ್ಕೋಡಿ ಉಪವಿಭಾಗದ ಒಂಬತ್ತು ಸೇತುವೆಗಳು ಜಲಾವೃತಗೊಂಡ ಪೈಕಿ ಕಲ್ಲೋಳ - ಯಡೂರ ಸೇತುವೆ ಕೂಡಾ ಜಲಾವೃತಗೊಂಡಿತ್ತು.

ಚಿಕ್ಕೋಡಿ: 40 ವರ್ಷಗಳ ಹಿಂದೆ ಕೃಷ್ಣಾ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ತಾಲೂಕಿನ ಕಲ್ಲೋಳ ಯಡೂರ ಸೇತುವೆ ಕುಸಿಯುವ ಭೀತಿಯಲ್ಲಿದೆ.

ಕಳೆದ ತಿಂಗಳು ಅತಿಯಾದ ಪ್ರವಾಹ ಉಂಟಾಗಿ ಚಿಕ್ಕೋಡಿ ಉಪವಿಭಾಗದ ಒಂಬತ್ತು ಸೇತುವೆಗಳು ಜಲಾವೃತಗೊಂಡ ಪೈಕಿ ಕಲ್ಲೋಳ - ಯಡೂರ ಸೇತುವೆ ಕೂಡಾ ಜಲಾವೃತಗೊಂಡಿತ್ತು. ಪ್ರವಾಹದ ರಭಸಕ್ಕೆ ಬ್ಯಾರೇಜ್​ನ ಪಿಲ್ಲರ್​ ಒಂದು ಕೃಷ್ಣಾ ನದಿ ನೀರಿನಲ್ಲಿ ಕೊಚ್ಚಿಹೋಗಿದ್ದರಿಂದ ಸ್ಥಳೀಯರ ಹಾಗೂ ಸಾರ್ವಜನಿಕರ ಹಿತದೃಷ್ಟಿಯಿಂದ ರಸ್ತೆ ಬಂದ್​​ ಮಾಡಲಾಗಿದೆ. ಆದರೆ, ಇದನ್ನು ಪರಿಗಣಿಸದ ಸಾರ್ವಜನಿಕರು ಮಾತ್ರ ಈ ಬ್ಯಾರೇಜ್ ಮೇಲೆ ಬೈಕ್​ ತೆಗೆದುಕೊಂಡು ಸಂಚರಿಸುತ್ತಿದ್ದಾರೆ.

ಕಳೆದ ಎರಡು ವರ್ಷಗಳ ಹಿಂದೆ ಅಂದಿನ ಸಂಸದ ಪ್ರಕಾಶ ಹುಕ್ಕೇರಿ ಹಾಗೂ ಸ್ಥಳೀಯ ಶಾಸಕ ಗಣೇಶ ಹುಕ್ಕೇರಿ 25 ಕೋಟಿ ರೂ. ಅನುದಾನ ಮಂಜೂರಾತಿ ಪಡೆದುಕೊಂಡು ಅಂದಿನ‌ ಲೋಕೋಪಯೋಗಿ ಸಚಿವ ಎಚ್ ಸಿ ಮಹದೇವಪ್ಪ, ನೂತನ ಕಲ್ಲೋಳ - ಯಡೂರ ಬ್ಯಾರೇಜ್​​ ಕಾಮಗಾರಿಗೆ ಚಾಲನೆ ನೀಡಿದ್ದರು. ‌ಆದರೆ, ಇದುವರೆಗೂ ಕಾಮಗಾರಿ ಚಾಲನೆ ಆಗದೇ ಇರುವುದರಿಂದ ಸ್ಥಳೀಯರಿಗೆ ನಿರಾಶೆಯಾಗಿದ್ದು, ಆದಷ್ಟು ಬೇಗ ಕಾಮಗಾರಿ‌ ಪ್ರಾರಂಭಿಸುವಂತೆ ಒತ್ತಾಯಿಸಿದ್ದಾರೆ.