ಚಿಕ್ಕೋಡಿ: 48 ಮಂದಿಯ ಅವಿಭಕ್ತ ಕುಟುಂಬದಲ್ಲಿ 19 ಮಂದಿಗೆ ಕೊರೊನಾ ಸೋಂಕು

ಕುಟುಂಬಸ್ಥರು ಮಹಾರಾಷ್ಟ್ರದ ಸಂಬಂಧಿಕರ ಮನೆಗೆ ಭೇಟಿ ನೀಡಿದ್ದು ಕೊರೊನಾ ಸೋಂಕು ಹರಡಲು ಕಾರಣ ಎಂಬ ಮಾಹಿತಿ ದೊರೆತಿದೆ.

ಚಿಕ್ಕೋಡಿ: ಇಲ್ಲಿನ ಅವಿಭಕ್ತ ಕುಟುಂಬದ 14 ಜನರಿಗೆ ಇಂದು ಕೊರೊನಾ ಪಾಸಿಟಿವ್ ಬಂದಿದೆ. ಈ ಮೂಲಕ ಆ ಕುಟುಂಬದಲ್ಲಿರುವ 48 ಜನರ ಪೈಕಿ ಈಗಾಗಲೇ 19 ಮಂದಿಗೆ ಮಾರಕ ಸೋಂಕು ತಗುಲಿದೆ. ಈ ಪ್ರಕರಣ ಜಿಲ್ಲೆಯ ರಾಯಬಾಗ ತಾಲೂಕಿನ ಭಾವನಸೌಂದತ್ತಿ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ.

ನಿನ್ನೆ 5 ಜನರಲ್ಲಿ ಕೊರೊನಾ ಪಾಸಿಟಿವ್ ಬಂದಿದ್ದು, ಗ್ರಾಮದ 353 ಜನರಿಗೆ ಕೋವಿಡ್​ ಟೆಸ್ಟ್ ನಡೆಸಲಾಗಿತ್ತು. ಅವಿಭಕ್ತ ಕುಟುಂಬದ 48 ಜನರಲ್ಲಿ ಇದೀಗ ಒಟ್ಟು 19 ಜನರಿಗೆ ಸೋಂಕು ತಗುಲಿರುವುದು ದೃಢವಾಗಿದೆ.‌ ವ್ಯಕ್ತಿಯೋರ್ವರ ವಯೋಸಹಜ‌ ಕಾಯಿಲೆ ಹಿನ್ನೆಲೆಯಲ್ಲಿ ಕೊರೊನಾ ಟೆಸ್ಟ್​​ ಮಾಡಿಸಿದ ಬಳಿಕ ಪಾಸಿಟಿವ್​ ಎಂದು ತಿಳಿದುಬಂದಿತ್ತು.

ಇದನ್ನೂ ಓದಿ:ಒಂದೇ ಕುಟುಂಬದ 48 ಜನರ ಕೊವೀಡ್ ತಪಾಸಣೆ: ಬೆಚ್ಚಿ ಬಿದ್ದ ಬಾವನಸೌಂದತ್ತಿ ಗ್ರಾಮ

ಮಹಾರಾಷ್ಟ್ರಕ್ಕೆ ಸಂಬಂಧಿಗಳ ಮನೆಗೆ ಹೋಗಿ ಬಂದಿದ್ದ ಕುಟುಂಬದ ಸದಸ್ಯರಿಂದ ಕೊರೊನಾ ಹರಡಿದೆ ಎನ್ನಲಾಗಿದೆ. ಕೊರೊನಾ ಪಾಸಿಟಿವ್ ಬಂದ ಕಾರಣ ಭಾವನಸೌಂದತ್ತಿ ಗ್ರಾಮದ ಸಂತೆ ರದ್ದುಗೊಳಿಸಲಾಗಿದೆ‌. ಗ್ರಾಮದಲ್ಲಿ ಆತಂಕದ ವಾತಾವರಣ ಸೃಷ್ಟಿಯಾಗಿದೆ.